ޑިއުޓީ ވަގުތު ޑިއުޓީގެ ބޭނުމަށް ނޫނީ ފޯނު ބޭނުންނުކުރުމަށް ސީޕީ އެދިވަޑައިގެންފި

ޑިއުޓީ ވަގުތު ޑިއުޓީގެ ކަންކަމުގައި މެނުވީ ފޯނު ބޭނުން ނުކުރުމަށް ދިވެހި ފުލުހުންގެ ކިބައިން ކޮމިޝަނަރ އޮފް ޕޮލިސް އަލީ ޝުޖާޢު އެދިވަޑައިގެންފިއެވެ.

ފުލުހުންގެ 38 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ސީޕީ ޝުޖާޢު ވިދާޅުވީ ފުލުހުންނާ ގުޅިގެން ރައްޔިތުން ކުރާ އެއް ޝަކުވާއަކީ ފުލުހުން މަގުމަތިން ފެނުނު ނަމަވެސް މަގުމަތީގައި ހިނގާ ކަންކަމަށް ނުބަލައި ފޯނާ ކުޅެން ތިބޭ ކަމުގެ ޝަކުވާ ކަމަށެވެ.

ޑިޔުޓީ އަދާކުރާއިރު، ޑިޔުޓީގެ ބޭނުމަށް މެނުވީ، މޯބައި ފޯނު ބޭނުން ނުކުރުން. ވަރަށް ގިނައިން ރައްޔިތުން ކުރާ އެއް ޝަކުވާއަކީ ފުލުހުން މަގުމަތިން ފެނެޔޭ، އެކަމަކު ތިބެނީ ފޯނާ ކުޅޭށޭ. މަގުމަތީގައި ހިނގާ އެއްވެސް ކަމަކަށް ފަރުވާ ނުބަހައްޓައި ތިބެނީ، ފޯނަށް ގެއްލިފައޭ. މިކަން ރަނގަޅު ކުރަން އެބަޖެހޭ.

ކޮމިޝަނަރ އޮފް ޕޮލިސް، އަލީ ޝުޖާޢު

މިއާއެކު ސީޕީ ވަނީ ރައްޔިތުންނާ މުޢާމަލާތް ކުރާއިރު، އަބަދުވެސް ރިވެތި ބަހުން މުޢާމަލާތް ކުރުމަށް ފުލުހުންނަށް އިލްތިމާސް ކުރައްވާފައެވެ. އެގޮތުން، ރައްޔިތުންނާ ރިވެތި ބަހުން މުޢާމަލާތް ނުކުރެވޭނެ ވަގުތެއް އައިސްގެން ނުވާނެ ކަމަށާ، އެންމެ ރިވެތި ބަހުން ވާހަކަ ދައްކަން ޖެހޭނީ ރައްޔިތުންނާ ކަމަށް ސީޕީ ވިދާޅުވިއެވެ.

މީގެ އިތުރުން ފުލުހުންނަށް ލިބޭ ޤާނޫނީ ބާރުތައް ޒިންމާދާރުކަމާއެކު ބޭނުންކުރުމަށްވެސް ސީޕީ އެދިވަޑައިގެންނެވިއެވެ.

"ފުލުހުންނަށް ޤާނޫނީގޮތުން ލިބިދޭ ބާރަކީ ހިތުހުރި ގޮތަކަށް ބޭނުންކުރަންޖެހޭ ބާރެއް ނޫން. އަބަދުވެސް ބަލަންވާނީ ބާރުގެ ބޭނުން ނުކޮށް، ދިމާވާ ކަންކަން ހައްލުކުރުމަށް މަގުދައްކައިދޭ ބަޔަކަށް ވުމަށް. އިސްލާހުވުމަށް ފުރުސަތުދޭ ބަޔަކަށް ވުމަށް. އަޅުގަނޑު އުއްމީދުކުރަން ތިޔަ އޮފިސަރުންގެ މަސައްކަތުން ދިވެހި ފުލުހުންގެ ޚިދުމަތަކީ ރައްޔިތުންގެ ލޯތްބާއި އިހުތިރާމް ލިބިގެންދާނެ ޚިދުމަތަކަށް ވާނެ ކަމަށް،“.

ކޮމިޝަނަރ އޮފް ޕޮލިސް، އަލީ ޝުޖާޢު

ސީޕީ ވިދާޅުވީ ފުލުހުންގެ ޚިދުމަތުގެ ފެންވަރު ރަނގަޅުކޮށް ޚިދުމަތް ފުޅާކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން، ފުލުހުންނަށް ބޭނުންވާ ތަމްރީނުތައް ރާއްޖެއާއި ރާއްޖޭން ބޭރުން ފޯރުކޮށްދިނުމާއި ރަށްރަށުގައި ފުލުހުންގެ މަރުކަޒުތައް ޤާއިމުކުރުމުގެ މަސައްކަތް ކުރަމުންދާކަން ފާހަގަކުރެއްވިއެވެ.