ޑްރަގް އެތެރެކުރާ މީހުންނަށް މަރުގެ އަދަބު ދެވޭގޮތަށް ގާނޫނު އިސްލާހު ކުރަން އަންގަވައިފި

މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭގޮތަށް ގާނޫނު އިސްލާހު ކުރަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ އަންގަވައިފި އެވެ.

ރައީސް އެކަން އިއުލާނު ކުރެއްވީ އެކްސްގައި މިރޭ ކުރެއްވި ޕޯސްޓެއްގަ އެވެ.

އެމަނިކުފާނު ވިދާޅުވީ  މަސްތުވާތަކެތީގެ ވަބާއިން ދިވެހި މުޖްތަމަޢު ސަލާމަތްކޮށް، މަސްތުވާތަކެތިން ދުރުހެލިވެފައިވާ ޖީލެއް ބިނާކުރުމަކީ މިސަރުކާރުގެ އެންމެ މުހިންމު އެއް އަމާޒު ކަމަށެވެ.

‏އެގޮތުން، މަޖިލީހަށް މިހާރު ހުށަހަޅާފައިވާ މަސްތުވާ ތަކެއްޗާބެހޭ ޤާނޫނަށް އިސްލާހުގެނައުމުގެ ބިލްގައި، މަސްތުވާތަކެތި އެތެރެކުރުމުގެ ނުވަތަ ވިޔަފާރިކުރުމުގެ ކުށް ސާބިތުވާ ފަރާތްތަކަށް ދުނިޔޭގެ ބައެއް އެހެން ގައުމު ތަކުގައި ވެސް ކަން ކުރާ ގޮތަށް، މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމަށްޓަކައި އެ ބިލް އިތުރަށް ދިރާސާކުރުމަށް ސަރުކާރުގެ ކަމާގުޅުން ހުރި އިދާރާތަކަށް ވާނީ މިހާރު ދަންނަވާފައި ކަމަށް ރައީސް ވިދާޅުވި އެވެ.

ރާއްޖެއަށް މަސްތުވާތަކެތި އެތެރެކުރާ ފަރާތްތަކަށް ދެވޭ އަދަބު ވަރުގަދަކުރުމަށްޓަކައި، މަސްތުވާތަކެއްޗާބެހޭ ގާނޫނަށް މުހިންމު އިސްލާހުތަކެއް ގެންނާނެ ކަމަށް ކުރީން ވެސް އޮތީ އިއުލާނު ކޮށްފަ އެވެ.

މިހާރު ޢަމަލުކުރަމުންދާ ގާނޫނުގެ ދަށުން، މަސްތުވާތަކެތި އެތެރެކުރާ ފަރާތްތަކަށް ދެވެނީ އުމުރަށް ޖަލަށްލުމާއެކު 100،000 ރުފިޔާއިން ފެށިގެން 10 މިލިއަން ރުފިޔާއާ ހަމައަށް ޖޫރިމަނާކުރުމުގެ އަދަބެވެ. އަދި މިހާތަނަށް ރާއްޖޭގައި މަރުގެ އަދަބު ކަނޑައެޅެނީ ހަމައެކަނި ގަސްދުގައި މީހުން މެރުމުގެ މައްސަލަތަކުގައެވެ. ނަމަވެސް 1953 ވަނަ އަހަރަށްފަހު ރާއްޖޭގައި މަރުގެ އަދަބެއް ތަންފީޒުކޮށްފައެއް ނުވެއެވެ.

ސަރުކާރުގެ މި އައު ހުށަހެޅުން ފާސްވެއްޖެނަމަ، ރާއްޖެއަކީ ދެކުނު އޭޝިއާގައި މަސްތުވާތަކެތީގެ މައްސަލަތަކުގައި މަރުގެ އަދަބު ދޭ ފުރަތަމަ ޤައުމަށް ވެގެންދާނެއެވެ. މި އިސްލާހު އެކުލަވާލުމުގައި ސަރުކާރުން ބޮޑަށް ބަލާފައިވަނީ ސިންގަޕޫރުގެ މޮޑެލްއަށް ކަމަށް މިދިޔަ އަހަރުގެ އޮގަސްޓްގައި ސަރުކާރުގެ ބައެއް އޮފިޝަލުން ވިދާޅުވި އެވެ.