ފުރަތަމަ 100 ދުވަހު ހަޔަރ އެޑިއުކޭޝަނުގެ ދާއިރާއަށް ކަނޑައެޅި ވައުދުތައް ފުއްދައިފި

ރައީސް އިބްރާހިމް މުޙައްމަދު ޞާލިހްގެ ވެރިކަމުގެ ފުރަތަމަ 100 ދުވަހަށް ކަނޑައަޅާފައިވާ ވައުދުތަކުގެ ތެރެއިން ހަޔަރ އެޑިއުކޭޝަން މިނިސްޓްރީން ފުއްދުމަށް ކަނޑައަޅާފައިވާ ހުރިހާ ވަޢުދެއް ފުއްދައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހަޔަރ އެޑިއުކޭޝަން މިނިސްޓަރ ޑރ. އިބްރާޙިމް ޙަސަން ވިދާޅުވި ގޮތުގައި އެ މިނިސްޓްރީއާ ހަވާލުކޮށްފައިވާ ހުރިހާ ވަޢުދެއް ވަނީ ފުރިހަމަކޮށްފައެވެ.

ރައީސް ސޯލިހްގެ ފުރަތަމަ 100 ދުވަހު ހަޔަރ އެޑިއުކޭޝަން މިނިސްޓްރީން ފުއްދުމަށް ކަނޑައަޅާފައިވަނީ 7 ވަޢުދެކެވެ.

ހަޔަރ އެޑިއުކޭޝަން މިނިސްޓްރީން ފުއްދާފައިވާ ވަޢުދުތަކުގެ ތެރޭގައި ޖީސީއީ އޭލެވަލް އިން އެއް ވަނަ ހޯދާ ދަރިވަރުން އިހްތިޔާރު ކުރާ ޔުނިވާސިޓީއަކުން ފުރަތަމަ ޑިގްރީ ހާސިލް ކުރުމަށް ސްކޮލާޝިޕް ދޭންފެށުމާއި ރާއްޖޭގައި ފުރަތަމަ ޑިގްރީ އާއި ހަމައަށް ހިލޭ ކިޔެވުމުގެ ފުރުސަތު ހަމަޖެއްސުން ހިމެނެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ.އިބްރާހިމް ހަސަން ވިދާޅުވި ގޮތުގައި، ރާއްޖޭގައި ތައުލީމާއި ތަމްރީން އެންމެ ބޮޑަށް ބޭނުންވާ ދާއިރާތައް ދެނެގަތުމަށް ދިރާސާއެއް ކޮށްފައިވާ ކަމަށެވެ.

އެގޮތުން އެ ދިރާސާއިން އެނގުނު ގޮތުގައި ތައުލީމާއި ތަމްރީން އެންމެ ބޮޑަށް ބޭނުންވާ ދާއިރާތަކަކީ ފަތުރުވެރިކަން، ތަޢުލީމީ ދާއިރާ، މަސްވެރިކަން، ކޮންސްޓްރަކްޝަން ދާއިރާ އާއި ދަނޑުވެރިކަން ފަދަ ދާއިރާތައް ކަމަށް މިނިސްޓަރު ވަނީ ވިދާޅުވެފައެވެ.

މިނިސްޓަރ ވިދާޅުވި ގޮތުގައި ރާއްޖެއަށް ބޭނުންވާ މަތީ ތަޢުލީމާއި ޕްރޮގަގްރާމްތަކަކީ ކޮބައިކަން ދެނެގަތުމުގެ މަޤްސަދުގައި ކުރި މި ދިރާސާކޮށްފައި ވަނީ މުޅި ރާއްޖެ ތަމްސީލުވާނެހެން ޕްރައިވެޓް އަދި ޕަބްލިކް ސެކްޓަރުގެ އެކި ފަރާތްތަކާއި މަޝްވަރާކޮށްގެން ކަމަށެވެ.