އާންމުންނަށް އުނދަގޫ ވާގޮތަށް، ޕާކްކޮށްފައި ހުންނަ ސައިކަލްތައް ޓޯކުރަނީ

ހިނގާބިނގާވެ އުޅުމަށާއި، އާންމު ދަތުރުފަތުރުތަކަށް ދަތިވާނެ ގޮތަށް، މާލެސިޓީގެ މަގުތަކުގައި ޕާކްކޮށްފައި ހުންނަ އުޅަނދުތައް ޓޯވ ކުރުމުގެ މަސައްކަތް ފުލުހުން ފަށައިފިއެވެ.

މާލޭގެ މަގުތަކުގައި އުސޫލްތަކާ ހިލާފަށް އުޅަނދުތައް ޕާކްކުރާ މައްސަލައަކީ ވަރަށް ބޮޑު މައްސަލައެކެވެ. ހައްސަ ގޮތެއްގައި ދެފުރޮޅުލީ އުޅަނދުފަހަރު ގަވާއިދާ ހިލާފަށް ޕާކްކުރުން އިތުރުކަމަށް ފުލުހުން ވަނީ ބުނެފައެވެ.

ސޯޝަލް މީޑިއާގައި ފުލުހުން ކުރި ޕޯސްޓުގައި ބުނެފައިވަނީ އުސޫލްތަކަާ ހިލާފަށް މަގުމަތީ ޕާކްކޮށްފައި ހުންނަ ސައިކަލްތައ ްނެގުމުގެ މަސައްކަތް ކުރިއަށްދާކަމަށެވެ. ފުލުހުން ވަނީ، އުޅަނދުތައް ޕާކްކުރާއިރު ކަފިހިހުރަސްތަކާއި، ލައިން ދަމާފައިވާ ސަރަހައްދުތަކާއި، ގޯޅިކަންމަތީގައި ޕާކްކުރުމުގެ ބަދަލުގައި ޕާކްކުރުމަށްޓަކައި ކަނޑައެޅިފައިވާ ޕާކިންގ ޒޯންތަކުގައި ޕާކްކުރުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.

ޕާކިން ޒޯނުން ބޭރުގައި ހުންނަ ސައިކަލްތައް ނެގުމުގެ މަސައްްކަތް ފުލުހުން ފަށާފައިވާއިރު، ފުލުހުން ވަނީ މިދިޔަމަހު މާލޭގެ އެކި ސަރަހައްދުތަކުގައި 4 ފުރޮޅުލީ އުޅަނދުތައް ޕާކްކުރުމަށް ހާއްސަކުރި ޖާގަތަކުގައި ބަހައްޓާފައިހުންނަ ސައިކަލްތައް ޓޯކުރުމުގެ މަސައްކަތް ފަށާފައެވެ.

މާލެ ސަރަހައްދުގައި އެންމެ ބޮޑު މައްސަލައަކީ އެއްގަމު އުޅަނދުފަހަރު ގިނަވުމުގެ މައްސަލައެވެ. އުޅަނދުތައް ގިނަވެ ޕާކްކުރުމުގެ މައްސަލަ މިހާރު ވަނީ އިންތިހާއަށް ބޮޑުވެފައެވެ. މާލެ ސަރަހައްދުގައި ޕާކްކުރާނޭ ޖާގަ ނުލިބުމުން ގިނަ މީހުން އުޅަނދުތައް މިހާރު ޕާކްކުރަނީ ހުޅުމާލޭގެ އެކި ސަރަހައްދުތަކުގައެވެ.