ދެ އިންތިހާބުން އެމްޑީޕީ ބަލިވީ ރައްޔިތުންނަށް ވީ ވައުދުތައް ނުފުއްދުމުން: ރައީސް ނަޝީދު

2023 ވަނަ އަހަރު ބޭއްވި ރިޔާސީ އިންތިހާބާއި މިދިޔަ މަހު ބޭއްވި 20 ވަނަ ރައްޔިތުންގެ މަޖިލިހުގެ އިންތިހާބު އެމްޑީޕީ އަށް ނާކާމިޔާބީއާއި ކުރިމަތިލާން ޖެހުނީ، ނިމިދިޔަ އެމްޑީޕީ ސަރުކާރުން ރައްޔިތުންނަށް ވީ ވަޢުދު ނުފުއްދުމުން ކަމަށް ކުރީގެ ރައީސް އަދި އެމްޑީޕީގެވެސް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ސްރީލަންގައި ނެރޭ "މޯނިން" ނޫހަށް ދެއްވި ސުވާލާއި ޖަވާބުގެ އިންޓަވިއުއްގައި ނަޝީދު ވަނީ އެމަނިކުފާނުގެ ސިޔާސީ ހަޔާތް ފެށިގެން ދިޔަ ޕާޓީ، އެމްޑީޕީން ވަކިވެވަޑައިގެންނެވުމަށް ނިންމެވި ނިންމުމާއި ގުޅޭގޮތުން ވާހަކަ ދައްކަވާފައެވެ.

އެގޮތުން ވިދާޅުވީ، އެމްޑީޕީން ވަކިވެވަޑައިގެންނެވުމަށް ނިންމެވި ނިންމެވުމަކީ ވަރަށް އުނދަގޫ ހިތްދަތި ނިންމެވުމެއް ކަމަށެވެ. އެހެން ނަމަވެސް، އެ ޕާޓީ އުފެއްދެވީ ވަކި އުސޫލު ތަކެއްގެ މައްޗަށް ކަމަށާ އެ އުސޫލުތަކަށް ބޯލަބަންޖެހޭ ކަމަށެވެ.

އެހެންނަމަވެސް، ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި އެމްޑީޕީގެ އެ އުސޫލުތަކާއި ފެޔަށް އެ ޕާޓީޖެހެމުންދިޔަ ތަން ފެނިގެންދިޔަ ކަމަށާ، އެހެންކަމުން، އެ ޕާޓީއާއެކު ކުރިއަށް ދިޔުމަށް ދަތިވި ކަމަށް ނަޝީދު ވިދާޅުވިއެވެ. އަދި އެމަނިކުފާނަކީ އެމްޑީޕީން ވަކިވި މެންބަރުން އުފެއްދެވި ޑިމޮކްރެޓްސްގެ އެއްވެސް މަގާމެއްގައި ހުންނެވި ބޭފުޅެއް ނޫން ކަމަށާ އެހެން ނަމަވެސް، އެމްޑީޕީގެ އަސްލު އުސޫލުތައް ދިރުވުމަށް ޕާޓީއެއް އުފެއްދުން މުހިންމު ވާތީ ޑިމޮކްރެޓްސް އުފެއްދެވިީ ކަމަށް ވިދާޅުވިއެވެ.

މިއާއެކު ނަޝީދު ވިދާޅުވީ، އެމްޑީޕީން މެންބަރުން ވަކިވެ ޑިމޮކްރެޓްސް އުފެއްދި ފަހުން، އެމްޑީޕީއަށް ދެ އިންތިޚާބުގައުވެސް ނާކާމީޔާބީއާ ކުރިމަތިލާން ޖެހުނު ކަމަށެވެ. އަދި އެ ނާކާމިޔާބީއާ ކުރިމަތިލާން ޖެހުމުން ވަރަށް ހިތްދަތިވި ކަމަށާ އެހެންނަމަވެސް، ވީ ވަޢުދުތައް ނުފުއްދާ ނަމަ، އިންތިޚާބުތަކުގައި ކާމިޔާބު ނުވާނެ ކަމަށް އެމަނިކުފާނު ވިދާޅުވުއެވެ.

އެމްޑީޕީ ވެރިކަމަށް އައީ ރާއްޖޭގައި އޭރު މޫލާފައި އޮތް ކޮރަޕްޝަންގެ އަމަލުތައް ނައްތާލަން ވަޢުދުވެގެން. އެކަމު އެކަމެއް ނުކުރެވުނު. ދަރަނި ރީ ސްޓްރަކްޗަރ ކުރާނެ ކަމަށް އެމްޑީޕީން ވަޢުދުވި. އެކަމަކު ކުރިންގެ ދަރަނި ދައްކަން އަނެއްކާ އިތުރަށް ލޯނުތައް ނެގީ. އެއީ ޒިންމާދާރުކަމެއް ނެތް ސަރުކާރަކުން ކުރާނެ ކަމެއް ކަމަށް އަޅުގަނޑުދެކެނީ. އެ ސަރުކާރުން ކުރުމަށް މެނިފެސްޓޯގައި ހިމެނި ކަންކަމެއް ނުކުރެވުނު. ވައުދުވީ ކަންކަން ކުރުމުގެ ބަދަލުގައި، ސަރުކާރުން އުޅުނީ “ބޭކާރު” ޕްރޮޖެކްޓް ތަކަށް އިންވެސްޓް ކޮށްގެން ދަރަނި އިތުރު ކުރަން. އެހެންވެ އަޅުގަނޑަށް އެ ޕާޓީއާއެކު ކުރިއަށް ނުދެވުނީ

މުހައްމަދު ނަޝީދު

މީގެ އިތުރުން ސިޔާސީ މައިދާނުގައި 50 އަހަރު އެކުގައި މަސައްކަތްކުރި ކުޑައިރުގެ ރަހުމަތްތެރިޔާ އަދި ދެބެންގެދެދަރި ކޮއްކޮގެ ފިރިކަލުން އާއި ގުޅުން ކަނޑާލުމަކީ ފަސޭހަ ކަމެއް ނޫން ކަމަށާއި އެމްޑީޕީން ވަކިވެ ރައީސް ސޯލިހު އާ ދެކޮޅަށް މަސައްކަތް ކުރުން އުނދަގޫ ކަމަކަށްވި ކަމަށް ނަޝީދު ވަނީ ވިދާޅުވެފައެވެ