އެމްއެންޔޫގައި ހިމަބިހި ފެތުރުން ކޮންޓްރޯލްކުރުމަށް ޚާއްޞަ ވެކްސިން ޕްރޮގްރާމެއް

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ދަރިވަރުންނާއި މުވައްޒަފުންނަށް އަމާޒުކޮށްގެން، ހިމަބިހި (މީސެލްސް) ފެތުރުން ކޮންޓްރޯލްކުރުމަށް ހިންގާ "މީސެލްސް އައުޓްބްރޭކް ރިސްޕޮންސް އިމިއުނައިޒޭޝަން ޕްރޮގްރާމް" ރަސްމީކޮށް އިފްތިތާޙްކޮށްފިއެވެ.

މިކަމަށްޓަކައި އިއްޔެ ބޭއްވުނު ޚާއްޞަ ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ސްޓޭޓް ފޯ ހެލްތު މުޙައްމަދު ރަފީޤު ޙަސަނެވެ. މި ރަސްމިއްޔާތުގައި ޔުނިވަރސިޓީގެ ޗާންސެލަރ ޑޮކްޓަރ މަހްމޫދު ޝައުޤީއާއި، ވައިސް ޗާންސެލަރ ޑޮކްޓަރ އައިޝަތު ޝެނާޒް އާދަމް އާއި، އެޗް.ޕީ.އޭގެ ޑިރެކްޓަރ ޖެނެރަލް އޮފް ޕަބްލިކް ހެލްތުގެ އިތުރުން ޔުނިވަރސިޓީގެ އިސްވެރިންނާއި ގިނަ އަދަދެއްގެ ދަރިވަރުން ބައިވެރިވިއެވެ.

ކީރިތި ޤުރުއާނުގެ ބަރަކާތުން ފެށުނު މި ރަސްމިއްޔާތުގައި ވާހަކަފުޅު ދައްކަވަމުން ޝަރަފުވެރި މެހެމާނު، ސްޓޭޓް މިނިސްޓަރ މުޙައްމަދު ރަފީޤު ޙަސަން ވިދާޅުވީ، ހިމަބިއްސަކީ ވަރަށް ހަލުވިކަމާއެކު ފެތުރޭ ބައްޔެއް ނަމަވެސް، މިއީ ވެކްސިން ޖެހުމުގެ ސަބަބުން ފަސޭހަކަމާއެކު ރައްކާތެރިވެވިދާނެ ބައްޔެއް ކަމަށެވެ. އަދި އާންމު ޞިއްޙަތު ރައްކާތެރިކުރުމަށް އެމް.އެން.ޔޫ އިން ދެއްވާ އަހައްމިއްޔަތު ފާހަގަކުރައްވައި އެކަމަށް ޝުކުރު އަދާކުރެއްވިއެވެ.

ރަސްމިއްޔާތުގައި ވާހަކަފުޅު ދައްކަވަމުން ވައިސް ޗާންސެލަރ ޑޮކްޓަރ އައިޝަތު ޝެނާޒް އާދަމް ވިދާޅުވީ، އެމް.އެން.ޔޫ އަކީ އަށްހާހަށްވުރެ ގިނަ ދަރިވަރުންނާއި ހަތްސަތޭކައެއްހާ މުވައްޒަފުން ހިމެނޭ ބޮޑު މުޖުތަމަޢަކަށް ވާއިރު، މި ބޮޑު އާއިލާގެ ދުޅަހެޔޮކަން ކަށަވަރުކުރުމަކީ ޔުނިވަރސިޓީގެ ނުހަނު ބޮޑު މަސްއޫލިއްޔަތެއް ކަމަށެވެ. އަދި މި ވެކްސިން ޕްރޮގްރާމަކީ ކެމްޕަސްތަކުގެ ރައްކާތެރިކަން ވަރުގަދަކޮށް، ބަލި ފެތުރުން ހުއްޓުވުމަށް އެޅޭ މުހިންމު ފިޔަވަޅެއްކަން ފާހަގަކުރެއްވިއެވެ.

މި ކެމްޕެއިނަކީ ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އާއި މިނިސްޓްރީ އޮފް ހެލްތު ގުޅިގެން ކުރިއަށްގެންދާ ހަރަކާތެކެވެ.

ޔުނިވަރސިޓީގެ ފަރާތުން ވަނީ ވެކްސިން ޖެހުމަށް ޝަރުތުހަމަވާ ހުރިހާ ދަރިވަރުންނާއި މުވައްޒަފުން މި ޕްރޮގްރާމްގައި ބައިވެރިވުމަށް އިލްތިމާސްކޮށްފައެވެ.