އޯޑީއެސް އިން ރާއްޖޭގައި ފުރަތަމަ ފަހަރަށް 'އެކްސްޓެންޑެޑް ޕްރޮޑިއުސާ ރެސްޕޮންސިބިލިޓީ' ޕްރޮގުރާމެއް ފަށައިފި

ހުސް ޕުލާސްޓިކު ފުޅި ގަންނަން ފަށައި, އޯޑީއެސް ޕްރައިވެޓް ލިމިޓެޑުން ރާއްޖޭގައި ފުރަތަމަ ފަހަރަށް 'އެކްސްޓެންޑެޑް ޕްރޮޑިއުސާ ރެސްޕޮންސިބިލިޓީ' (އީޕީއާރު) ޕްރޮގުރާމެއް ފަށައިފިއެވެ.

މިކަމާ ގުޅޭގޮތުން އޯޑީއެސްއިން ބުނީ މި ޕްރޮގުރާމުގެ ދަށުން އަނބުރާ ގަންނާނީ އައްޑޫގައި ހުންނަ އެކުންފުނީގެ ވަން ޑިގްރީ ސައުތު އައްޑޫ ފެކްޓަރީ އިން އުފައްދާ 'ވަން' ބްރޭންޑްގެ ޕީއީޓީ ހުސް ފުޅިތަކެވެ. މި ފުޅިތައް ގަންނަން ހަމަޖެހިފައިވަނީ ފުޅިއަކަށް 33 ލާރީގެ މަގުން ނުވަތަ ފައިސާގެ ބަދަލުގައި ފަހުން ކުންފުނިން ތަކެތި ގަތުމަށް ގްރީން ޕޮއިންޓް ލިބޭގޮތަށެވެ.

އޯޑީއެސްއިން ބަލައިގަންނާނީ ހުސް, ސާފު އަދި ހަލާކުނުވާ ފުޅިތައް އެކަންޏެވެ. އަދި ފުޅީގެ ލޭބަލާއި މަތިގަނޑު އަދި ނެކް ރިންގް ވެސް ހުންނަން ޖެހޭނެއެވެ. ފެން ނޫން އެހެން އެއްވެސް އެއްޗެއް އެޅުމަށް ބޭނުންކޮށްފައިވާ ފުޅި މި ޕްރޮގުރާމްގެ ދަށުން ބަލައިނުގަންނާނޭކަމަށް އެކުންފުނިން ބުނެއެވެ.

އޯޑީއެސްގެ އީޕީއާރު ޕްރޮގުރާމް ފަށައިގަންނަ އިރު ފުޅި ބަލައިގަންނާނީ ހަމައެކަނި ހިތަދޫގައި ހުންނަ ވަން ޑިގްރީ ސައުތު އައްޑޫ ފެކްޓަރީއިންނެވެ. ނަމަވެސް ޕްރޮގުރާމު ކުރިއަށްދާ ވަރަކުން ރާއްޖޭގެ އެހެން ރަށްތަކާއި ސިޓީތަކުންވެސް ފުޅި ބަލައިގަންނަ ސެންޓަރުތައް ކަނޑައެޅިގެންދާނޭކަމަށް ބުނެއެވެ.

2017 ވަނަ އަހަރު ވަން ޑިގްރީ ސައުތު އައްޑޫ ފެކްޓަރީ ހުޅުވިއިރު އެކުންފުނީގެ ވިޔަފާރި ފެށުނީ އެއްފަހަރަށްވުރެ ގިނައިން ބޭނުންކުރެވޭ 18.9 ލީޓަރުގެ ފެންފުޅިތަކުންނެވެ. މިއީ އައްޑޫގެ ގުޅިފައިވާ ރަށްތަކުގައި ޕުލާސްޓިކު ކުނި މަދުކުރުމަށް އެޅުނު މުހިންމު ފިޔަވަޅެކެވެ. އެގޮތުން މިހާރު ފެށުނު އީޕީއާރު ޕްރޮގުރާމަކީވެސް އިޖުތިމާއީ ވިސްނުމާއި ތިމާވެއްޓާއި ވަށާޖެހޭ އިގުތިޞާދީ ލަނޑުދަނޑިތަކާ އެއްގޮތްވާގޮތުގެ މަތިން ފެށިގެންދާ ޕްރޮގުރާމެއްކަމަށް އޯޑީއެސްއިން ބުނެއެވެ.

އޯޑީއެސްއިން ބުނީ އެކުންފުނީގެ އުއްމީދަކީ މި ޕްރޮގުރާމްގެ ޒަރީއާއިން ތިމާވެއްޓަށް ޒިންމާވުމުގެ މިސާލު ނެގޭ ކުންފުންޏަކަށް ވުންކަމަށާއި، ކުންފުނީގެ ހުރިހާ އުފެއްދުންތަކާއި ދޭ ޚިދުމަތްތަކުގެ ފެންވަރު ކުރިއަށްވުރެ ރަނގަޅުކޮށް, ތިމާވެއްޓާއި ރައްޓެހި, ދެމެހެއްޓެނިވި ގޮތެއްގައި ބެހެއްޓުން ކަމަށެވެ.