ރައީސް ޔާމީންގެ ވެރިކަމެއްގައި ދެން އެންމެބޮޑަށް ތަރައްގީ ކުރާނީ ލ. އަތޮޅު: ސައީދު

ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމެއް އަތުވެއްޖެނަމަ، ދެން އެންމެ ބޮޑަށް ތަރައްގީކުރާނީ ހައްދުންމަތި ކަމަށް މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.

ރައީސް ޔާމީން މިނިވަން ކުރުމަށް ގޮވައިލައި، އިދިކޮޅު ކޯލިޝަނުން މިރޭ ލ. މާވަށުގައި ބޭއްވި ޖަލްސާގައި ވާހަކަދައްކަވަމުން ސައީދު ވިދާޅުވީ، ރައީސް ޔާމީންގެ ވެރިކަމެއް ދެން މިގައުމުގައި އޮވެއްޖެނަމަ އެމަނިކުފާނު އެންމެ ބޮޑަށް އިސްކަންދެއްވައިގެން ތަރައްގީކުރާނީ ހައްދުންމަތި ކަމަށެވެ. އަދި އެކަން އިއުލާން ކުރައްވައި އެކަމަށް ވައުދުވީ ރައީސް ޔާމީންގެ އިޒުނަފުޅާއެކުގައި ކަމަށް ސައީދު ވިދާޅުވިއެވެ.

ސައީދު ވިދާޅުވީ، މިސަރުކާރުން މާވަށަށް ގެނެސްދިން ތަރައްގީއެއް ނެތް ކަމަށެވެ. ރައީސް ސޯލިހު މިހާރު ހުންނެވީ ހަތަރެސްކަން ހަމަވެފައި ކަމަށާއި އިދިކޮޅުން ކުރާ މަސައްކަތުގެ ނަތީޖާ އެބަ ފެންނަ ކަމަށެވެ.

ރައީސް ޔާމީން ޖަލުގައި ހުންނެވީ ވަރަށް ސާބިތުކަމާއެކު ކަން ފާހަގަކުރައްވައި ސައީދު ވިދާޅުވީ، އަރިކައްޓަށް ތަދު އަރައިގެން އެމަނިކުފާނު ގޮނޑި ދުއްވަން ވަޑައިނުގަންނަވާނެ ކަމަށެވެ.

''އެމަނިކުފާނެއް އަރިކައްޓަށް ކަކުލަށް ތަދުއަރައިގެން ގޮނޑި ދުއްވުމުގެ ނިޔަތެއް ނެތް. އެމަނިކުފާނެއް ޖަރުމަނަށް ދިޔުމުގެ ނިޔަތެއްވެސް ނެތް. އަބްދުއްރަހީމް ޖަލަށް ވަޑައިގަތުމުން އެމަނިކުފާނު ވިދާޅުވީ، އަބްދުއްރަހީމޭ ދެ ޕާޓީން ތިމަންމަނިކުފާނަށް އޮތް އެންމެ ސާބިތު ޔަގީންކަމަކީ ތިޔަބޭފުޅުންގެ އާންމު މެންބަރުންނޭ. އެމަނިކުފާނު އެޔަގީންކުރައްވާ ފަދައިން މިއަދު ރާއްޖޭގެ ރައްޔިތުން ރައީސް ޔާމީން މިނިވަންކުރަން ބޭނުންވޭ.'' ސައީދު ވިދާޅުވިއެވެ.

ސައީދު ވިދާޅުވީ ރައީސް ޔާމީނަށް އެންމެ ވަފާތެރި އިހުލާސްތެރި އެއް ބޭފުޅަކީ އަބްދުއްރަހީމް ކަމަށާއި ރައީސް ޔާމީނަށް އަނިޔާއެއް ކެއްސެއް އަބްދުއްރަހީމް ނުދެއްވާނެ ކަމަށެވެ.

މީގެއިތުރުން މިސަރުކާރު ވެރިކަމަށް އައީ ސަރުކާރުގެ އިސްވެރިންގެ ބޮލުގައި ބޮޑެތި އިލްޒާމުތައް އަޅުވައިގެން ކަމަށާއި ނަމަވެސް މިއަދު ފުލުހުން އާންމުކުރި ތަފާސް ހިސާބުތަކަށް ބެލި އިރު، ފާއިތުވި ފަސްއަހަރުގެ ތެރޭގައި އެންމެ ގިނަ ވައްކަން ކުރީ ރައީސް ސޯލިހުގެ ވެރިކަމުގެ ފުރަތަމަ އަހަރުގައިކަން އެނގިގެން ދިޔަ ކަމަށެވެ. އެހެންކަމުން އެކަމުންވެސް ސަރުކާރަށް އިބުރަތެއް ހާސިލުވާނެ ކަމަށް ހީކުރައްވާ ކަމަށް ސައީދު ވިދާޅުވިއެވެ.