މަޖިލިސް އިންތިހާބަށް ވޯޓްލާން ކަނޑައަޅާނެ ވަގުތާއި މެދު ޤައުމީ ލަފާދޭ ކޮމިޓީއާއި މަޝްވަރާ ކުރަނީ

ކުރިއަށްއޮތް 20 ވަނަ ރައްޔިތުން މަޖިލިސް އިންތިޚާބު ރަމަޟާން މަހާ ދިމާވާތީ ވޯޓުލާން ކަނޑައަޅާފައި އޮންނަ ވަގުތާއި ގުޅޭގޮތުން އަންނަ ހަފުތާގައި ޤައުމީ ލަފާދޭ ކޮމިޓީއާއި މަޝްވަރާ ކުރަން ނިންމަވާފައިވާކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެއްޖެއެވެ.

އީސީގެ ރައީސް މި ފަދައިން ވިދާޅުވެފައިވަނީ ދައުލަތުގެ މީޑިޔާ ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުންނެވެ.

އެއް އިންތިޚާބަށްފަހު އަނެއް އިންތިޚާބުގައި ވޯޓުލާ މީހުންގެ އަދަދު މަދުވާކަން ފާހަގަކުރައްވާ އެ ޕްރޮގްރާމުގައި ވާހަކަދައްވަމުން ފުއާދު ވިދާޅުވީ އެއް އިންތިޚާބަށްފަހު އަނެއް އިންތިޚާބުގައި ވޯޓުލާ މީހުންގެ އަދަދު މަދުވުމަކީ ކަންބޮޑުވާން ޖެހޭ ކަމެއް ކަމަށާއި އެކަން ހައްލު ކުރުމަށް މަސައްކަތްތަކެއް ކުރަން ޖެހޭކަމަށެވެ.

ތަފްސީލް ދެއްވަމުން އީސީގެ ރައީސް ފުއާދު ވިދާޅުވީ އިންތިޚާބުތަކުގައި ވޯޓުލާ މީހުންގެ އަދަދު އިތުރު ކުރުމަށް އެކޮމިޝަނުން މަސައްކަތް ކުރަމުންދަނީ ރައްޔިތުންނަށް ފަސޭހަވާނެ ގޮތަށް އިންތިޒާމުތައް ހަމަޖެއްސުމަށް ކަމަށާއި،  އެގޮތުން މާރިޗު މަހު ބާއްވާ ރައްޔިތުންގެ މަޖިލިސް އިންތިޚާބު ރަމަޟާން މަހާ ދިމާވާތީ ވޯޓުލާން ކަނޑައަޅާފައި އޮންނަ ވަގުތާއި ގުޅޭގޮތުން އަންނަ ހަފުތާގައި ޤައުމީ ލަފާދޭ ކޮމިޓީއާއި މަޝްވަރާ ކުރަން ނިންމަވާފައިވާ ކަމަށެވެ.

"މިއަންނަ ހަފުތާ ތެރޭގައި އަޅުގަނޑުމެން މި ވިސްނަނީ ލަފާ ދޭ ކޮމިޓީއާ މަޝްވަރާ ކޮށްގެން އެ ގަޑި (ހެނދުނު 8:00 ހަވީރު 4:00) ތޯ އެންމެ ރަނގަޅީ. ނޫނީ ކުޑަ ތަންކޮޅެއް ފަހަތަށް ޖައްސާލުންތޯ ރަނގަޅީ. އެގޮތަށް މަޝްވަރާކޮށްފައި ރައްޔިތުންނަށް ވެސް އެންމެ ފަސޭހަވާނެ ކަމަށް އެ ބޭފުޅުން ދެކެވަޑައިގަންނަ ގަޑިއަކަށް ހެދުމުގެ ވިސްނުން ކޮމިޝަނުގެ ހުރީ،" ފުއާދު ވިދާޅުވިއެވެ.

އީސީގެ ރައީސް މިފަދައިން ވިދާޅުވެފައިވާއިރު އެންމެފަހުން މާލޭ މޭޔަރު ހޮވަން ބޭއްވުނު ބައި އިލެކްޝަންގެ ވޯޓްލުން ވެގެން ގޮސްފައިވަނީ މާލޭގެ ތާރީޙްގައި ވެސް އެންމެ މަދު އަދަދަކަށް ވޯޓްލާން މީހުން ނިކުތް އިންތިހާބު ކަމަށެވެ.

އެ އިންތިހާބުގައި ވޯޓުލުމުގެ ހައްޤު 54،680 މީހަކަށް ލިބިގެންވީ ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާފައި ވަނީ އެންމެ 17،000 އެއްހާ މީހުން ކަމަށް އިލެކްޝަންސް ކޮމިޝަނުން ވިދާޅުވެއެވެ. މިއީ ވޯޓް ލުމުގެ ހައްޤު ލިބިގެންވާ މީހުންގެ އެންމެ 32 އިންސައްތަ މީހުންނެވެ.