ގަޑިއަކު 50 މޭލު ބާރުމިނުގައި ވައިޖެހޭނެ ކަމަށް ލަފާކޮށް ރީނދޫ ސަމާލު އަނެއްކާވެސް ދަންމާލައިފި

ގަޑިއަކު 50 މޭލަށް ވައި ގަދަވާނެ ކަމަށް ލަފާކޮށް ރާއްޖޭގެ ބޮޑު ސަރަހައްދަކަށް ނެރެފައިވާ ރީނދޫ ސަމާލުގެ މުއްދަތު އަނެއްކާވެސް އިތުރުކޮށްފިއެވެ.

މޫސުމާ ބެހޭ ގައުމީ އިދާރާ، މެޓް އޮފީހުން ރީނދޫ ސަމާލު ނެރެފައިވަނީ ހއ އަތޮޅުން ފެށިން ތ އަތޮޅަށެވެ. އެ ސަރަހައްދަށް ރީނދޫ ސަމާލު ނެރެފައިވަނީ މެންދުރު 2:00 އިން ފެށިގެން 8:00 އަށެވެ.

މެޓް އޮފީހުން ބުނީ އެ ވަގުތުގައި ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ ކަނޑުތައްވެސް ގަދަވާނެ ކަމަށެވެ.

ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައާއި ގުޅިގެން ހޯމަ ދުވަހުން ފެށިގެން މޫސުން ވަނީ ގޯސްވެފައެވެ.

އެގޮތުން ވައިގަދަވެ ވާރޭ ވެހި އެކި ރަށްތަކުގައި ފެންބޮޑުވުމުގެ މައްސަލަތައް ކުރިމަތިވެ، ރޭ މާލޭގައި އައިޖީއެމްއެޗް ކައިރީ ހުރި ފާރެއްވެސް ވަނީ ވެއްޓިފައެވެ.

މޫސުން ގޯސްވުމާއި ގުޅިގެން ކަމާބެހޭ އިދާރާ ތަކުން އިލްތިމާސްކޮށްފައިވަނީ ކަނޑު ދަތުރުތައް ކުރާއިރު ވަރަށް ބޮޑަށް ސަމާލުވުމަށެވެ. އަދި ކޮންމެހެން ކުރަންޖެހޭ ހާލަތްތަކުގައި ނޫނީ ކަނޑު ދަތުރުތައް ނުކޮށް ފަސްކުރުމަށް ވަނީ އެދިފައެވެ. މީގެ އިތުރުން، އާންމު ރައްޔިތުންނާއި މަސްވެރިންނަށް މޫސުމަށް އަންނަ ބަދަލުތަކަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށްވެސް ވަނީ އިރުޝާދު ދީފައެވެ.