ނެއްލައިދޫގައި ދެމަސްވީ އިރުވެސް ހައްލުނުވި ކަރަންޓުގެ މައްސަލަ ހައްލުކުރުމަށް ރައްޔިތުން ނިކުމެއްޖެ
ހދ ނެއްލައިދޫއަށް ދިމާވެފައިވާ ކަރަންޓްގެ މައްސަލަ ހައްލުނުވެ ގިނަ ދުވަސްތަކެއްވުމުން ރައްޔިތުން މުޒާހަރާކުރަން ފަށައިފި އެވެ.
ނެއްލައިދޫ ކައުންސިލްގެ ނައިބް ރައީސް މުހައްމަދު އިލްހާމް "ވޮއިސް" އަށް މައުލޫމާތު ދިން ގޮތުގައި ކަރަންޓްގެ މައްސަލަ ކުރިމަތިވާތާ މިހާރު ދެމަހަށްވުރެ ގިނަ ދުވަސްވެފައިވާކަމަށާއި ދުވާލެއްގެ މައްޗައް 11 ވަރަކަށް ފަހަރު ކަރަންޓު ކެނޑޭކަމަށެވެ.. މިކަމުގެ ސަބަބުން ގޭބިސީތަކުގައި ބޭނުންކުރާ ގިނަ އަދަދެއްގެ އިލެކްޓޯނިކްސް ސާމާނުވެސް ދަނީ ހަލާކުވަމުންކަން އޭނާ ފާހަގަކުރެއްވެވިއެވެ.
މިއަދު ހެނދުނު ދިހައެއް ޖަހާއެހާއިރު ފެށި މި އިހްތިޖާޖުކުރަމުންދަނީ ފެނަކަ އޮފީސް ސަރަހައްދުގައި އެވެ.
މިމުޒާހަރާ އިންތިޒާމްކުރި އިސްފަރާތަކުން މުޒާހަރާގެ ކުރިން ބުނެފައިވަނީ، "އަޅުގަނޑުމެން މި މުޒާހަރާ މިއަދަށް ލަސްކޮއްފައި ވަނީ ނިމިގެންދިޔަ ރައްޔިތުންގެ މަޖްލިސް އިންތިހާބަށް އެއްވެސް ކަހަލަ ބުރުލެއް އެރިޔަ ނުދޭންވެގެން. މި މުޒާހަރާގެ އަމާޒަކީ ރައްޔިތުންނަށް 24 ގަޑިއިރު ކަރަންޓު ޔަޤީން ކުރުން. އެއްވެސް ހާލެއްގައި މިއީ ސިޔާސީ ބޭނުމެއް ހާސިލް ކުރުމަށް ބޭއްވޭ މުޒާހަރާއެއް ނޫން. އެތައް ހާސް ރުފިޔާގެ ކަރަންޓު ސާމާނު ހަލާކު ވެއްޖެ. އިރު އިރު ކޮޅުން ކަރަންޓު ކެނޑޭ. ދެމަސްވީ މިހާލެއްގައި އުޅޭތާ. ބޭނުންވަނީ ދިމާވަމުން އަންނަ އަސްލު މައްސަލަ ކަމާބެހޭ ފަރާތަކުން ލިބި، ހައްލުކުރެވޭނެ ތާރީހެއް ލިޔުމުން ލިބުން. ﷲ އިރާދަފުޅުން މިކަން ހާސިލު ކުރުމަށް މިއަދު ގިނަ ރައްޔިތުން ބައިވެރިވާނެ" ކަމަށެވެ.
މި އިހްތިޖާޖުގައި ރަށުގެ ގިނަ އަދަދެއްގެ ބަޔަކު ދަނީ ބައިވެރިވަމުންނެވެ.
އިލްހާމް އިތުރައް މައުލޫމާތު ދެމުން ވިދާޅުވެފައިވަނީ މިހާރުވެސް ސްކޫލާއި ސިއްހީ މަރުކަޒު ފަދަ މުހިންމުތަންތަނުގައި ކަރަންޓް ނެތް ކަމަށާއި ދަރިވަރުންނަށް ކިޔަވައިދެނީ ކުލާހުން ބޭރުގައި ސްކޫލު ގޯތިތެރޭގައި ކަމަށެވެ. އަދި ކައުންސިލަށް ވެސް މިކަމުގެ ދަތިތައް އިންތިހާއަށް ކުރިމަތިވާކަމަށް އޭނާ ފާހަގަކުރެއްވެވިއެވެ.
މިމައްސަލާގައި ފެނަކާގެ ޑެޕިއުޓީ މެނޭޖިންގ ޑިރެކްޓަރ އަށް ގުޅާލުމުން އޭނާ ވަނީ މިއީ ލޯކަލް ކައުންސިލް އިންތިހާބުގައި އެމްޑީޕީގެ ކެނޑިޑޭޓަށް މެޖޯރިޓީ ނުލިބުނު ރަށެއްކަމަށް ވުމުން ސިޔާސީ ކަމެއްގޮތެއް ސިފަކޮށްފައިކަމަށް ކައުންސިލް އިން ވަނީ ހާމަކޮށްފައެވެ.
މިމައްސަލާގައި މިހާތަނަށް ރަށުގެ ރައްޔިތުންނާއި ބައްދަލުކުރުމަށް ފެނަކައިގެ އިސްފަރާތެއް އައިސްފައި ނުވާކަމަށް ކައުންސިލްގެ ނައިބްރައީސް ފާހަގަކުރެއްވެވިއެވެ.
އެނަކާގެ ޑީއެމްޑީ އިބްރާހިމް ވަހީދް ފޯނަށް ޖަވާބުނުދެއްވާތީ މިމައްސަލަ ވަނީ ސާފުވާގޮތްނުވެފައެވެ.
ނެއްލައިދޫ މުޒާހަރާގެ ބައިވެރިން ހާމަކޮށްފައިވާގޮތުގައި މި މުޒާހަރާ ނިންމާލާނީ އިންޖީނުގެ މައްސަލަ ހައްލުކުރާނެ ތާރީހެއް ލިބުންކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
