ނުގަވާއިދުން އުޅޭ ބިދޭސީންނަށް އަވަސް ފިޔަވަޅުތަކެއް އަޅާތީ ވަޒީރު އިހްސާން ޝުކުރު ދަންނަވައިފި

ރާއްޖޭގައި ގަވާއިދާއި ޚިލާފަށް އުޅޭ ބިދޭސީންނަށް އަވަސް ފިޔަވަޅުތަކެއް އަޅަމުންދާތީ ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ފުލުހުންނާއި އިމިގްރޭޝަނަށް ޝުކުރު ދަންނަވައިފިއެވެ.

ވަޒީރު އިހްސާން މިފަދައިން ވިދާޅުވީ، މާލޭގެ މަގުމަތީގައި އުޅޭ ބުޅާތައް މަރައި، ބުޅާ މަސް ބޭނުންކޮށްގެން ކާއެއްޗެހި ހަދާކަމަށް ތުހުމަތުކުރެވޭ ބިދޭސީ މީހާ ހައްޔަރުކުރެވިފައިވާކަން ހާމަކޮށް، އިމިގްރޭޝަންގެ ކޮންޓްރޯލަރ މުހައްމަދު ޝަމާން ވަހީދު "އެކްސް"ގައި ކުރެއްވި ޕޯސްޓަކާއި ގުޅިގެންނެވެ.

މިގޮތުން ވަޒީރު އިހްސާން އެކްސްގައި ކުރެއްވި ޕޯސްޓެއްގައި ވިދާޅުވީ، ގާނޫނު ތަންފީޒު ރައްޔިތުންނަށް އަވަހަށް ޚިދުމަތް ދިނުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަންގަވާފައިވާ އަދި އުންމީދު ކުރައްވާ ސްޓޭންޑާޑް ކަމަށެވެ.

އެހެންކަމުން، ވަޒީރު އިހްސާން ވަނީ ގަވާއިދާއި ހިލާފަށް އުޅެމުންދާ ބިދޭސީންނަށް އަޅަމުންދާ އަވަސް ފިޔަވަޅުތައް ފާހަގަކުރައްވާ، އިމިގްރޭޝަނަށާއި، ފުލުހުންނަށް ޝުކުރު އަދާކުރައްވާފައެވެ.

މާލޭގައި އުޅޭ ބުޅާތައް ހިފައި، އެތަކެތި މަރައި، ބުޅަލުގެ މަހުން ކާބޯތަކެތި ތައްޔާރު ކުރާ ކަމަށް ބިދޭސީ މީހަކަށް ތުހުމަތުކުރެވި، އެ މައްސަލަ ފެންމަތިވީ އިއްޔެއެވެ.

އެއާއިއެކު، އޭނާ ހޯދުމަށް އިމިގްރޭޝަނުން އިއްޔެ އިއުލާނު ކުރިއިރު، މިއަދު އިމިގްރޭޝަނުގެ އިންޓެލިޖެންސަށް ލިބުނު މައުލޫމާތަކާއި ގުޅިގެން އޭނާ ވަނީ ހައްޔަރުކޮށް، ބެލުމުގެ ދަށަށް ގެނެސްފައެވެ.

މަގުމަތީގައި އުޅޭ ބުޅާތައް ހިފާ މީހެއްގެ ގޮތުގައި ތުހުމަތު ކުރެވޭ މީހެއްގެ މައްސަލަ ފުލުހަށް ހުށަހަޅާފައިވާކަމަށް ދަނޑުވެރިކަމާއި ދިރޭތަކެއްޗާއިބެހޭ ވުޒާރާއިން ވެސް ވަނީ ހާމަކޮށްފައެވެ.

ގަވާއިދާއި ޚިލާފަށް ރާއްޖޭގައި އުޅެމުން އަންނަ ބިދޭސީންގެ މައްސަލަ ހައްލުކުރުމަށް ފުލުހުންނާއި އިމިގްރޭޝަން ގުޅިގެން އޮޕަރޭޝަނެއް ފަށާފައިވާއިރު، މި އޮޕަރޭޝަންގެ ތެރެއިން މިހާތަނަށް 175 ވުރެ ގިނަ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާކަން ފާހަގަކޮށްލަން ޖެހެއެވެ.