އެސްޓީއޯ އަހަރީ އާއްމު ޖަލްސާ މިރޭ، "ބާސެލޯ ނަސަންދުރަ" ހޮޓަލުގައި

ސްޓޭޓް ޓްރޭޑިންގ އޮގަނައިޒޭޝަން އެސްޓީއޯގެ 2024 ވަނަ އަހަރުގެ އަހަރީ އާއްމު ޖަލްސާ މިރޭ "ބާސެލޯ ނަސަންދުރަ" ހޮޓަލުގައި އޮންނާނެއެވެ.

އެސްޓީއޯގެ މިދިޔަ އަހަރުގެ އާއްމު ޖަލްސާގައި ބައިވެރިވުމަށް ހިއްސާދާރުންނަށް ފޮނުވާފައިވާ ނޯޓިހުގައި ވާގޮތުން ޖަލްސާ ބޭއްވުމަށް ތާވަލުކޮށްފައިވަނީ، މިރޭގެ 21:00 ގައި ބާސެލޯ ނަސަންދުރަ ހޮޓަލުގެ ބޯލް ރޫމްގައެވެ. މި ޖަލްސާ މައިކްރޯސޮފްޓް ޓީމްސް ލައިވް އިވެންޓް މެދުވެރިކޮށްވެސް ހިއްސާދާރުންނަށް ބައިވެރިވެވޭނޭކަމަށް އެސްޓީއޯއިން ބުނެއެވެ.

މި ޖަލްސާގައި ބައިވެރިވެވެނީ މިދިޔަ އޭޕްރިލްމަހުގެ 23 ވަނަ ދުވަހުގެ ނިޔަލަށް ކުންފުނީގެ ހިއްސާދާރުންގެ ދަފްތަރުގައި ހިމެނޭ ފަރާތްތަކަށެވެ. މިރޭ ބާއްވާ އަހަރީ އާއްމު ޖަލްސާގައި މިދިޔަ އަހަރުގެ މާލީހިސާބުތައް ފާސްކުރުމާއި، ކުރިއަށްއޮތް އަހަރަށް ކުންފުންޏަށް އައްޔަނުކުރާ އޮޑިޓަރުން އައްޔަނުކުރުން އޮންނާނެއެވެ. އަދި ހިއްސާދާރުންނަށް މިދިޔަ އަހަރުގެ ވިޔަފާރީގެ ފައިދާއިން ހިއްސައަކަށް ބެހުމަށް ކަނޑައަޅާފައިވާ އަދަދު ހިއްސާދާރުންގެ ވޯޓުން ފާސްކުރުންވެސް އޮންނާނެއެވެ. މީގެ އިތުރުން ކުންފުނީގެ ޑިރެކްޓަރުންގެ ގޮތުގައި އާއްމު ހިއްސާދާރުންގެ ފަރާތުން ކަނޑައަޅާ ޑިރެކްޓަރު ހޮވުންވެސް އޮންނާނެއެވެ.

ސަރުކާރާއި ރައްޔިތުން ހިއްސާވާ ކުންފުނި އެސްޓީއޯއަށް މިދިޔަ އަހަރު ޖުމްލަ އާމްދަނީގެ ގޮތުގައި 15.4 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރު އެސްޓީއޯއަށް ސާފްފައިދާގެ ގޮތުގައި ލިބިފައިވަނީ، 741 މިލިއަން ރުފިޔާއެވެ.