ދެކުނު އޭޝިއާގެ ކުންފުނިތަކަށްދޭ ޝަރަފްވެރި ދެ އެވޯޑެއް އެމްޕީއެލްއަށް ލިބިއްޖެ

ދެކުނު އޭޝިއާގެ ކުންފުނިތަކަށްދޭ ޝަރަފްވެރި ދެ އެވޯޑެއް މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ލިބިއްޖެއެވެ.

އިންޑިއާގެ ނިއުދިއްލީގައި މިމަހުގެ 20 ވަނަ ދުވަހު، ވިޔަފާރި ކުންފުނިތަކަށް ޚާއްސަކޮށްގެން ދެކުނު އޭޝިއާގެ ސަރަހައްދުގައި ދެމުން އަންނަ އެންމެ ޝަރަފްވެރި އެއް އެވޯޑް ކަމަށްވާ "ސައުތު އޭޝިއަން ބިޒަންސް އެކްސެލެންސް އެވޯޑް 2024" ބާއްވާފައިވާއިރު، މި ހަފްލާގައި އެމްޕީއެލް އަށް ލިބިފައިވަނީ "އިނޮވޭޓިވް ލާނިންގ އެންޑް އޮގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެވޯޑާއި "އިނޮވޭޓިވް ބިޒްނަސް ޓްރާންސްފޮމޭޝަން" އެވޯޑެވެ.

މީގެ ތެރެއިން "އިނޮވޭޓިވް ބިޒްނަސް ޓްރާންސްފޮމޭޝަން" އެވޯޑަކީ އެމްޕީއެލްގެ ތާރީޚުގައި ފުރަތަމަ ފަހަރަށް ލިބުނު އެވޯޑަކަށްވާއިރު، އެމްޕީއެލަށް މި ދެ އެވޯޑްވެސް ލިބިފައިވަނީ، ދެކުނު އޭޝިއާގެ 7 ޤައުމަކަށް ނިސްބަތްވާ ގިނަ ކުންފުނިތަކަކާ ވާދަކޮށްގެންކަން ފާހަގަކޮށްލަން ޖެހެއެވެ.

އެމްޕީއެލަށް "އިނޮވޭޓިވް ލާނިންގ އެންޑް އޮގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެވޯޑް ލިބިފައިވަނީ މުވައްޒަފުންނަށް ތައުލީމާއި ތަމްރީންތައް ދިނުމަށް ކުރަމުންދާ މަސައްކަތާއި ގުޅިގެންނެވެ.

ދެކުނު އޭޝިއާގެ ވާދަވެރިކަން ބޮޑު ވިޔަފާރީގެ މާހައުލެއްގައި ވިޔަފާރި ފުޅާކުރުމާއި، ތަރައްޤީކުރުމާއި، ޒަމާނީކުރުމަށް ކުންފުނިތަކުން ކުރަމުންދާ މަސައްކަތް ފާހަގަކުރުމަށްދޭ މި އެވޯޑް ދެނީ އެކި ދާއިރާތަކުގެ ތަޖުރިބާކާރުން ހިމެނޭ ފަނޑިޔާރުންގެ ޕެނަލަކުން ކުންފުނިތަކުގެ ޕާފޯމަންސް އިވެލުއޭޓް ކުރުމަށްފަހުއެވެ.

ޖުމްލަ ތަފާތު 17 ދާއިރާއަކުން އެވޯޑް ދީފައިވާއިރު، އެމްޕީއެލުން ސިފަކުރިގޮތުގައި މިއީ ލިބުނު ބޮޑު ކުރިއެރުމެކެވެ.