ހައްޖުވެރިންގެ އޮފީހުގެ ވެރިއަކަށް ޝެއިޚް އިމްތިޠާއު، އިސް ޝެއިޚް އަކަށް ޑރ. އިލްޔާސް

1447 ވަނަ އަހަރުގެ ޙައްޖުގެ އަޅުކަމުގައި ރާއްޖޭގެ ފަރާތުން އިސްކޮށް ހަރަކާތްތެރިވާ ބައެއް ފަރާތްތައް އިއުލާން ކޮށްފިއެވެ.

އެގޮތުން އިސްލާމިކް މިނިސްޓްރީން މިއަދު ބުނީ، ޙައްޖު މޫސުމްގައި އެ މިނިސްޓްރީން މައްކާގައި ޤާއިމު ކުރާ ދިވެހި ޙައްޖުވެރިންގެ ކަންކަމާ ބެހޭ އޮފީހުގެ ވެރިޔަކަށް ވަޑައިގަންނަވާނީ މޯލްޑިވްސް ޒަކާތު ހައުސްގެ ޑިރެކްޓަރ ޖެނަރަލް، އައްޝައިޚް އިމްތިޠާއު ޢައްބާސް ކަމަށެވެ.

އަދި ހައްޖު ވެރިންގެ އިސް ޝެއިޚަކަށް ވަޑައިގަންނަވާނީ އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. އިލްޔާސް ޙުސައިން ކަމަށެވެ.

މި އަހަރު ހައްޖުވެރިން މައްކާއަށް ދިޔުމަށް ހަމަޖެހިފައިވަނީ ހަތަރު ދުވަހަކަށް ބަހާލައިގެންނެވެ. ހައްޖުވެރިން ދަތުކުރުމަށް ހަމަޖެހިފައިވަނީ މޯލްޑިވިއަން އާއި ސައުދީ އެއާގައެވެ.

ދިވެހި ހައްޖުވެރިން ފުރުން އަދި އައުން ހަމަޖެހިފައިވާ ދުވަސްތައް

ފުރަތަމަ ގުރޫޕް: ފުރުން 15 މެއި - އެނބުރި ރާއްޖެ އައުން ޖޫން 5 ގައި / ދަތުރުކުރާނީ ސައުދީ އެއާގައި

ދެވަނަ ގުރޫޕް: ފުރުން 17 މެއި - އެނބުރި ރާއްޖެ އައުން ޖޫން 7 ގައި / ދަތުރުކުރާނީ މޯލްޑިވިއަންގައި

ތިންވަނަ ގުރޫޕް: ފުރުން 18 މެއި - އެނބުރި ރާއްޖެ އައުން ޖޫން 8 ގައި / ދަތުރުކުރާނީ ސައުދީ އެއާގައި

ހަތަރު ވަނަ ގުރޫޕް: ފުރުން 19 މެއި - އެނބުރި ރާއްޖެ އައުން ޖޫން 9 ގައި / ދަތުރުކުރާނީ މޯލްޑިވިއަންގައި

ދިވެހި ހައްޖުވެރިން މައްކާގައި ހޭދަކުރުމަށް ހަމަޖެހިފައިވަނީ 21 ދުވަހެވެ.

ކަލަންޑަރުގައި ވާ ގޮތުން މިއަހަރުގެ ހައްޖު ދުވަހަކީ މިމަހުގެ 26 ވަނަ ދުވަހުއެވެ.