މިދިޔަ އަހަރުގެ ނިޔަލަށް ސޮއިކުރި މަޝްރޫޢުތަކުގެ ޖުމްލަ އަގު، 39.9 ބިލިއަން ރުފިޔާއަށް އަރާ: މުއްތަލިބް

މިދިޔަ އަހަރުގެ ނިޔަލަށް ސޮއިކޮށްފައިވާ އުމްރާނީ ތަރައްޤީގެ މަޝްރޫޢުތަކުގެ ޖުމްލަ އަގު 39.9 ބިލިއަން ރުފިޔާއަށް އަރާކަމަށް އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ބިނާރާބެހޭ ވަޒީރު މުއްތަލިބް ވިދާޅުވީ، ބިނާރާބެހޭ ވުޒާރާއިން މިދިޔަ އަހަރުގެ ނިޔަލަށް 322 މަޝްރޫޢުއެއްގައި ސޮއިކޮށްފައިވާއިރު، އެ މަޝްރޫޢުތަކުގެ ޖުމްލަ އަގު 39.9 ބިލިއަން ރުފިޔާއަށް އަރާކަމަށެވެ.

އޭގެ ތެރޭގައި ހިމެނެނީ އެއާޕޯޓްގެ 9 މަޝްރޫޢުއަކާއި، އެއް ބްރިޖާއި، ބިންހިއްކުމުގެ 29 މަޝްރޫޢު އާއި، މަގުހެދުމުގެ 42 މަޝްރޫޢު އާއި، ގޮނޑުދޮށް ހިމާޔަތްކުރުމުގެ 44 މަޝްރޫޢުގެ އިތުރުން ފެނާއި ނަރުދަމާގެ 102 މަޝްރޫޢުއެއް އެކެވެ.

މުއްތަލިބް ވިދާޅުވީ، އެ މަޝްރޫޢުތައް ކުރިއަށްގެންދިއުމަށް މިއަހަރުގެ ބަޖެޓްގައި ހިމަނާފައިވަނީ 3.6 ބިލިއަން ރުފިޔާ ކަމަށެވެ. އެއީ މިއަހަރު ކުރިއަށްގެންދިއުމަށް ހަމަޖެހިފައިވާ މަޝްރޫޢުތަކަށް ބޭނުންވާ ފައިސާގެ އެއްބައި ކަމަށްވެސް މިނިސްޓަރު ވިދާޅުވިއެވެ.

މީގެ ތެރެއިން ބޮޑުބަޔަކީ ތިލަމާލެ ބްރިޖް، އައްޑޫމަގުހެދުން އަދި ފެނާއި ނަރުދަމާގެ މަޝްރޫޢުތަކަށް އިންޑިއަން އެލްއޯސީން ހަރަދުކުރުމަށް ކަނޑައަޅާފައިވާ ފައިސާ

މުއްތަލިބް ވިދާޅުވިއެވެ

މިނިސްޓަރު މުއްތަލިބް ވިދާޅުވީ މަޝްރޫޢުތައް ކުރިޔައް ނުދާ ވާހަކައަކީ އެންމެގިނަ މީހުން މިއަދު ކުރިމަތިކުރުވާ ސުވާލުކަމަށާއި، މަޝްރޫޢުތައް ހުއްޓިފައިހުރުމުގެ މައިގަނޑު ސަބަބަކީ މަސައްކަތްތަކަށް ބޭނުންވާ ފައިސާ ބަޖެޓްކޮށްފައި ނެތުންކަމަށް މިނިސްޓަރު ވަނީ ވިދާޅުވެފައެވެ.

މުއްތަލިބް ވިދާޅުވީ މަޝްރޫއުތައް ކިތަންމެ ބައިވަރު ހުރިނަމަވެސް، ހަރަދު ކުރެވެން އަންނަނީ ޤާނޫނީ އިމުގެ ތެރެއިން ބަޖެޓްގައި ހިމެނޭ އަދަދުން ކަމަށާއި، އެހެންނަމަވެސް ރައީސުލްޖުމްހޫރިއްޔާގެ އިރުޝާދުގެ ދަށުން އެންމެ އިސްކަމެއް ދީފައިވާނީ ވީހާވެސް ގިނަ މަޝްރޫޢުތަކެއް ނުހުއްޓި ކުރިއަށް ގެންދިއުމަށްކަމަށްވެސް މިނިސްޓަރު ވަނީ ވިދާޅުވެފައެވެ.