އަމިއްލަ އަށް މުސާރައާއި އިނާޔަތްތައް ކަނޑައެޅުމަކީ އަދުލުވެރިކަމާއި އެކު ކުރެވޭނެ ގޮތެއް ނޫން: އަލީ ރަމީޒް

އަމިއްލަ އަށް މުސާރައާއި އިނާޔަތްތައް ކަނޑައެޅުމަކީ އަދުލުވެރިކަމާއި އެކު އެކަން ކުރެވޭނެ ގޮތް ނޫންކަމަށް އަލީ ރަމީޒް ވިދާޅުވެއްޖެއެވެ.

ފޭސްބުކްގައި ކުރެއްވި ޕޯސްޓެއްގައި އަލީ ރަމީޒް ވިދާޅުވެފައިވަނީ، ރައްޔިތުންގެ މަޖިލީހުގެ މެންބަރުންގެ މުސާރައާއި އިނާޔަތްތައް ހިތަށްއެރި ވަރަކަށް މެންބަރުން އަމިއްލައަށް ކަނޑައަޅާ އޮތުން ބަދަލުކުރަން ޖެހޭ ކަމަށެވެ.

"އަމިއްލައަށް މުސާރައާއި އިނާޔަތްތައް ކަނޑައެޅުމަކީ އަދުލުވެރިކަމާއި އެކު އެކަން ކުރެވޭނެ ގޮތެއް ނޫން،"

އަލީ ރަމީޒު ވިދާޅުވިއެވެ.

އަލީ ރަމީޒު މިފަދައިން ވިދާޅުވެފައިވާއިރު، ރައްޔިތުންގެ މަޖިލިސް މެންބަރުންގެ މުސާރައާއި ޢިނާޔަތް ކުޑަކުރުމަށް ނުފެންނަ ކަމަށް މާމިގިލީ ދާއިރާގެ މެންބަރު ޤާސިމް އިބްރާހިމް ވަނީ މިއަދު ގެ ޖަލްސާގައި ވިދާޅުވެފައެވެ.

ޤާސިމް މިފަދައިން ވިދާޅުވީ، މަޖިލީހުގެ މެންބަރުންގެ އަދަދު މަދުކުރުމާ ގުޅޭގޮތުން ބާރަށު ދާއިރާގެ މެންބަރު އިބްރާހިމް ޝުޖާއު ހުށަހެޅުއްވި ގަރާރަށް ބަހުސްކުރައްވަމުންނެވެ.

ރާއްޖޭގައި އޮންނަނީ ޔުނިޓަރީ ދައުލަތެއް ކަން ފާހަގަކުރައްވަމުން ޤާސިމް ވިދާޅުވގޮތުގައި، މިހާރު މެންބަރުންނަށް ލިބޭ މުސާރައާއި ޢިނާޔަތްތައް އޮތީ، އޮންނަންޖެހޭ އެންމެ ރަނގަޅު މިންވަރުގައެވެ.

ދައުލަތުގެ އެހެން ވުޒާރާތަކާއި ކުންފުނިތަކާއި ތަންތަނުގެ ވެރިންގެ އިތުރުން އަދި އެތަންތަނުގެ މުވައްޒިފުންނަށް ލިބޭ ފަދައިން މަޖިލިސް މެންބަރުންނަކީ އެހެން އެއްވެސް ސިފައެއްގައި ހައްގު ގޮތުގައި ރުފިޔާ ނުލިބޭ ކަމަށް ވެސް ޤާސިމް ވިދާޅުވިއެވެ.

ރައްޔިތުންގެ މަޖިލީހުގެ މެންބަރުންނަށް ކޮންމެ މަހަކު މުސާރައިގެ ގޮތުގައި، 42،500 ރުފިޔާ، ލިވިންގ އެލަވަންސްގެ ގޮތުގައި 20،000 ރުފިޔާ އަދި ކޮމިޓީ އެލަވަންސްގެ ގޮތުގައި 20،000 ރުފިޔާ ހިމެނޭހެން އެކު ޖުމްލަ މަދުވެގެން 82،500 ރުފިޔާ ކޮންމެ މަހަކު ލިބެއެވެ. މީގެ އިތުރުންވެސް ބޭސްފަރުވާ އާއި އެހެނިހެން ވެސް އާއްމު ރައްޔިތުންނަށް ނުލިބޭ އެތަށް ފަސޭހަތަކެއް އެ މެންބަރުންނަށް ލިބޭކަން ފާހަގަކޮށްލަން ޖެހެއެވެ.