އަލީ ހާލިދުގެ ގެއިން ބޮޑު ވައްކަމެއް، އިސް ވަގު ނުފެނޭ

މާލެ ސިޓީ ކައުންސިލްގެ ކޮންސަލްޓަންޓެއްގެ މަގާމުގައި ހުންނެވި ޕީއެސްއެމްގެ ކުރީގެ މެނޭޖިން ޑިރެކްޓަރު އަލީ ހާލިދުގެ ގެއިން ވައްކަން ކުރި މީހުން ހޯދަން އާންމުންގެ އެހީއަށް އޭނާ އެދިއްޖެ އެވެ.

ތިން މީހުންގެ ގުރޫޕަކުން އެ ގެއަށް ވަދެ ވައްކަން ކުރާ މަންޒަރު ފެންނަ ސީސީޓީވީ ފްޓޭޖެއް އާންމުކޮށް އަލީ ބުނީ އޭނާގެ ގެއަށް ވަގުން ވަދެފައި ވަނީ އާދިއްތަ ދުވަހު ވަރަށް ހެނދުނުގެ ވަގުތެއްގައި ކަމަށެވެ.

އޭގެ ތެރެއިން ދެ މީހެއްގެ ފޮޓޯ ވެސް އޭނާ ވަނީ އާންމުކޮށްފަ އެވެ. އެއީ އެ ގެއަށް ވަދެ ވަގަށް ތަކެތި ނެގުމަށް ފަހު ވިއްކަން އުޅުނު ދެ މީހުންނެވެ. އަލީ ބުނި ގޮތުގައި އޭނާގެ ގެއިން 40,000 ރުފިޔާގެ ސާމާނު ވަނީ ވަގަށް ނަގާފަ އެވެ.

އޭގެ ތެރޭގައި އައިފޯނަކާއި ދެ ލެޕްޓޮޕާއި ޓެބްލެޓަކާއި އައިނާއި ސެންޓް ވެސް ހިމެނެ އެވެ. އެ ތަކެތި ދަބަހަކަށް އަޅައިގެން ވަގުން ނިކުގެންދެ އެވެ.

މި މައްސަލާގައި ހިމެނޭ ދެ މީހަކު ހައްޔަރު ކޮށްފައި ވަނީ އެ ގެއިން ވަަގަށް ގެންދިޔަ އައިފޯން ޓްރާސްކޮށްގެންނެވެ. އޭރު އެ މީހުން ތިބީ ވަގަށް ނެގި ބައެއް ތަކެތި ވިއްކާށެވެ. އަލީ ބުނި ގޮތުގައި ވައްކަމުގައި އިސްކޮށް އުޅުނު މީހާ އަދި ނުހޯދެ އެވެ.

އެހެން ކަމުން އެކަމުގައި އާންމުންގެ އެހީތެރިކަމަށް ވަނީ އެދިފަ އެވެ. އޭނާ ބުނީ އެ މީހުން އެގެއިން ވައްކަން ކުރީ ވަރަށް ރާވައިގެން ކަމަށެވެ. އެ މީހުން ތިބީ ފިންގަޕްރިންޓް ވެސް ނާރާނެ ގޮތަށް އަތަށް އަންގި ލައްވައިގެންނެވެ.

މި މީހުންނަކީ ކުށުގެ ވެށީގަައި އުޅޭ ވަަރަށް ގިނަ މައްސަލަތަކުގެ ރެކޯޑް އޮންނަ މީހުން ކަމަށް އެނގިފައިވާ ކަމަށް ވެސް އަލީ ބުންޏެވެ.