ބޮޑެތި ގައުމީ މައްސަލަތަކުގައި އެމްޑީޕީ ގައުމީ މަޖިލީހުގެ ދައުރު ފުޅާ ކުރާނަން: މީކާއިލް

ކުރިއަށް އޮތް އެމްޑީޕީ ޗެއަރޕާސަން ހޮވުމުގެ އިންތިހާބުގައި ހޮވިއްޖެނަމަ، ބޮޑެތި ގައުމީ މައްސަލަތަކުގައި އެމްޑީޕީ ގައުމީ މަޖިލީހުގެ ދައުރު ފުޅާ ކުރާނަނެކަމަށް ގަލޮޅު ދެކުނު ދާއިރާގެ މެންބަރު، މީކާއިލް އަޙްމަދު ނަސީމް ވިދާޅުވެއްޖެއެވެ.

މީކާއިލް މިހެން ވިދާޅުވީ، އިއްޔެ ވަޒީރުންނަށް ރުހުން ދިނުމުގެ ވޯޓުގައި އެމްޑީޕީ ޕާލިމަންޓަރީ ގްރޫޕްގެ ގިނަ މެންބަރުން ސަރުކާރުގެ ގިނަ ވަޒީރުންނަށް ރުހުން ދިނުމާއި ގުޅޭގޮތުން އެކްސްގައި ކުރެއްވި ޕޯސްޓެއްގައެވެ.

އިއްޔެ އެމްޑީޕީ ޕީޖީ ގްރޫޕްގެ ގިނަ މެންބަރުން ވަޒީރު އިހްސާނަށް ރުހުން ދެއްވުމުން މީކާއިލް ވިދާޅުވީ، ކުރިޔަށް އޮތް ތަނުގައި މި ފަދަ ކަމެއް ތަކުރާރުވިޔަ ނުދިނުމަށް، މީކާއިލްގެ ޗެއަރޕަރސަންކަމުގައި، ވަޒީރުންނަށް ރުހުން ދިނުންފަދަ ބޮޑެތި ގައުމީ މައްސަލަތަކުގައި އެމްޑީޕީ ގައުމީ މަޖިލީހުގެ ދައުރު ފުޅާ ކުރާނެކަމަށެވެ.

މީކާއިލް އެކްސްގައި ކުރި ޕޯސްޓް.

އެގޮތުން މީކާއިލް ވިދާޅުވި ގޮތުގައި، ހޯމް މިނިސްޓަރު އިހްސާންއަށް މަޖިލީހުން ރުހުން ދިނުމަށް ނެގި ވޯޓުގައި އޭނާ ވާނީ މިނިސްޓަރ އިހްސާނަށް ރުހުން ނެތް ކަމަށް ވޯޓު ދެއްވާފައެވެ. މީކާއިލް ވިދާޅުވި ގޮތުގައި މިގޮތަށް ވޯޓު ދެއްވުމަށް އޭނާ ނިންމެވީ، ޑީއެންއާރް ޑޭޓާބޭސްގެ މައްސަލަ އާއި ވަކިވަކި ފަރުދުންގެ ޒާތީ މައުލޫމާތު އާންމު ކުުރުމާއި ނޫސްވެރިކަމުގެ މިނިވަންކަމަށް ހުރަސްއެޅުން ފަދަ އެތައް ކަމެއްގެ ސަބަބުންނެވެ.

މީގެ އިތުރުން، އެމްޑީޕީ އެތެރޭގެ އިންތިހާބުގައި ދެ ކެންޑިޑޭޓުންނަށް ތާއީދުކުރާ ބައެއް ރައްޔިތުންގެ މަޖިލީހުގެ މެންބަރުންވެސް ފްރީ ވިޕެއްގެ ދަށުން ވަޒީރަށް ރުހުން އޮތް ކަމަށް ވޯޓު ދީފައިވާކަން އޭނާ ފާހަގަކުރެއްވިއެވެ. އަދި ރުހުން ނެތްކަމަށް މީކާއިލްގެ އިތުރުން ފިއްޓޭ ވޯޓު ދެއްވާފައިވާކަން އޭނާ ފާހަގަކުރެއްވިއެވެ. މި މައުޟޫއާއި ގުޅިގެން ފެތުރެމުންދާ ވާހަކަތަކާއި ގުޅިގެން މީކާއިލް ވިދާޅުވީ މިއީ އެތެރޭގެ އިންތިހާބާއި ގުޅުމެއް އޮތް ވޯޓެއް ނޫންކަމަށެވެ.

އިއްޔެ އެމްޑީޕީ ޕާލިމަންޓަރީ ގްރޫޕްގެ ގިނަ މެންބަރުން ވަޒީރުންތަކަށް ދިން ރުހުމާއި ގުޅިގެން، ހާއްސަކޮށް ވަޒީރު އިހްސާނަށް ރުހުން ދިނުމާއި ގުޅިގެން، އެމްޑީޕީގެ އާންމު ގިނަ މެންބަރުން ވަނީ ކަންބޮޑުވުން ފާޅުކުރައްވާފައެވެ. އެގޮތުން އެމްޑީޕީގެ މިވަގުތުގެ ޗެއަރޕާސަން ގަޕޯ ވެސް ވަނީ ސަރުކާރުގެ ވަޒީރުންނަށް ރުހުންދީފައެވެ.