ރައީސްގެ ޗައިނާ ދަތުރުފުޅަށް 2.4 މިލިއަން ރުފިޔާ ޚަރަދުވި

ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަބަލުންނާއި، ސަރުކާރުގެ އިސްބޭފުޅުންގެ ވަފުދު މި މަހުގެ އަށްވަނަ ދުވަހު ޗައިނާއަށް ކުރެއްވި ފުރަމާނަ ދަތުރުފުޅަށް 2.4 މިލިއަން ރުފިޔާ ޚަރަދުވެފައިވާ ކަމަށް ރައީސް އޮފީހުން މިއަދު ހާމަކޮށްފިއެވެ.

ރައީސް ޑރ. މުޙައްމަދު މުއިއްޒު  މިދަތުރުފުޅަށް ޗައިނާއަށް ފުރާވަޑައިގެންނެވީ މި މަހުގެ 7 ވަނަ ދުވަހުއެވެ. އަދި އެބުރި ރާއްޖެ ވަޑައިގެންނެވީ މި މަހުގެ 13 ވަނަ ދުވަހުއެވެ.

މި ދަތުރުފުޅާއި ގުޅިގެން ރައީސް އޮފީހުން ހާމަކޮށްފައިވާ މައުލޫމާތުތަކަށް ބަލާއިރު، މި ދަތުރުގެ ދެކޮޅު ޓިކެޓަށް ޖުމުލަ 2،020،482.60 ރުފިޔާ ހަރަދު ވެފައިވެއެވެ. 30 ބޭފުޅުންގެ ޕޮކެޓް މަނީގެ ގޮތުގައި 300،495 ރުފިޔާ ހަރަދުވެފައިވާއިރު، ދިވެހިންނާ ބައްދަލުކުރެއްވުމުގެ އިވެންޓް ޚަރަދުގެ ގޮތުގައި 3،374.79 ރުފިޔާ ޚަރަދު ވެފައިވެއެވެ. އަދި ސިމްކާޑާއި ވީޕީއެން ޚަރަދަށް 14،341.69 ރުފިޔާ ޚަރަދު ވެފައިވާއިރު، އިންސިޑެންޓަލް ހަރަދުގެ ގޮތުގައި 89،419.85 ރުފިޔާ ވަނީ މި ދަތުރުފުޅުގައި ޚަރަދުވެފައެވެ.

މިހުރިހާ ކަމަކަށް ޚަރަދުވެފައިވާ ވަރަށް ބަލާއިރު ، ރައީސްގެ ޗައިނާ ދަތުރުފުޅަށް ޖުމުލަ ޚަރަދު ވެފައިވަނީ 2،428،113.93 ރުފިޔާ ކަމަށް ރައީސް އޮފީހުން ހާމަކުރައްވާފައި ވެއެވެ.

ރައީސް އޮފީހުން ހާމަކުރައްވާފައިވާ ގޮތުގައި މި ދަތުރުފުޅުގައި ރައީސް އާއި އެކީ ވަޑައިގެންނެވި ވަފުދުގައި ހިމެނި ވަޑައިގަންނަވި ބޭފުޅުންގެ ހުރުމާއި ފަރިއްކޮޅުގެ ހަރަދު ހަމަޖައްސަވައި ދެއްވާފައި ވަނީ ޗައިނާ ސަރުކާރުންނެވެ.

ރައީސް ޗައިނާއަށް ކުރެއްވި ފުރަމާނަ ދަތުރުފުޅުގެ ތެރެއިން އެޤައުމުގެ ރައީސް، ޝީ ޖިންޕިން އާއި ބައްދަލު ކުރައްވައި، ދެ ޤައުމުގެ ދެމެދު ވަނީ ރަސްމީ ވާހަކަފުޅުތައް ބާއްވަވާ، އެކި ދާއިރާތަކުން އެއްބަސްވުންތަކުގައި ސޮއި ކުރައްވާފައެވެ.

މި ދަތުރުފުޅުން އެބުރި ވަޑައިގެން ރައީސް ޑރ. މުހައްމަދު މުއިއްޒު ވިދާޅުވި ގޮތުގައި އެމަނިކުފާނު ޗައިނާއަށް ކުރެއްވި ދަތުރުފުޅަކީ ހުރިހާ ގޮތަކުންވެސް ވަރަށް ކާމިޔާބު ދަތުރުފުޅެކެވެ.