ކޮންޓެންޓެންޓް ކްރިއޭޓަރުންނަށް އާމްދަނީ ލިބޭނެ ގޮތް ފަހިކުރުމަށް ޓިކްޓޮކްގެ އިސްފަރާތްތަކާ މަޝްވަރާކޮށްފި

ދިވެހިރާއްޖޭގެ ކޮންޓެންޓް ކްރިއޭޓަރުންނަށް އާމްދަނީ ލިބޭނެ އިތުރު ފުރުސަތުތައް ހޯދައިދިނުމަށްޓަކައި، މަޝްހޫރު ސޯޝަލް މީޑިއާ ޕްލެޓްފޯމް ޓިކްޓޮކްގެ އިސް ވަފުދަކާއެކު އިކޮނޮމިކް މިނިސްޓްރީން މަޝްވަރާކޮށްފިއެވެ.

އިކޮނޮމިކް މިނިސްޓްރީގެ އެކްސް އެކައުންޓުގައި ކޮށްފައިވާ ޕޯސްޓެއްގައި ބުނެފައިވާ ގޮތުގައި، ޓިކްޓޮކްގެ އިސް ވަފުދެއް މިހާރު ވަނީ ރާއްޖެއަށް ޒިޔާރަތްކޮށްފައެވެ.

އަދި އެ ވަފްދާ އެ މިނިސްޓްރީން ބައްދަލުކޮށްފައިވާއިރު، މި ބައްދަލުވުމުގައި މަޝްވަރާކުރެވުނީ ޑިޖިޓަލް މަނިޓައިޒޭޝަން މެދުވެރިކޮށް ދިވެހި ކޮންޓެންޓް ކްރިއޭޓަރުންނަށް އާމްދަނީ ހޯދޭނެ އައު މަގުތަކެއް ހުޅުވުމާ ގުޅޭގޮތުން ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިންތިޚާބީ ވަޢުދުތަކުގެ ތެރޭގައި ހިމެނޭ މުހިންމު އެއް ވަޢުދަކީ ކްރިއޭޓިވް އިކޮނޮމީއެއް ބިނާކުރުމެވެ. މި މަޝްވަރާތަކަކީ އެ ވަޢުދު ފުއްދުމަށް އެޅޭ މުހިންމު ފިޔަވަޅެއް ކަމުގައި އިކޮނަމިކް މިނިސްޓްރީން ދެކެއެވެ.

ޓިކްޓޮކް ވީޑިއޯ ހަދާ މީހުންނަށް މިހާރު ވެސް އެއިން އާމްދަނީ ހޯދެ އެވެ. ޓިކްޓޮކްގެ "ކްރިއޭޓާ ފަންޑުން" ފައިސާ ދެނީ ވީޑިއޯތައް މަޝްހޫރުވާ ވަރަށް ބަލައިގެން، އެ މީހުން ބޭނުންވާ އުފެއްދުންތެރިންނަށް އެކަންޏެވެ. އަދި ލައިވްތަކަށް އަރައިގެން ވެސް ޓިކްޓޮކް މެދުވެރިކޮށް އާމްދަނީ ލިބެ އެވެ.