މޯލްޑިވިއަންގެ ސީދާ ދަތުރުތައް ޗައިނާއާއި ޔޫރަޕަށް މިއަހަރު ފަހުކޮޅޮ ފަށަނީ

ޤައުމީ އެއަރ ލައިން މޯލްޑިވިއަން އިން ވައިޑް ބޮޑީ އެއާކްރާފްޓާއެކު ޗައިނާ އާއި ޔޫރަޕްގެ ޤައުމުތަކަށް ސީދާ ދަތުރުތައް ފަށާނެ ކަމަށް މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

މިރޭ ބޭއްވި "އަހާ" ފޯރަމްގައި ރައްޔިތަކު ކުރި ސުވާލަކަށް ޖަވާބު ދެއްވަމުން ވަޒީރު އަމީން ވިދާޅުވީ, ވައިޑް ބޮޑީ އެއާކްރާފްޓް ރާއްޖެ ގެނެސް، ރެޖިސްޓްރީ ބަދަލުކޮށް ކަންކަން ކުރުމަކީ ވަރަށް ވަގުތު ނަގާ ކަމެއް ނަމަވެސް މި އަހަރު އޮކްޓޯބަރު ނުވަތަ ނޮވެމްބަރު ތެރޭގައި ޗައިނާއާއި ޔޫރަޕަށް ދަތުރުތައް ފަށާނެ ކަމަށެވެ.

"މި އަހަރު ނިމުމުގެ ކުރިން އިރާދަކުރެއްވިއްޔާ އޮކްޓޯބަރު ފަހުކޮޅު ނުވަތަ ނޮވެންބަރާ ހަމައަށް ދާއިރު އަޅުގަނޑުމެންގެ ގައުމީ އެއާލައިން ޗައިނާގެ ސިޓީތަކަށާއި ޔޫރަޕްގެ ބައެއް ސިޓީތަކަށް ފެށުމަށްޓަކައި މިދަނީ ޝެޑިއުލްކޮށް ފެއްޓޭނެ ގޮތް ހެދުމަށް އެ ހިސާބަށް ދާއިރު އޮންނާނީ ވައިޑް ބޮޑީ އޮޕަރޭޝަންސްއާ އެކީގައި ފެށިފައި,"

އަމީން ވިދާޅުވިއެވެ.

ރާއްޖެ އަންނަ ފަތުރުވެރިން އިތުރު ކުރުމަށް މޯލްޑިވިއަން އިން ސީދާ ދަތުރުތައް ފެށުމަށްޓަކައި 'ވައިޑް-ބޮޑީ އެއަރކްރާފްޓް އޮޕަރޭޝަން' ބޭނުންވާ ފްލައިޓްތައް ގެނެސް އޮޕަރޭޝަން ފެށުމަށް ތައްޔާރުވެފައިވާކަން މީގެ ކުރިން ސަރުކާރުން ވަނީ ހާމަ ކުރައްވާފައެވެ.

ފޯރަމްގައި އަމީން އިތުރަށް ވިދާޅުވީ މޯލްޑިވިއަންއަކީ ގައުމީ އެއާލައިން ކަމަށްވާއިރު، މޯލްޑިވިއަންއަށް ގެއްލުންތަކެެއް ވިޔަސް، ބޭރުގެ ގައުމުތަކަށް ޓުއަރިޒަމް ސެކްޓާގައި އުޅުމުން, އިގްތިސޯދަށް ބޮޑެތި ފައިދާ ތަކެއް ވާނެ ކަމަށެވެ.

މީގެ އިތުރުން މިއީ ގައުމީ މަސައްކަތެއްގެ ގޮތުގައި ދެކިގެން ކުރަން ޖެހޭ ވަރަށް މުހިންމު މަސައްކަތެއް ކަމަށްވެސް ވަޒީރު ވަނީ ވިދާޅުވެފައެވެ.