ޗައިނާއިން އޮސްޓްރޭލިއާގެ ވައިގެ އުޅަނދަކަށް ހުރަސް އެޅި މައްސަލައެއް!

ޗައިނާގެ ވައިގެ ސިފައިންގެ ޖޭ-16 ހަނގުރާމަމަތީ ޖެޓަކުން، ބައިނަލްއަގްވާމީ ވައިގެ ސަރަހައްދުގައި ދަތުރުކުރަމުން ދިޔަ އޮސްޓްރޭލިއާ އަސްކަރިއްޔާގެ ޕީ-8 ޕޮސައިޑަން މަތިންދާބޯތަކަށް ހުރަސްއަޅައިފިކަމަށް އޮސްޓްރޭލިއާއިން ތުހުމަތުކޮށްފިއެވެ.

އޮސްޓްރޭލިއާއިން ބުނީ އޮސްޓްރޭލިއާގެ މަތިންދާބޯޓަށް ހުރަސް އެޅުމުގެ ގޮތުން ޗައިނާގެ ޖެޓް، އޮސްޓްރޭލިއާގެ މަތިންދާބޯޓާއި ވަރަށް ކައިރިކުރި ކަމަށާއި، އަދި ޖެޓުން ދޫކޮށްލި ފްލެއަރ ތަކުގެ ސަބަބުން އޮސްޓްރޭލިއާގެ މަތިންދާބޯޓަށް ގެއްލުން ނުވީ ކިރިޔާކަމަށެވެ. އަދި ފްލެއަރގެ އައިސް އޮސްޓްރޭލިއާގެ އަސްކަރީ މަތިންދާބޯޓުގައި ޖެހުނުނަމަ، އޭގައި ތިބި ފަޅުވެރިންގެ ފުރާނައަށް ނުރައްކާވުމުގެ ފުރުސަތު ބޮޑު ކަމަށް އޮސްޓްރޭލިއާގެ ދިފާޢީ ވަޒީރު އަދި ބޮޑުވަޒީގެ ނައިބު، ރިޗަރޑް މާރލްސް ވިދާޅުވިއެވެ. ޗައިނާގެ ޖެޓް، އޮސްޓްރޭލިއާގެ ވައިގެ އުޅަނދާއި 100 ފޫޓަށް ކައިރިކުރި ކަމަށްވެއެވެ.

ޗައިނާގެ ޚާރިޖިއްޔާއިން ރައްދުގައި ބުނީ އެ އުޅަނދު، މިލްކުވެރިކަމާމެދު ޗައިނާއިން ދައުވާކުރާ ދެކުނު ޗައިނާ ކަނޑުގެ ޕެރަސެލް ޖަޒީރާތަކުގެ މައްޗަށް އެރީ ގާނޫނާއި ޚިލާފަށްކަމަށާއި، ޗައިނާގެ އަސްކަރީ ޖެޓުގެ އަމަލުތަކަކީ "ހުއްދަ، ޤާނޫނީ، ޒިންމާދާރު އަދި ހިފެހެއްޓުންތެރި" އަމަލުތަކެއް ކަމަށެވެ.

ދެކުނު ޗައިނާ ކަނޑުގެ މިލްކުވެރިކަމާމެދު ޗައިނާއިން ކުރާ ދައުވާއަކީ ބުރަދަނެއް ހުރި ކަމެއް ނޫންކަމަށް ބައިނަލްއަޤްވާމީ އާބިޓްރޭޝަނުން ނިންމާފައިވާއިރު، އެސަރަހައްދަށް ދުނިޔޭގެ ބޮޑެތި ބާރުތަކުން އަސްކަރީ މަތިންދާބޯޓުތައް ފޮނުވުމަކީ އާއްމު ކަމެކެވެ. އަދި އެގޮތަށް އެސަރަހައްދަށް ވަންނަ އުޅަނދުތަކުން އެއީ ބައިނަލްއަޤްވާމީ ވައިގެ ސަރަހައްދެއްކަމަށް ބުނިނަމަވެސް، ޗައިނާގެ ޖެޓްތަކުން އެފަދަ އުޅަނދުތަކަށް ހުރަސް އެޅުމަށް މަސައްކަތްކޮށްފައި އެބަހުއްޓެވެ.

އޮސްޓްރޭލިއާގެ ޖެޓްތަކަށްވެސް މިފަދައިން ޗައިނާގެ ޖެޓްތަކުން ހުރަސް އެޅުމުގެ މާޒީއެއް އޮތްނަމަވެސް، މިއީ ފާއުތިވި 9 މަސް ދުވަހުގެ ތެރޭގައި މިފަދަ ހާދިސާއެއް ހިނގިކަމަށް އޮސްޓްރޭލިއާއިން ބުނި ފުރަތަމަ ފަހަރެވެ.