އައްޑޫސިޓީގައި އެންމެ ފުޅާކޮށް މަސްތުވާތަކެތި ވިޔަފާރިކުރާ މީހުން އަތުލައިގަނެވިއްޖެ: ފުލުހުން

އައްޑޫސިޓީގައި އެންމެ ފުޅާކޮށް މަސްތުވާތަކެތި ވިޔަފާރިކުރާ މީހުން އަތުލައިގަނެވިއްޖެކަމަށް ފުލުހުން ބުނެފިއެވެ.

މަސްތުވާތަކެއްޗާ ދެކޮޅަށް ފުލުހުން ފަށާފައިވާ އޮޕަރޭޝަނާ ބެހޭގޮތުން ފުލުހުން މިއަދު ނޫސްވެރިންނަށް މައުލޫމާތު ހިއްސާކުރަމުން ފުލުހުން ބުނީ، މިހާރު ކުރިއަށްދާ އޮޕަރޭޝަން އަލިމަގުގައި އައްޑޫ ސިޓީގައި އެންމެ ފުޅާދާއިރާއެއްގައި މަސްތުވާތަކެތީގެ ވިޔަފާރި ކުރަމުންދާ ނެޓްވޯރކެއްގެ އިސްފަރާތްތައް ފުލުހުންގެ ބެލުމުގެ ދަށަށް ގެނެސްފައިވާކަމަށެވެ. އެ މީހުން ހައްޔަރުކޮށްފައިވަނީ އިއްޔެގެ ވަގުތެއްގައެވެ.

ފުލުހުން ބުނީ މި ނެޓްވޯރކްގެ އިސްފަރާތްތަކަށް އަމާޒުކޮށް މަސްތުވާތަކެތި ޓްރެފިކް ކުރުމާއި މަނީ ލޯންޑަރ ކުރުމުގެ އިންވެސްޓިގޭޝަނެއް  މިއަހަރުގެ މާޗްމަހުގެ ތެރޭގައި ފުލުހުން ފަށާފައިވާކަމަށެވެ. މި ނެޓްވޯރކްގެ ތެރެއިން 2017 އިން ފެށިގެން މަސްތުވާތަކެތީގެ ވިޔަފާރި ކުރަމުން ގެންގޮސްފައިވާއިރު، ފާއިތުވި 5 އަހަރުދުވަހުގެ ތެރޭގައި މި ނެޓްވޯރކްގެ އިސް 4 މީހެއްގެ އެކައުންޓްގައި 19 މިލިއަނަށްވުރެ ގިނަ ދިވެހި ފައިސާ ދައުރުކޮށްފައިވާކަމަށް ފުލުހުން ބުނެއެވެ.

އައްޑޫސިޓީގައި އެންމެ ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާ މީހުން އަތުލައިގަނެވުނުކަމަށް ފުލުހުން ބުނިނަމަވެސް އެމީހުންގެ ވަނަވަރެއް އާއްމުކޮށްފައެއް ނުވެއެވެ. ފުލުހުން ބުނީ މިއީ ކުރިއަށްދާ އޮޕަރޭޝަނަކަށްވާތީ ފަހުން އިތުރު މައުލޫމާތު ހިއްސާކުރާނޭކަމަށެވެ.