ބުރުނީ ގޮނޑުދޮށް ހިމާޔަތްކުރުމުގެ މަސައްކަތް ބާރު ސްޕީޑްގައި ކުރިއަށް

ބުރުނީ ގޮނޑުދޮށް ހިމާޔަތްކުރުމުގެ މަސައްކަތް ބާރު ސްޕީޑްގައި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑް (އެމްޓީސީސީ) އިން ބުނެފި އެވެ.

އެމްޓީސީސީން އެކްސްގައި ހިއްސާކޮށްފައިވާ ޕޯސްޓެއްގައި ބުނެފައިވަނީ މި ޕްރޮޖެކްޓްގެ ދަށުން މިވަގުތު ކުރިއަށްދަނީ ގްރޮއިން ޕްރޮފައިލިންގެ މަސައްކަތާއި ލޯ ކްރެސްޓެޑް ބްރޭކްވޯޓަރ އިންސްޓޯލް ކުރުމުގެ މަސައްކަތްކަަމަށެވެ.

މި މަޝްރޫއުގެ ދަށުން ބުރުނީގެ 1800 ފޫޓުގެ ސަރަޙައްދެއް ޙިމާޔަތްކުރެވިގެން ދާނެކަމަށް އެމްޓީސީސީން ބުނެ އެވެ. އަދިހަމައެހެންމެ، މިމަޝްރޫޢުގެ ދަށުން 21،181.80 ކިއުބިކް މީޓަރުގެ ވެލި ގިރާ ސަރަހައްދަށް އެޅުމަށްވަނީ ހަމަޖެހިފައިވާއިރު 220 މީޓަރުގެ ރިވެޓްމަންޓް ޖެހުމާއި، 369 މީޓަރުގެ ސަރަހައްދެއްގައި ބޭރު ތޮށިލުމަށް ވެސް ހަމަޖެހިފައިވެ އެވެ.

ބުރުނީގެ ގޮނޑުދޮށް ހިމާޔަތްކުރުމުގެ މަސައްކަތް ސަރުކާރުން އެމްޓީސީސީއާއި ހަވާލުކޮށްފައިވަނީ 2021 ވަނަ އަހަރުގެ ސެޕްޓެމްބަރު މަހުގެ 23 ވަނަ ދުވަހުއެވެ. މިމަޝްރޫއަށް 28.8 މިލިއަން ރުފިޔާ ޚަރަދުވާނެކަމަށް އެކުންފުނިން ވަނީ މީގެ ކުރިން ބުނެފަ އެވެ.