96،000 އަށްވުރެ ގިނަ ދަރިވަރުންނާއެކު ދިރާސީ އާ އަހަރުގެ ކިޔެވުން ފަށައިފި

ބޮޑު ޗުއްޓީއަށްފަހު ދިރާސީ އާ އަހަރުގެ ކިޔެވުން މިއަދު ހުރިހާ ސްކޫލެއްގައި ފަށައިފިއެވެ.

މި ފެށުނު ދިރާސީ އާ އަހަރުގައި، 96،000 އަށްވުރެ ގިނަ ދަރިވަރުން އެކި ސްކޫލުތަކުގައި ކިޔަވާނެ ކަމަށް އެޑިޔުކޭޝަން މިނިސްޓްރީން މައުލޫމާތު ދެއެވެ. އެއީ، 40،300 އަންހެން ދަރިވަރުންނާއި 42،700 ފިރިހެން ދަރިވަރުންނެވެ.

އޭގެ ތެރެއިން، ސަރުކާރުގެ 217 ސުލޫލެއްގައި 83،000 އެއްހާއިރު  ދަރުވަރުން ތައުލީމު ހާސިލްކުރަމުންދާއިރު، އޭގެ ތެރެއިން 17،000 ދަރިވަރުންނަކީ މާލޭ ސަރަހައްދުގެ ސްކޫލުތަކުގައި ތައުލީމު ހާސިލުކުރަމުން އަންނަ ދަރިވަރުންނެވެ. އަދި، އަމިއްލަ މަދަރުސާތަކުގައި އެލްކޭޖީއިން ފެށިގެން ގުރޭޑް 12 އާ ހަމައަށް 13،000 އަށް ވުރެ ގިނަ ދަރިވަރުން އަންނަނީ ތައުލީމު ހާސިލުކުރަމުންނެވެ. އޭގެ ތެރެއިން ވެސް، 9،000 އެއްހައި ދަރިވަރުން ތައުލީމު ހާސިލުކުރަމުން އަންނަނީ މާލޭ ސަރަހައްދުގައެވެ.

އެޑިޔުކޭޝަން މިނިސްޓްރީން ބުނެފައިވާ ގޮތުން، މި އަހަރު މާލޭ ސަރަހައްދުން އެކަނި ވެސް ގްރޭޑް އެކަކަށް 2،250 ދަރިވަރުން އަލަށް އެންރޯލްކޮށްފައިވެއެވެ. އަދި މާލޭ ސަރަހައްދުގެ ސުކޫލް ތަކުގެ ގްރޭޑް 1 ފިޔަވައި އެހެން ގްރޭޑް ތަކަށް ވަންނަން 2،081 ދަރިވަރުން ވަނީ ހުށަހަޅާފައެވެ.

މީގެ އިތުރުން، އަތޮޅު ތެރޭ ސްކޫލުތަކުން މާލޭ ސަރަހައްދުގެ ސްކޫލުތަކަށް ޖުމުލަ 1،126 ދަރިވަރުން ބަދަލުވެފައިވާއިރު، މާލޭ ސަރަހައްދުގެ އެއް ސްކޫލުން އަނެއް ސްކޫލަށް ވެސް 1،000 އެއްހައި ދަރިވަރުން ބަަދަލުވެފައިވެއެވެ.

އެޑިޔުކޭޝަން މިނިސްޓަރީގެ ތަފާސްހިސާބުތައް ދައްކާގޮތުން މި އަހަރު ފެށުނުއިރު 12،662 މުދައްރިސުން މަސައްކަތްކުރާނެއެވެ. އޭގެ ތެރޭގައި ހިމެނެނީ،

ދިވެހި މުދައްރިސުން - 10،729

ބިދޭސީ މުދައްރިސުން - 1،933

އެޑިޔުކޭޝަން މިނިސްޓަރީން ބުނެފައުވާ ގޮތުން، މި ފެށުނު ދިރާސީ އައު އަހަރުގައި ސަރުކާރުގެ 162 ސްކޫލެއްގައި އެއް ދަންފަޅިއަށް ކިޔަވައިދޭނެއެވެ. އަދި 55 ސްކޫލެއްގައި ކިޔަވައިދޭނީ ދެ ދަންފަޅިއަށް ކިޔަވައިދޭއިރު، ހަ ސްކޫލެއްގައި ސެޓަލައިޓްކޮށް ކިޔަވައިދޭނެ އެވެ. އެއީ، ފެހެންދޫ ސްކޫލު، ފުޅަދޫ ސްކޫލު، ކޮނޑޭ ސްކޫލު، ރަކީދޫ ސްކޫލު، ވ. ތިނަދޫ ސްކޫލު، އަދި އދ. ދިއްދޫ ސްކޫލެވެ.