ދީނާ ސިޔާސަތު ވަކިކުރާ ފަރާތްތައް ނުރުހުނަސް ދައުލަތް ހިންގުމުގައި އިސްކުރާނީ އިސްލާމްދީން: ރައީސް

އިސްލާމްދީނާ ސިޔާސަތަކީ ވަކި އެއްޗެއް ކަމަށް ދައްކައި، އެގޮތަށް ވަކާލާތު ކުރާފަރާތްތައް ނުރުހުނު ކަމުގައި ވިޔަސް، މި ދިވެހި ދައުލަތް ހިންގުމުގައި އިސްކުރާނީ އިސްލާމްދީން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަމުންނެވެ.

އެގޮތުން ރައީސް ވިދާޅުވީ، ދިވެހިރާއްޖެއަކީ ސައްތައިން ސައްތަ އިސްލާމީ ގައުމެއް ކަމަށެވެ. އަދި މި ގައުމުގައި ކަންކަން ބައްޓަންކުރަންވާނީ އިސްލާމްދީނުގައިވާ ގޮތުގެ މަތީން ކަމަށެވެ.

ދައުލަތް ހިންގުމުގެ ހުރިހާ ކަމެއްގައިވެސް މާތްވެގެންވާ އިސްލާމްދީނުގައި އަންގަވާފައިވާ އުސޫލުތަކާ ހަމަތަކަށް ކަންކަން ބައްޓަންކޮށް ތަރައްގީ ކުރުމަކީ މި ސަރުކާރުގެ ސިޔާސަތު. އެހެނީ މާތް الله މާތްވެގެންވާ އިސްލާމްދީނުގައި، އަޅުގަނޑުމެން މުސްލިމުން އުޅެން އެކަލާނގެ ރުހިވޮޑިގެންވާ ގޮތް ވަނީ، ފުރިހަމަކޮށް ބަޔާން ކުރައްވާފަ. އަޅުގަނޑުމެންގެ މި ގައުމަކީ ސައްތައިން ސައްތަ އިސްލާމީ ގައުމެއް. މި ގައުމުގައި ކަންކަން ބައްޓަންކުރަންވާނީ މި ފުރިހަމަ ދީނުގައިވާ ގޮތުގެ މަތީން.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

މިއާއެކު ރައީސް ވިދާޅުވީ، ދިވެހި ދައުލަތް ހިންގުމުގެ ކަންކަން އިސްލާމްދީނާއެގޮތަށް ބައްޓަން ކުރުމަކީ ރައީސުލްޖުމްހޫރިއްޔާގެ މައްޗަށް ލާޒިމް ކަމެއް ކަމަށެވެ. އެހެންކަމުން ބައެއްގެ ނުރުހުން އަމާޒުވި ނަމަވެސް އެމަނިކުފާނު ތަންފީޒު ކުރައްވާނީ އެ ސިޔާސަތުތައް ކަމަށް ވިދާޅުވިއެވެ.

އަޅުގަނޑު ގަބޫލުކުރާ ގޮތުގައި ސައްތައިން ސައްތަ އިސްލާމީ ދައުލަތެއއގައި، މި ފުރިހަމަ ދީނުގައިވާ ގޮތަށް ކަންކަން ހިންގުމަށް ދައުލަތުގެ ސިޔާސަތުތައް ބައްޓަންކުރުމަކީ އެ ދައުލަތުގެ އެންމެ އިސްވެރިޔާގެ މައްޗަށް ލާޒިމް ކަމެއް. އެހެންކަމުން މި ދިވެހި ދައުލަތުގެ ރައީސުލްޖުމްހޫރިއްޔާގެ ހައިސިއްޔަތުން މާތްالله ގެ މިންވަރުފުޅާއެކު އަޅުގަނޑު ތަންފީޒުކުރާނީ މި ސިޔާސަތު. އަދި ދީނާއި ސިޔާސަތު ވަކިކުރުމުގެ ފިކުރިއްޔާތުގެ އަހުލުވެރީން އެހެން ގޮތަކަށް މިކަން ދުށުމަކުން އަޅުގަނޑުގެ ކުޑަވެސް ފަރުވާލެއް ނެތް.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސުލްޖުމްހޫރިއްޔާ މިފަދައިން ވިދާޅުވެފައިވާއިރު، އެމަނިކުފާނުގެ މިއަދުގެ ރިޔާސީ ބަޔާން ފެއްޓެވީވެސް ދީނީ ގޮތުން ފާއިތުވި އަހަރު ކުރެވުނު ކަންކަމާއި، މި އަހަރު ކުރުމަށް ރޭވިފައިވާ ކަންކަމުގެ ބައެއް ތަފްސީލް ތަކާއެކުގައެވެ.