އެމްޕީއެލުން މިދިޔަ ހަފްތާގައި އެންމެގިނައިން ކްލިއާ ކޮށްފައިވަނީ ބިހާއި ފިޔާ

މާލޭ ވިޔަފާރި ބަނދަރަށް މިދިޔަ ހަފްތާގައި އެންމެގިނައިން ބާލާފައިވަނީ ކާބޯތަކެތީގެ ގޮތުގައި ބޭނުންކުރާ އަސާސީ މުދަލުގެ ބާވަތްތައްކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.

އެމްޕީއެލުން ބުނީ، ވިޔަފާރި ބަނދަރަށް މިދިޔަ ހަފްތާގައި 1،359 ކޮންޓެއިނަރ ކްލިއަކޮށްފައިވާކަމަށެވެ. އޭގެ ތެރޭގައި އެންމެ ގިނަިއން ހިމެނެނީ ކާބޯތަކެތީގެ އަސާސީ ބާވަތްތަކުގެ ތެރޭގައި ހިމެނޭ، ފިޔާ، ބިސް، އަލުވިފަދަ ބާވަތްތަކެވެ.

އޮގަސްޓް 24 ހުން 30 ގެ ނިޔަލަށް އެންމެ ގިނައިން ކްލިއާ ކުރި ބާވަތްތައް:

- 14،540 ކޭސް ބިން

- 11،617 ބަސްތާ ފިޔާ

- 5،647 ބަސްތާ ކަރާ

- 5.647 ބަސްތާ އަލުވި

- 3،672 ފޮށި ޓޮމާޓޯ

- 1،819 ކޭސް އަލަނާސި

- 2157 ބަސްތާ ކެބެޖު

އެމްޕީއެލުން ބުނީ މި މުއްދަތުގެ ތެރޭގައި 3 ކޮންޓެއިނާ ބޯޓުން މުދާ ބާލާފައިވާއިރު، 3 އާއްމު ކާގޯގެ 3 އުޅަނދަކުން މުދާ ކްލިއާ ކޮށްފައިވާކަމަށެވެ. އެ ބޯޓުތަކުން ޖުމްލަ 1،359 ކޮންޓެއިނާ ވަނީ ކްލިއާ ކޮށްފައެވެ. މީގެ ތެރޭގައި ހިމެނެނީ، 20 ފޫޓުގެ 553 ކޮންޓެއިނާ އާއި 40 ފޫޓުގެ 403 ކޮންޓެއިނާއެވެ.

އެމްޕީއެލުން ދަނީ ބޯޓުތަކުން މުދާ ބޭލުމުގެ އޮޕަރޭޝަން އަވަސްކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އެކުންފުނިން ވަނީ ހުޅުމާލެ ޓާމިނަލްއިން މުދާ ދޫކުރަމުންދާ އުސޫލް މިހާރަށްވުރެ ހަރުދަނާކުރުމުގެ ގޮތުން، އިލެކްޓްރޯނިކް ވެހިކަލް ކިޔުއެއް ގާއިމްކުރުމަށް ނިންމާފައެވެ.

އެމްޕީއެލްއިން ނިންމާފައިވަނީ މިހިނގާ ސެޕްޓެމްބަރުމަހުގެ 21 ވަނަ ދުވަހުން ފެށިގެން މި ކިއު ލައިވްކޮށް، ބޭނުންކުރުމަށެވެ. މިބަދަލާއެކު ހުޅުމާލެ ޓާމިނަލް އިން މުދާ ކްލިއަރ ކުރުން އަވަސްވެ، އާންމުނަށް ދެވޭ ޚިދުމަތަށް އިތުރަށް އަވަސް ވެގެންދާނޭކަމަށް އެމްޕީއެލުން ވަނީ ބުނެފައެވެ.