ޗައިނާ ވިޔަފާރިވެރިންގެ ޖަމިއްޔާގެ ޒިޔާރަތާއެކު މަހުގެ ބާވަތްތައް ބޭރުކުރަން ފުރުސަތު ފަހިވެގެންދާނެ: ސައީދު

ރާއްޖެއަށް ޒިޔާރަތްކުރާ ޗައިނާގެ ވިޔަފާރިވެރިންގެ ޖަމިއްޔާގެ ވަފުދުގެ ދަތުރުތަކާއެކު، އެޤައުމަށް މަހުގެ ބާވަތްތައް ބޭރުކުރުމުގެ ފުރުސަތު ފަހިވެގެންދާނޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ޗައިނާގެ، ކާނާއާއި ގުޅޭ ވިޔަފާރިވެރިންގެ ޖަމްޢިއްޔާ، ޗައިނާ ޗެމްބަރ އޮފް ކޮމާސް އޮފް ފުޑްސްޓަފްސް އެންޑް ނޭޓިވް ޕްރޮޑިއުސް (ސީއެފްއެންއޭ)ގެ ޓީމެއް ރާއްޖެއަށް ކުރި ޒިޔާރަތުގައި ވަނީ، ރާއްޖޭގެ މަސްވެރިކަމުގެ ސިނާއަތުގައި މަސައްކަތްކުރާ ބައެއް ފަރާތްތަކާ ބައްދަލުކޮށްފައެވެ. ޗައިނާ ވަފުދުގެ ޒިޔާރަތުގައި ކަނޑުމަހުގެ އިތުރުން ހުއިފިލަނޑާ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާ ބައްދަލުކޮށް އެފަރާތްތަކުގެ މަސައްކަތް ކުރިއަށްދާގޮތް ވަނީ ތަޖުރިބާކޮށްފައެވެ.

ޗައިނާގެ ވަފުދުގެ ޒިޔާރަތާ ގުޅޭގޮތުން އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ޗައިނާގެ ކަމާބެހޭ އިދާރާތަކުން ރާއްޖެއަށް ކުރާ މިފަދަ ދަތުރުތަކުގެ ސަބަބުން ރާއްޖެއަށް އިތުރު ފުރުސަތުތަކެއް ފަހިވެގެންދާނޭ ކަމަށެވެ. މިގޮތުން ޗައިނާގެ، ކާނާއާއި ގުޅޭ ވިޔަފާރިވެރިންގެ ޖަމްޢިއްޔާ ޓީމުގެ ދަތުރުގެ ސަބަބުން މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއިން އެޤައުމަށް މަހުގެ ބާވަތްތައް ބޭރުކުރުމުގެ އިތުރު ފުރުސަތުތައް ލިބުމުގެ މަގު ފަހިވެގެންދާނޭކަމަށް މިނިސްޓަރު ސައީދު ފާހަގަކުރެއްވިއެވެ.

މިނިސްޓަރު ސައީދު ވިދާޅުވީ އެ ބޭފުޅުންގެ މި ދަތުރުފުޅުގައި ރާއްޖޭގެ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުގެ މަސައްކަތްތައް ކުރިއަށްދާގޮތް ބަލައި، އެބޭފުޅުންގެ މަސައްކަތުގެ ކަންކަން ވަޒަންކުރުމުެގ މަސައްކަތް ކުރިއަށްގެންގޮސްފައިވާކަމަށެވެ.

ޗައިނާގެ، ކާނާއާއި ގުޅޭ ވިޔަފާރިވެރިންގެ ޖަމްޢިއްޔާގެ ޓީމް ރާއްޖެއަށް ޒިޔާރަތްކޮށްފައިވަނީ މިމަހުގެ 13 ވަނަ ދުވަހުއެވެ. އެ ޖަމިއްޔާގެ މި ދަތުރުގެ މަިއގަނޑު މަޤްސަދަކީ ރާއްޖެއާ ޗައިނާ އާ ދެ ޤައުމުން ޤާއިމްކޮށްފައިވާ މިނިވަން ވިޔަފާރީގެ އެއްބަސްވުމުގައި ބަޔާންކޮށްފައިވާ ކަންކަން ކުރެވޭނެ ގޮތްތައް ބަލައި އެކަންކަމަށް މަގުފަހިކުރުމެވެ. މި ދަތުރުގައި ސީއެފްއެންއޭގެ ޓީމުގެ މެމްބަރުން ވަނީ މާންދޫ މަސްފެކްޓްރީގެ އިތުރުން ހިންމަފުށީގައި ހުންނަ މަސް ކާރުހާނާގެ އިތުރުން މަނިޔަފުށީގެ އޮޕަރޭޝަންތައްވެސް ބައްލަވާލައްވާފައެވެ.

ރާއްޖެއާ ޗައިނާއާ ދެޤައުމުގެ ދެމެދުގައި މިނިވަން ވިޔަފާރީގެ އެއްބަސްވުމެއް ޤާއިމްކުރުމުގެ މަސައްކަތް ފަށާފައިވަނީ 2016 ވަނަ އަހަރުގެ ތެރޭގައެވެ. އެ އެއްބަސް ވުމުގެ މަސައްކަތް ނިންމައި، މިނިވަން ވިޔަފާރީގެ އެއްބަސް ވުމުގައި ސޮއިކޮށް އަމަލުކުރަން ފަށާފައިވަނީ މިއަހަރުގެ ޖެނުއަރީމަހުގެ އެއްވަނަ ދުވަހުން ފެށިގެންނެވެ.