ފްލޮޓިލާގައި ތިބި ދިވެހީންގެ ރައްކާތެރިކަން ކަށަވަރުކުރަން ގޮވާލައި ކުއްލި މައްސަލައެއް

ފަލަސްތީނަށް އެހީ ހިފައިގެން ދަތުރުކުރާ ސުމުދު ފްލޮޓިލާގެ އުޅަނދުތަކުގައި ތިބި ދިވެހީންގެ ރައްކާތެރިކަން ކަށަވަރުކުރުމަށް ގޮވާލައި ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފިއެވެ.

މި މައްސަލަ މަޖިލީހަށް ހުށަހެޅުއްވީ ކެންދޫ ދާއިރާގެ މެންބަރު މައުރޫފް ޒާކިރެވެ. މައްސަލަ ބަހުސްކުރުމަށް ބަލައިގަތުމާމެދު ނެގުނު ވޯޓުގައި ބައިވެރިވި 57 މެންބަރުން ވެސް ވަނީ ކުއްލި މައްސަލަ ބަލައިގަނެ، ބަހުސްކުރުމަށް ތާއީދުކުރައްވާފައެވެ. މީގެ ތެރޭގައި އިދިކޮޅު ފަރާތްތަކާއި ސަރުކާރު ހިންގާ ޕީއެންސީގެ މެންބަރުން ވެސް ހިމެނެއެވެ.

މެންބަރު މައުރޫފް ހުށަހެޅުއްވި ކުއްލި މައްސަލައިގައި ފާހަގަކުރެއްވި ގޮތުގައި އިސްރާއީލާއި އިސްރާއީލަށް ވާގިވެރިވާ ގައުމުތަކުން ސުމުދު ފްލޮޓިލާތަކަށް ހުރަސްއަޅަން އަންނަނީ މަސައްކަތްކުރަމުންނެވެ. އަދި މި އަމަލުތައް ކުށްވެރިކުރުމަށާއި އެ އުޅަނދުތަކުގައި ތިބި ދިވެހީންގެ ރައްކާތެރިކަން ކަށަވަރުކުރުމަށް އެ މައްސަލައިގައި ގޮވާލައްވާފައިވެއެވެ.

ފަލަސްތީނުގެ ރައްޔިތުންނަށް އިންސާނީ އެހީ ފޯރުކޮށްދިނުމަށް ދަތުރުކުރާ ސުމުދު ފްލޮޓިލާގައި ދިވެހިންވެސް ބައިވެރިވެފައިވާއިރު، މި ދަތުރަށް ހުރަސްއެޅުމަކީ އިންސާނިއްޔަތާ ޚިލާފު ކަމެއް ކަމަށް މެންބަރުން ފާހަގަކުރައްވައެވެ. އަދި މި ކަމުގައި ސަރުކާރުން އަޅަންޖެހޭ ފިޔަވަޅުތައް އެޅުމަށްވެސް ގޮވާލައްވާފައިވެއެވެ.

މި މައްސަލައާ ގުޅިގެން މަޖިލީހުގައި ކުރިއަށްދާ ބަހުސްގައި ގިނަ މެންބަރުން ފާހަގަކުރައްވަނީ ދިވެހި ރައްޔިތުންގެ ރައްކާތެރިކަމަކީ ދައުލަތުގެ އެންމެ އިސް ޒިންމާއެއްގެ ގޮތުގައި ބަލައި، މިކަމުގައި ސަރުކާރުން ޚާއްސަ ސަމާލުކަމެއް ދޭންޖެހޭ ކަމަށެވެ.

މަޖިލީހަށް އެފަދަ ކުއްލި މައްސަލައެއް ހުށަހަޅާފައިވާއިރު، ގްލޯބަލް ސުމޫދު ފްލޮޓިއްލާގައި އައިއޭސީގެ ފަރާތުން ދަނީ ޢަމަލީ ގޮތުން ވެސް ހަރަކާތްތެރިވަމުންނެވެ. އެގޮތުން އައިއޭސީގެ ސެކްރެޓަރީ ޖެނެރަލް އަޙްމަދު ޝާޒު (ބޮޑޭ) ވަނީ އެ ފްލޮޓިއްލާގެ އޮބްޒާވަރުންގެ ބޯޓުގައި ފްލީޓާއެކު ދަތުރުކޮށްފައެވެ. އެހެން ނަމަވެސް އެ ބޯޓުތަކަށް އިޒްރޭލުގެ ނިރުބަވެރި ސިފައިން އަރާނެކަން ޔަގީންވުމުން ޝާޒް ހިމެނޭ އޮބްޒާވަރުންގެ ޓީމު ވަނީ ސައިޕްރަސްއާ ދިމާލަށް މިސްރާބު ޖަހައިފައެވެ.