ވާދަވެރިކަން އޮންނަން ވާނީ ހެޔޮގޮތުގައި ކުރިއަށްދިއުމަށް: ރައީސް
އަޅުގަނޑުމެންގެ ތެރޭގައި ވާދަވެރިކަން އޮންނަންވާނީ ހެޔޮގޮތުގައި ކުރިއަށްދިއުމަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ ޤުރްއާން ކިޔެވުމުގެ 37 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ. ރައީސް ވިދާޅުވީ ހެޔޮ ގޮތުގައި ކުރިޔަށް ދިއުމުގެ ވާދަވެރިކަން އުފެއްދުމަކީ ދީނުގައި އޮންނަ އެންމެރަނގަޅު ގޮތްކަމަށެވެ. އެހެންކަމުން ހެޔޮގޮތް ހިޔާރުކޮށް ދީނުގެ މަގުގައި ކުރިޔަށް ދިޔުމަށް ނޫނީ ވާދަވެރިކަމެއް ނޯންނާނެކަމަށް ރައީސްގެ ވާހަކަފުޅުގައި ފާހަގަކުރެއްވިއެވެ.
މި ޖަލްސާގައި ރައީސް ވިދާޅުވީ އަޅުގަނޑުމެންގެ އުޅުމާއި ގުޅުން ބައްޓަންކުރަންޖެހޭނީ ޤުރްއާނާއި ދީނުން އަންގަވައިފައިވާ ގޮތަށް އެމަގުންކަމަށެވެ. އެހެންކަމުން އެ މަޤްސަދު ހާސިލްކުރުމަށް ހުރިހާ މުއައްސަސާތަކާއި އަމިއްލަ ފަރާތްތައް އެކަތިގަނޑެއްގެ ގޮތުގައި މަސައްކަތްކޮށްދެއްވުމަށް އެމަނިކުފާނު ވަނީ އިލްތިމާސްކުރައްވާފައެވެ.
ރައީސް ވިދާޅުވީ، ރާއްޖެ ފަދަ ސައްތައިން ސައްތަ އިސްލާމީ ޤައުމެއްގައި އެންމެ ބޮޑު އިސްކަމެއް ދޭންވާނީ ޤުރްއާން ކިޔެވުމަށް ހިތްވަރުދީ، ބާރު އެޅުމަށް ކަމަށެވެ.
އަޅުގަނޑު ޤަބޫލުކުރާ ގޮތުގައި ސައްތައިން ސައްތަ އިސްލާމީ ޤައުމެއްގައި އެންމެ އިސްކަމެއްދޭން ޖެހޭނީ ރިތި ޤުރްއާން ކިޔެވުމަށް ހިތްވަރު ދިނުމަށް. ބާރު އެޅުމަށް. އެ ދާއިރާއިން ކުރިޔަށް ދިޔުމަށް. ހުރިހާ މަގުތަކެއް ފަހިކޮށްދިނުމަށް.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ ދިވެހި ސަރުކާރުން ޤުރްއާން ކިޔެވުމުގެ ޤައުމީ މުބާރާތައް އިސްކަން ދިނުމަށް ނިންމީ އެ މަޤްސަދު ޙާސިލްކުރުމަށް ކަމަށާއި، އެކަމަށްޓަކައި އެންމެން އެކުގައި މަސައްކަތްކުރަން ޖެހޭ ކަމަށް ރައީސް ވިދާޅުވިއެވެ.
ސަރުކާރުން އެންމެ އިސްކަމެއް ދެނީ ރީތި ރާގުތަކަށް ޤުރްއާން ކިޔެވުމަށް ކޮށްދެވެން ހުރި ކަމެއް ކޮށްދިނުމަށް ކަމަށާއި، އެގޮތުން ރައީސް ވަނީ ސަރުކާރުގެ ވުޒާރާ އަދި މުއައްސަސާތަކާއި އަމިއްލަ ފަރާތްތަކުން ވެސް، ޤުރްއާން ކިޔެވުމުގެ މުބާރަތްތަކުގައި ވާދަކޮށް ރީތިކޮށް ޤުރްއާން ކިޔަވާނެ ކުދިންތަކެއް ގުޅިގެން އުފައްދައި ދިނުމަށް އެދިވަޑައިގަންނަވައިފައެވެ.
ކީރިތި ޤުރްއާން ކިޔެވުމަށް އަޅުގަނޑުމެންގެ ތުއްތު ކުދިންނަށާއި، ހުރިހާ ކިޔަވާ ކުދިންނަށް އަދި ޖުމްލަކޮށް ހަމަ ހުރިހާ ފަރާތްތަކަށް ވެސް ވާނެ އަޅުގަނޑުމެން ހިތްވަރުދީ، ކުރިޔަށް ދިޔުމަށް މަސައްކަތްކޮށްދޭން. އާދެ، އަޅުގަނޑުމެންގެ އުޅުމާއި ގުޅުން ބައްޓަންކުރަން ޖެހޭނީ ޤުރްއާނުން އަޅުގަނޑުމެންނަށް ﷲ ސުބްޙާނަހޫ ވަތަޢާލާ އަންގަވައިފައިވާ ގޮތަށް. މާތްވެގެންވާ އިސްލާމް ދީނުގައި އަންގަަވައިފައިވާ މަގުގެ މަތިން. އެ މަގުން ކުރިޔަށް ދިޔުމަށް.
ރައީސް ޑރ. މުޙައްމަދު މުޢިއްޒު
ޤައުމީ ޤުރްއާން މުބާރާތުގެ ވަނަތައް މިއަދު އިއުލާނުކޮށްފައިވާއިރު މުޅި މުބާރާތުން އެއްވަނަ ހޯދާ ފަރާތްތަކަށް ޕީއެޗްޑީއާއި ހަމައަށް ހިލޭ ކިޔެވޭނެ ފުރުސަތު ދޭން ވެސް ރައީސް ވަނީ ނިންމަވާފައެވެ. ރައީސްގެ އެ ނިންމެވުމާއި އެއްގޮތަށް މިފަހަރުގެ ޤުރްއާން ކިޔެވުމުގެ 37 ވަނަ ޤައުމީ މުބާރާތުގެ ބައިތަކުން މުޅި މުބާރާތުން އެއްވަނަ ހޯދި ތިން ފަރާތަށް އެ އިނާމުތައް ވަނީ ދީފައެވެ.
މިފަހަރުގެ ޤައުމީ މުބާރާތުގެ ފަޚުރުވެރި ރަންވަނަތައް ހޯދައިފައިވަނީ ފާޠިމަތު ޝާޔާ ޒާހިރު، ޢައިޝަތު ޝަބާ އަދި އަޙްމަދު ޝައިމް ރިޟާއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
