ޕީޕީއެމް/ޕީއެންސީ ކޯލިޝަންގެ މަޖިލިސް ޕްރައިމަރީގެ ވޯޓުލުން ފަށައިފި

ކުރިއަށްއޮތް 20 ވަނަ ރައްޔިތުންގެ މަޖިލިސް އިންތިހާބުގައި ޕީޕީއެމް/ޕީއެންސީ  ޓިކެޓުގައި ވާދަކުރައްވާ ކެންޑިޑޭޓުން ހޮވުމަށް ބާއްވާ ޕްރައިމަރީގެ ވޯޓުލުން ފަށައިފިއެވެ.

މި އިންތިހާބުގެ ވޯޓުލުން ފެށީ މިއަދު ހެނދުނު 10:00 ގައެވެ. ވޯޓުލުން ކުރިއަށްދާނީ ހަވީރު 5:00 އާއި ހަމައަށެވެ.

މިއަދު ކުރިއަށް މިދާ ޕްރައިމަރީގައި ވޯޓުލުމަށް ރާއްޖޭގެ އެކި ރަށްތައް ހިމެނޭހެން ޖުމަލަ 227 ވޯޓު ފޮށި ވަނީ ބަހައްޓާފައެވެ.

މި ޕްރައިމަރީގައި ވާދަކުރުމަށް ހުޅުވާލުމުން ތަފާތު ދާޢިރާތަކުން ޖުމުލަ 296 ފަރާތަކުން ޝައުޤުވެރިކަން ފާޅުކޮށްފައިވެއެވެ. އޭގެ ތެރެއިން އެންމެ ކެންޑިޑޭޓެއް ކުރިމަތި ލުމުގެ ސަބަބުން ޕްރައިމަރީ އަކާއި ނުލައި 13 ފަރާތަކަށް ވަނީ ޕީޕީއެމް/ޕީއެންސީގެ ޓިކެޓް ކަށަވަރު ވެފައެވެ.

ޕީޕީއެމް/ޕީއެންސީ ކޯލިޝަނުން ހާމަކޮށްފައިވާ ގޮތުގައި މިއަދު އެ ކޯލިޝަނުން މި ބާއްވާ ޕްރައިމަރީގައި 283 ފަރާތަކުން ވާދަކުރާއިރު އޭގެ ތެރޭގައި 32 އަންހެނުން ހިމެނެއެވެ.

ވޯޓްލުން މިހާރު ފެށިފައިވާއިރު ޕީޕީއެމް/ ޕީއެންސީ ކޯލިޝަނުން މައުލޫމާތު ދީފައިވާ ގޮތުގައި މާލޭގައި ވޯޓްފޮށިތައް ބެހެއްޓިފައިވާ ތަންތަނަކީ ކަލާފާނު ސްކޫލާއި، ޖަމާލުއްދީން ސްކޫލާއި ، ތާޖުއްދީން ސްކޫލާއި އަދި ހެންވޭރު ބޯޅަދަނޑުގައެވެ.

މީގެތެރެއިން ހެންވޭރު ދަނޑުގައި ބެހެއްޓިފައިވާ ފޮށިތަކަކީ މާލޭގައި ދިރުއުޅެމުން ގެންދާ އަތޮޅުތަކުގެ ރައްޔިތުންނަށް ހާއްސަ ކުރެވިފައިވާ ފޮށިތައް ކަމަށް ކޯލިޝަނުން ހާމަކުރައްވައެވެ.

މި ފޮށިތަކުގެ އިތުރުން ވިލިމާލެ ޔޫތު ސެންޓަރާއި، ހުޅުމާލެ ކާމިލް ދީދީ ސްކޫލާއި ރެހެންދި ސްކޫލުގައިވެސް ވޯޓުފޮށިތައް ވަނީ ބަހައްޓައިފައެވެ.

މިއަދު ކުރިއަށް މިދާ ޕީޕީއެމް/ޕީއެންސީގެ ޕްރައިމަރީގައި  71،597 މެންބަރުންނަށް ވޯޓުލުމުގެ ޙައްގު ލިބިގެންވާ ކަމަށް އެކޯލޝަނުން ހާމަކުރާއިރު، މިއަދުގެ ވޯޓުލުން ނިމުމާއިއެކު ކޮންމެ ފޮށްޓެއް ކައިރީގައިވެސް ވަގުތީ ނަތީޖާ އިޢުލާން ކުރާނެކަމަށް ޕީޕީއެމް/ޕީއެންސީން ވަނީ ބުނެފައެވެ.

މި އަދު މި ބޭއްވޭ ޕަރްއިމަރީގެ ރަސްމީ ނަތީޖާ ހަފްތާއެއްގެ ތެރޭގައި އިޢުލާންކުރާނެ ކަމަށްވެސް  ޕީޕީއެމް/ ޕީއެންސީ ކޯލިޝަނުން ވަނީ ހާމަކޮށްފައެވެ.