އައްޑޫ ސިޓީގެ ފެނުގެ ނިޒާމު އަޕްގްރޭޑް ކުރުމުގެ އަމަލީ މަސައްކަތް މި ހަފްތާތެރޭ ފަށަނީ

އައްޑޫ ސިޓީގެ ފެނުގެ ނިޒާމު އަޕްގްރޭޑް ކުރުމުގެ އަމަލީ މަސައްކަތް މި ހަފްތާ ތެރޭ ފެށޭނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ރޭގައި ސަރުކާރު ހިންގާ ކޯލިޝަންގެ މައި ޕާޓީ، ޕީއެންސީ އިން އައްޑޫ ހިތަދޫ ހައި ސްކޫލުގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، އައްޑޫގެ ހުރިހާ ރަށެއްގައި ފެނުގެ ނިޒާމު އަޕްގްރޭޑް ކުރަން ޖެހިފައިވާ ކަމަށާއި އެއީ ގާތްގަނޑަކަށް 282 މިލިއަން ރުފިޔާގެ މަޝްރޫއަކަށް ވާއިރު އެ މަސައްކަތް އެމްޑަބްލިއުއެސްސީއާ ހަވާލުކުރުމަށް ހަމަޖެހިފައިވާ ކަމަށެވެ.

"އަޅުގަނޑަށް ހީވަނީ މާދަމާ، ނޫނީ މި ހަފްތާ ތެރޭގައި ހަވާލުކުރައްވާނެ އަމަލީ މަސައްކަތް ކުރަން އެމްޑަބްލިއުއެސްސީއާ،"

ރައީސް ޑރ.މުޢިއްޒު ވިދާޅުވިއެވެ.

ހަމައެއާއިއެކު، އައްޑޫގެ ބައެއް މަގުތައް ހެދުމަށް އެންމެ އާދައިގެ ސިމެންތި ފަށަލަ އެކަނި އަޅާފައި ހުރުމުގެ ސަބަބުން މަގުތައް ހަލާކުވަމުންދާކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، 100 ކިލޯމީޓަރުގެ ތެރެއިން އެފަދައިން ހުރި 60 ކިލޯމީޓަރުގައި ކޮންސްޓްރަކްޝަން މިނިސްޓްރީއިން އާރްޑީސީއާ ހަވާލުކޮށްގެން ތާރު އަޅައިދެއްވާނެ ކަމަށެވެ.

އައްޑޫ ސިޓީގައި ސަރުކާރުން ކުރިއަށްގެންދާ މަޝްރޫއުތަކަށް ވެސް ރައީސް ޑރ.މުޢިއްޒުގެ ވާހަކަފުުޅުގައި ވަނީ އަލި އަޅުއްވާލައްވާފައެވެ. މިގޮތުން އައްޑޫ ސިޓީގައި ގާއިމު ކުރުމަށް ހަމަޖެހިފައިވާ ބްރިޖާއި ކެތް ލެބާއި އެކި ކަހަލަ ތެރަޕީ ދެވޭ ގޮތަށް އެންމެ މަތީ ފެންވަރުގެ ހޮސްޕިޓަލާއި އައްޑޫ ސިޓީގެ ފަތުރުވެރިކަމުގެ މަޝްރޫއު ވެސް އެމަނިކުފާނު ފާހަގަކުރެއްވިއެވެ.