މި އަހަރުވެސް ޢީދު ނަމާދު ކުރަން ފަށާނީ 7:00 ގައި!

މިދިޔަ އަހަރެކޭ އެއް ފަދައިން މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7.00 ގައި ކަމަށް އިސްލާމިކް މިނިސްޓްރީން ބުނެފިއެވެ.

ރާއްޖޭގައި ޢީދު ނަމާދު ކުރަމުން އައީ ހެނދުނު 7:30ގައެވެ. ނަމަވެސް މިދިޔަ އަހަރުގެ ފިޠުރު ޢީދުން ފެށިގެން ޢީދު ނަމާދު ކުރާ ވަގުތު ވަނީ ހެނދުނު 7:00 އަށް އަވަސް ކޮށްފައެވެ.

ޢީދު ނަމާދު ކުރާ ގަޑި ހެނދުނު 07:00އަށް ބަދަލުކޮށްފައި ވަނީ ހެނދުނު 7:30 އަކީ އިރުއަރައި އިރުގެ ހޫނުކަން ގަދަވަމުން އަންނަ ވަގުތަކަށްވެފައި، މިހާރަކަށް އައިސް ދިވެހިރާއްޖޭގައި މައިދާންތަކާއި ހުސްބިންތަކުގައި ޢީދު ނަމާދު ކުރަމުން ގެންދާތީއެވެ. އެގޮތުން، މައިދާންތަކަށް ޢީދު ނަމާދުގެ ޖަމާޢަތަށް ޙާޟިރުވާ ފަރާތްތަކުގެ ތެރޭގައި ތުއްތު ކުދީންނާއި، އަންހެނުންނާއި، މުސްކުޅިންނާއި، ޚާއްޞަ އެހީއަށް ބޭނުންވާ ފަރާތްތައް ވެސް ހިމެނޭއިރު، ހޫނުގަދަވުމުގެ ސަބަބުން ތަކުލީފުތަކެއް އެފަރާތްތަކަށް އުފުލަން ޖެހޭތީ އެ ގަޑި އަވަސް ކުރީ ކަމަށްވެސް އިސްލާމީ ކަންތައްތަކާ ބެހޭ ވުޒާރާއިން ކުރިން ބުނެފައިވެއެވެ.

އިސްލާމިކް މިނިސްޓްރީން ބުނީ މިއަހަރުވެސް މާލެ ސަރަހައްދުގެ މާލެއާއި ހުޅުމާލެ އަދި ވިލިމާލޭގައިވެސް މިއަހަރުގެ ފިޠުރު ޢީދު ނަމާދު ބޮޑުޖަމާޢަތުގައި ކުރާނެ ކަމަށެވެ. އެގޮތުން، މާފަންނު ސްޓޭޑިއަމާއި، ވިލިމާލޭ ބޯޅަދަނޑާއި، ހުޅުމާލޭގެ ސިންތަޓިކް ޓްރެކްގެ އިތުރުން ހުޅުމާލެ ދެވަނަ ފިޔަވަހީގައި ހުންނަ ކްރިކެޓް ސްޓޭޑިއަމްގައި ބޮޑުޖަމާޢަތުގައި ނަމާދު ކުރާނެ ކަމަށް ބުނެފައިވެއެވެ.

މީގެ އިތުރުން ޖުމްލަ 27 ތަނެއްގައި ޢީދު ނަމާދު ކުރާނެ ކަމަށްވެސް އިސްލާމީ ކަންތައްތަކާ ބެހޭ ވުޒާރާއިން ބުނެފައިވެއެވެ.

މާލެ ސަރަހައްދުގައި ފިޠުރު ޢީދު ނަމާދު ކުރާނެ ތަންތަން

* މާފަންނު ސްޓޭޑިއަމް

* މަސްޖިދުއްސުލްޠާން މުޙައްމަދު ތަކުރުފާނުލްއަޢްޡަމް (އިސްލާމީ މަރުކަޒު)

* މަސްޖިދުލްމަލިކި ސަލްމާން (ކިންގް ސަލްމާން މިސްކިތް)

* މަސްޖިދުލްފުރުޤާން

* މަސްޖިދުއްނޫރު

* މަސްޖިދުއް ޝަޙީދު ޢަލީ

* މަސްޖިދުއްސުލްޠާން ޙަސަން ޢިއްޒުއްދީން (ޠައިބާ މިސްކިތް)

* މަސްޖިދުއްސުލްޠާނު މުޙައްމަދު ފަރީދުލްއައްވަލު (ދުބުރި މިސްކިތް)

* މަސްޖިދު ޝަހީދު ޢަބްދުއްރަޙްމާން (ފަނޑިޔާރު މިސްކިތް)

* މަސްޖިދުއްސުލްޠާން މުޙައްމަދު ޝަމްސުއްދީން (ބަންޑާރަ މިސްކިތް)

* މަސްޖިދު ޞަލާޙުއްދީން

* މަސްޖިދު ޖަލާލުއްދީން

* މަސްޖިދު އިބްރާހީމް

* މަސްޖިދު އިސްކަންދަރު

* ވަގުތީ މިސްކިތް ( ބޮޑުގެ )

* މަސްޖިދުއްސުލްޠާނު މުޙައްމަދު ޢިމާދުއްދީން (ރަންމިސްކިތް)

* މަސްޖިދުއްޝައިޚް މުޙައްމަދު ޖަމީލް ދީދީ (ފައިފުހޭ މިސްކިތް)

* މާފަންނު އާމިސްކިތް

* ވިލިމާލެ ބޮޑުޖަމާޢަތް ( ވިލިގިލި ބޯޅަދަނޑު)

* މަސްޖިދުއްސަލާމް

* ހުޅުމާލެ ސިންތަޓިކް ޓްރެކް

* މަސްޖިދުއްޝައިޚް ޤާސިމް ބިން މުޙައްމަދު އާލް ޘާނީ (ހުޅުމާލެ ފޭސް 1)

* މަސްޖިދު ރަޝީދު (ހުޅުމާލެ ފޭސް 1)

* މަސްޖިދު ޢަޒީޒާ މޫސާ (ހުޅުމާލެ ފޭސް 1)

* ހުޅުމާލެ ބޮޑުޖަމާޢަތް (ކުރިކެޓް ސްޓޭޑިއަމް) (ހުޅުމާލެ ފޭސް 2)

* މަސްޖިދު ޙަސަން އާދަމް (ހުޅުމާލެ ފޭސް 2)

* މަސްޖިދު އަބީބަކުރިނިއްޞިއްދީޤް (ފޭސް 2 ހުޅުމާލެ)

މާލޭގެ އިތުރުން ރަށްރަށުގައިވެސް ބޮޑު ޖަމާޢަތުގައި ޢީދު ނަމާދު ކުރެއެވެ.

ކަލަންޑަރ ގައިވާގޮތުން މި އަހަރުގެ ފިޠުރު ޢީދު ވަނީ މާރިޗު މަހުގެ 31 ވަނަ ދުވަހަށެވެ.