މަޖީދިއްޔާ ސްކޫލުގެ ދަރިވަރަކު ޓީބީއަށް ޕޮޒިޓިވުމުން، އެހެން ދަރިވަރުން ޓެސްޓު ކުރަނީ

މަޖީދިއްޔާ ސްކޫލުގައި ކިޔަވާ ދަރިވަރަކު ޓިއުބަރކިއުލޮސިސް (ޓީބީ) އަށް ޕޮޒިޓވިް ވުމުން، އެ ސްކޫލުގައި ކިޔަވާ އެހެން ދަރިވަރުން ޓެސްޓުކުރުމުގެ މަސައްކަތް ފަށައިފިއެވެ.

ތަޢުލީމީ ވުޒާރާއިން މިއަދު ހާމަކުރެއްވި ގޮތުގައި، މަޖީދިއްޔާ ސްކޫލުގައި ކިޔަވަމުން އަންނަ ދަރިވަރަކު  ވަނީ ޓީބީއަށް ޕޮޒިޓިވް ވެފައެވެ. އެހެންކަމުން، ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ޕްރޮޓޮކޯލާ އެއްގޮތަށް އެ ވުޒާރާއިން ޢަމަލު ކުރަމުން ދާ ކަމަށާއި، ޓީބީއަށް ޕޮޒިޓިވް ވި ދަރިވަރުންގެ ކަންކަން ގާތުން ބަލަމުން ދާ ކަމަށްވެސް ތަޢުލީމީ ވުޒާރާއިން މައުލޫމާތު ދިނެވެ.

ދަރިވަރަކު ޓީބީއަށް ޕޮޒިޓިވް ވުމާއެކު އެ ކްލާހުގެ އެހެން ދަރިވަރުން ޓެސްޓު ކުރަން ފަށާ، އަދި، ޓީބީ ޖެހުނު ކުއްޖާއާ ކޮންޓެކްޓު ވެފައި ތިބި މީހުން ދެނެގަނެ ޓެސްޓުކުރާނެ ކަމަށް ވެސް ވުޒާރާއިން ވަނީ ބުނެފައެވެ.

ޓިއުބަރކިއުލޮސިސް އަކީ މަޔޮބެކްޓީރިއަމް ޓިއުބަރ ކިއުލޮސިސް ނަމަކަށް ކިޔާ ބެކްޓީރިއާ އަކުން ޖެހޭ ނުރައްކާތެރި ބައްޔެކެވެ. މި ބަލި ޢާންމުކޮށް ޖެހެނީ ފުއްޕާމެޔަށެވެ. ނަމަވެސް ސިކުނޑިއާއި، ކިޑްނީ އަދި މައިބަދަ ފަދަހަށިގަނޑުގެ އެހެން ގުނަވަން ތަކަށްވެސް ޓީބީ ޖެހުމުގެ ފުރުސަތު އޮވެއެވެ.

ރާއްޖެ ނިސްބަތްވާ ދެކުނު އޭޝިޔާ ސަރަހައްދަކީ ޓީބީގެ ކޭސްތައް ފެންމަތިވާ އިންސައްތަ މަތި ސަރަހައްދެކެވެ. އެގޮތުން ޓީބީ ޖެހިފައިވާ މީހުންގެ 40% އަށްވުރެ ގިނަ މީހުން ނިސްބަތްވަނީ މި ސަރަހައްދައްކަން ފާހަގަ ކޮށްލެވެއެވެ. ގައިން ގަޔަށް އަރާ މި ބައްޔަކީ، މަދުން ނަމަވެސް ރާއްޖެއިންވެސް ފެންނަ ބައްޔެކެވެ.

ސަރުކާރުން ވަނީ، 2025އާ ހަމައަށް ރާއްޖެ އިން ޓީބީ ނައްތާލުމަށް އަމާޒު ހިފާފައެވެ.