ޕްރޮޖެކްޓަކަށް މުދާ ސަޕްލައި ކުރަން ކަމަށްބުނެ ކުންފުންޏެއްގެ އެކައުންޓުން 1.9 މިލިއަން ރުފިޔާ ފޭރިއްޖެ

ޕްރޮޖެކްޓަކަށް މުދާ ސަޕްލައި ކުރަން ކަމަށްބުނެ ކުންފުންޏެއްގެ އެކައުންޓުން 1.9 މިލިއަން ރުފިޔާ ފޭރިގެންފިއެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ 1.9 މިލިއަން ރުފިޔާގެ ސްކޭމްގެ މައްސަލައެއް ފުލުހުން ތަހުގީގު ކުރަމުންދާ ކަން ހާމަކޮށްފައެވެ.

މިއީ  18 ޖޫން 2024 ވަނަ ދުވަހު ވިޔަފާރި ކުންފުންޏެއްގެ ހިއްސާދާރަކަށް ކާކުކަން ނޭނގޭ ފަރާތަކުން ގުޅައި ވައިބަރ އަދި ވަޓްސްއަޕް މެދުވެރިކޮށް ޕްރޮޖެކްޓަކަށް މުދާ ސަޕްލައި ކުރަން ބޭނުން ކަމަށް ބުނެ އެ މުއާމަލާތުގެ ތެރޭގައި އޮޅުވާލައިގެން ވެންޑާ ރަޖިސްޓްރީ ކުރުމަށް އީމެއިލް އެޑްރެސްގެ މައުލޫމާތު ހޯދައި އީމެއިލް ކޮންޕްރޮމައިޒްކޮށް އިންޓަނެޓް ބޭންކިންގެ އެކްސެސް މެދުވެރިކޮށް ވިކްޓިމްގެ އެކައުންޓަށް އެކްސަސްވެ އެކައުންޓުން ގާތްގަނޑަކަށް 25000 ރުފިޔާ އަދި ވިޔަފާރީގެ އެކައުންޓުން 1،897،016 ރުފިޔާ ފޭރިގަތް މައްސަލައެކެވެ.

މިފައިސާގެ ތެރެއިން ޖުމްލަ 548،865 ރުފިޔާ ރިކަވަރ ކުރެވި، މިފައިސާ ގެއްލުންވި ފަރާތަށް ރައްދު ކުރުމުގެ މަސައްކަތް ކުރިއަށް ގެންދާއިރު، މައްސަލައާ ގުޅިގެން ފުލުހުން ވަނީ އެކަކު ހައްޔަރުކޮށްފައެވެ.

"މިމައްސަލަ ފުލުހުންނަށް ހުށަހެޅިފައި ވަނީ 2024 ޖޫން 18 ވަނަ ދުވަހުގެ ގާތްގަނޑަކަށް 17:15 ހާއިރު. މިކަން ހިނގިއިރު ކުންފުނީގެ އެކައުންޓުގައި ގާތްގަނޑަކަށް 2.6 މިލިއަން ރުފިޔާ ހުރި. ކުންފުނީގެ ހިއްސާދާރަށް އެކައުންޓުގައި ފައިސާ މަދުކަން ފާހަގަކުރެވި އެކަން ބޭންކަށް އަންގައި ސްކޭމް ހުއްޓުވުނުއިރު އެކައުންޓުން ގާތްގަނޑަކަށް ސަލާމަތް ކުރެވުނީ އަށްލައްކަ ރުފިޔާ. މިއީ ގާތްގަނޑަކަށް 32 އިންސައްތަ"

ފުލުހުން ބުންޏެވެ.

މި މައްސަލައާއި ގުޅޭ އިތުރު ތަފްސީލު ދެއްވަމުން، އިންސްޕެކްޓަރ އޮފް ޕޮލިސް އާދަމް ނަވީދު ވިދާޅުވީ، މި މައްސަލަ ފުލުހުންނަށް ރިޕޯޓްކުރީ އެދުވަހުގެ 17:15 ގައި ކަމަށާއި، ބޭންކަށް އަންގާފައިވަނީ 15:58 ގައި ކަމަށެވެ.

ނަވީދު ވިދާޅުވީ، މިފައިސާ ކުންފުނީގެ އެކައުންޓުން ބޭރުކުރުމަށް ޖުމްލަ 56 ޓްރާންސެކްޝަނެއް ހަދާފައިވާ ކަމަށާއި، ފައިސާ 50 އެކައުންޓަކަށް ޖަމާކޮށްފައިވާ ކަމަށެވެ.

އެގޮތުން، މި 50 އެކައުންޓްގެ ތެރެއިން 36 އެކައުންޓެއް އެކައުންޓަށް ޖަވާމި ފައިސާ އޭޓީއެމް މެދުވެރިކޮށް ނަގާފައިވާ ކަމަށާއި، މި 50 އެކައުންޓްގެ ތެރެއިން 36 އެކައުންޓަށް ޖަވާމި ފައިސާ އޭޓީއެމް މެދުވެރިކޮށް ނަގާފައިވާކަމަށް ނަވީދު ވިދާޅުވިއެވެ. އަދި ބޭންކްގައި ދައުރުވި ފައިސާގެ ތެރެއިން އެއްލައްކަ ރުފިޔާ ހޯލްޑް ކުރެވިފައިވާކަން ވެސް ނަވީދު ފާހަގަކުރެއްވިއެވެ.

ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.