ބްލެކްމެއިލްކޮށް 3 ލައްކައަށްވުރެ ގިނަ ރުފިޔާ ހޯދި މައްސަލައެއް ފުލުހުން ބަލަނީ

ބްލެކްމެއިލްކޮށް 3 ލައްކައަށްވުރެ ގިނަ ރުފިޔާ ހޯދި މައްސަލަ އާއި މަސްތުވާ ތަކެތީގެ މައްސަލައެއްގައި ފުލުހުން ދެ މީހަކު ހައްޔަރުކޮށްފިއެވެ.

ފުލުހުން ބުނީ މި މައްސަލާގައި ހައްޔަރުކޮށްފައިވަނީ އައްޑޫސިޓީ ފޭދޫ ލިލީގަސްދޮށުގޭ އުމުރުން 32 އަހަރުގެ މުޙައްމަދު ފަވާޒު ލުޠުފީ އާއި މއ. ޔެލޯޑައިމަންޑް، އުމުރުން 33 އަހަރުގެ އާމިނަތު ފައިނާޒް ކަމަށެވެ. މައްސަލާގައި މި ދެމީހުން ފުލުހުން ހައްޔަރުކޮށްފައިވަނީ އިއްޔެއެވެ.

ފުލުހުން ބުނީ މި ދެ މީހުންގެ ތެރެއިން، މުޙައްމަދު ފަވާޒު ލުޠުފީ ހައްޔަރުކޮށްފައިވަނީ ބްލެކްމެއިލްކޮށް ބިރުދައްކައި ފައިސާ ހޯދި މައްސަލައާއި މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތުކުރެވޭ މައްސަލައާ ގުޅިގެން ކަމަށެވެ. މި މައްސަލާގައި އޮރިޔާންކާޑު ހުރިކަމަށް ބުނެ ދިވެހި ފިރިހެނަަކަށް ބިރުދައްކައި ބްލެކްމެއިލްކޮށް އެ މީހާގެ އަތުން އެކި ދުވަސްމަތިން 3 ލައްކައަށް ވުރެ ގިނަ ރުފިޔާ ހޯދާފަައިވާ މައްސަލަ ރިޕޯޓްކޮށްފައިވަނީ، މިދިޔަ ޑިސެމްބަރުމަހުގެ 19 ވަނަ ދުވަހުއެވެ.

ފުލުހުން ބުނީ މި މައްސަލައާ ގުޅިގެން ފުލުހުންގެ ތަހުގީގުގެ ތެރެއިން ގިނަ މައުލޫމާތުތަކެއް އެއްކޮށް ގިނަ ކަންކަން ބަލާފައިވާކަމަށެވެ. އެގޮތުން މައްސަލާގައި ތުހުމަތުކުރެވޭ މުޙައްމަދު ފަވާޒް ލުޠުފީ ހުޅުމާލޭގައި ދިރިއުޅޭ ކަަމަށް ބެލެވޭ އެޕާޓްމަންޓު ކޯޓު އަމުރެއްގެ ދަށުން ބަލައިފާސްކުރިއިރު ސިމްކާޑުތަކަކާއި މޯބައިލް ފޯނުތަކަކާއި މަސްތުވާތަކެތި ކަމަށް ބެލެވޭ އެއްޗެއްހުރި ރަބަރުޕެކެޓަކާއި މަސްތުވާތަކެތި ވިއްކައި ވިޔަފާރިކުރުމަށް ބޭނުންކުރާ ކަމަށް ބެލެވޭ ތަކެތި ފެނިފައިވާކަމަށް ފުލުހުން ބުންޏެވެ. އަދި މަސްތުވާތަކެތި ކަމަށް ބެލެވޭ އެއްޗެއްހުރި ރަބަރު ޕެކެޓެއް، އާމިނަތު ފައިނާޒް ލައިގެންހުރި އަންނައުނު ތެރެއިން ފެނިފައި ވެއެވެ.

މި މައްސަލައާ ގުޅިގެން ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ  ދެ މީހުންގެ ބަންދަށް 7 ދުވަހުގެ މުއްދަތެއް ޖަހާފައެވެ.

ބްލެކްމެއިލްކޮށްގެން ފައިސާ ހޯދާފައިވާ މައްސަލައާއި މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތުކުރެވޭ މައްސަލަ ފުލުހުން ތަހްގީގުކުރަމުންދަނީ ވަކި ދެ މައްސަލައެއްގެ ގޮތުގައެވެ.