އިސްރާއީލުން އުންރުވާގެ އިމާރާތްތައް ސުންނާފަތިކުރުން ދިވެހި ސަރުކާރުން ކުށްވެރިކޮށްފި

އިސްރާއީލުގެ އިސްތިޢުމާރީ ބާރުތަކުން، ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދޭ އދ. ގެ އެޖެންސީ (އުންރުވާ) ގެ އިމާރާތްތަކެއް ސުންނާފަތިކޮށްލި ކޮށްލުން ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.

ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އިސްތިޢުމާރުކޮށްފައިވާ އިރުމަތީ ގުދުސްގެ ޝައިޚް ޖައްރާޙްގައި ހުރި އުންރުވާގެ އިމާރާތްތަކަށް އަމާޒުކޮށް އިސްރާއީލުން ހިންގި މި ޢަމަލަކީ ބައިނަލްއަޤުވާމީ ޤާނޫނުތަކާ ކަނޑައެޅިގެން ޚިލާފު ކަމެއް ކަމަށެވެ. އަދި މިއީ އދ. އާއި އިންސާނީ އެހީ ފޯރުކޮށްދޭ އިދާރާތަކުން ކުރަމުންދާ މަސައްކަތްތަކަށް ހުރަސްއަޅައި، ފަލަސްތީނުގެ ރައްޔިތުން ތަޙައްމަލު ކުރަމުންދާ ނިކަމެތި ޙާލަތު އިތުރަށް ގޯސްވެގެންދާނެ ކަމެއްގެ ގޮތުގައި ސަރުކާރުން ވަނީ ސިފަކޮށްފައެވެ.

މީގެ އިތުރުން، އިސްރާއީލުގެ މި އަމަލުތަކަކީ ބައިނަލްއަޤުވާމީ އަދުލު އިންސާފާބެހޭ ކޯޓު (އައި.ސީ.ޖޭ) ގެ ނިންމުންތަކާވެސް ކަނޑައެޅިގެން ޚިލާފު އަމަލުތަކެއްކަން ދިވެހި ސަރުކާރުން ފާހަގަކުރެއެވެ.

ދިވެހި ސަރުކާރުގެ ބަޔާނުގައި، އުންރުވާއިން ފަލަސްތީނުގެ ރައްޔިތުންނަށް ފޯރުކޮށްދެމުންދާ އިންސާނީ އެހީތެރިކަމާއި ރައްކާތެރިކަމުގެ މުހިންމު ދައުރަށް ތައުރީފުކޮށް، އެ އެޖެންސީއަށް ދިވެހިރާއްޖެއިން ދޭ އެއްބާރުލުން އެގޮތުގައި ދެމިއޮންނާނެ ކަމުގެ ޔަޤީންކަން ވަނީ އަރުވާފައެވެ.

އަދި ބައިނަލްއަޤުވާމީ މުޖުތަމަޢުން އެފަރާތްތަކުގެ ޒިންމާ އަދާކޮށް، އިސްރާއީލުން ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ އަމަލުތަކަށް އެ ފަރާތް ޖަވާބުދާރީ ކުރުވުމަށްޓަކައި އަމަލީ ފިޔަވަޅުތަކެއް އެޅުމަށް ދިވެހިރާއްޖެއިން ވަނީ އަނެއްކާވެސް ގޮވާލާފައެވެ.