ރައީސް އަޒުލު ކުރުމަށް ފުރުސަތެއް ނުދޭނަން: ޕީޕީއެމް/ޕީއެންސީ ޕީޖީ

ރައީސުލްޖުމްހޫރިއްޔާ ޑރ.މުޙައްމަދު މުއިއްޒު އަޒުލު ކުރުމަށް ފުރުސަތެއް ނުދޭނެ ކަމަށް ޕީޕީއެމް/ޕީއެންސީ ކޯލިޝަންގެ ޕާލަމެންޓްރީ ގްރޫޕް (ޕީޖީ) އިން ބުނެފިއެވެ.

ޕީޕީއެމް/ޕީއެންސީގެ ޕީޖީން މިފަދައިން ބުނީ މިއަދު ކުރިއަށް ދިޔަ އެ ގްރޫޕް ގެ ނޫސްވެރިންގެ ބައްދަލުވުމުގައެވެ. މި ބައްދަލުވުމުގައި ވާހަކަފުޅު ދައްކަވަމުން އޭދަފުށި ދާއިރާގެ މެމްބަރު އަހްމަދު ސަލީމް ވިދާޅުވީ ރައީސް ޑރ.މުއިއްޒު އަޒުލް ކުރުމަށް ފުރުސަތު ނުދެއްވާނެ ކަމަށެވެ.

"އަޅުގަނޑުމެންގެ ފުރާނަ ދުއްވާލާފަ ރައީސް އަޒުލު ކުރަން ޖެހޭނެ ކަމަކަށް އަޅުގަނޑުމެން ފުރުސަތެއް ނުދޭނަން. އެހެން ހީކޮށްގެން ނުވާނެ. ސޮއިކޮށްލާފަ އެހެން ލިޔަކަސް އެ ފުރުސަތެއް އަޅުގަނޑުމެން ނުދޭނަން."

މެމްބަރު ސަލީމް ވިދާޅުވިއެވެ.

މެމްބަރު ސަލީމް ގެ އިތުރުންވެސް ޕީޕީއެމް/ޕީއެންސީގެ ޕީޖީ ގްރޫޕްގައި ހިމެނިވަޑައިގަންނަވާ މަހިބަދޫ ދާއިރާގެ މެމްބަރު އަހްމަދު ތާރިޤު ވިދާޅުވީ އެންމެ ފަހުން ބޭއްވި ރިޔާސީ އިންތިހާބުންވެސް އެމްޑީޕީން ބޭނުންވާގޮތަށް ކަންކަން ނުދާނެކަން އިނގޭ ކަމަށެވެ. އެހެންކަމުން ރައްޔިތުންގެ ނިންމުން ނިންމަމުންދާ މަޖިލީހެއް ނިމެން ދޮޅު މަހަށް ވެފައިވާއިރު، މި ދައުރުގައި ހިމެނޭ ގިނަ ބޭފުޅުން 20 ވަނަ ދައުރަށް ވާދަ ނުކުރައްވަނީ ނުހޮވޭނެކަން އެނގިވަޑައިގަންނަވާތީ ކަމަށް ވެސް ތާރިޤު ވިދާޅުވިއެވެ. އަދި ވާދަ ކުރައްވާ މެމްބަރުންގެ ތެރޭގައި ވެސް ގިނައީ ޕްރައިމަރީގައި އެމްޑީޕީން ނުހޮވޭނެ މެމްބަރުން ކަމަށެވެ. އެހެންކަމުން ނިމެމުންދާ މަޖިލީހަކުން ރައީސް ޑރ.މުއިއޒު އަޒުލް ކުރަން އުޅުނަސް އެކަން ނުވާނެ ކަމަށް ތާރިޤު ވިދާޅުވިއެވެ.

ރައްޔިތުން މަޖިލީހުގައި އެމްޑީޕީ ޕާލަމެންޓްރީ ގްރޫޕައި މިއަދު ވެސް އެބޭފުޅުންގެ ވިޕް ތަކާއި ޚިލާފަށް ބައެއް ވަޒީރުންނަށް ރުހުން ދިނުމުން އުފާ ކުރައްވާ ކަމަށާއި، އެކަމުންވެސް ހާމަވެގެންދަނީ އެމްޑީޕީން ބޭނުންވާހާ ގޮތަކަށް އެމްޑީޕީ ތެރޭގެ ނަންބަރު ތަކެއް ނުލިބޭ ކަން ކަމަށް ތާރިޤު ވިދާޅުވިއެވެ.

މީގެ އިތުރުން ރައްޔިތުންގެ މަޖލީހުގެ ޖުމްލަ މެމްބަރުންގެ އަދަދަކީ 87 ކަމަށްވީ ނަމަވެސް ރައީސް ޑރ.މުއިއްޒު ގެ ސަރުކާރުގެ އިސްމަގާމް ތަކަށް ބައެއް މެމްބަރުން އައްޔަނު ކުރުމާއި ގުޅިގެން މި އަދަދު ދަށްވެފައިވާކަން ފާހަގަކުރައްވާ، ތާރިޤު ވިދާޅުވީ އެމްޑީޕީން ރައީސް އަޒުލު ކުރުމަށް ހުށަހަޅާ ގަރާރުގައި މެމްބަރުންގެ ސޮއި ހަމަވާކަމަށް ބުނަނީ މިހާރު މަޖިލީހުގައި މެމްބަރުން ތިބި އަދަދު ކަމަށް ކަނޑައަޅާފައި ކަމަށްވާނަމަ، މީގެ ކުރިން ރައްޔިތުންގެ މަޖިލީހުން ނިންމާފައި ހުރި ނިންމުން ތަކާއި ޚިލާފު ވާނެ ކަމަށެވެ.

އަދި ގާނޫނު އަސާސީ ގައި ރައީސުލްޖުމްހޫރިއްޔާ އަޒުލް ކުރުމާއި ހިސާބަށް ދާނީ 56 ނުވަތަ 57 މެންބަރުން ވެގެން ކަމަށާއި މި މައްސަލަ ސަރުކާރުގެ ފަރާތުން ސުޕްރީމް ކޯޓަށް ވެސް ހުށައަޅާނެ ކަމަށް އުންމީދު ކުރައްވާ ކަމަށް އެބޭފުޅާ ވިދާޅުވިއެވެ.

އިތުރަށް ތާރިޤު ވިދާޅުވީ ރައީސް އަޒުލު ކުރުމަށް ބޭނުންވާ އަދަދު އެމްޑީޕީ އާއި ދަ ޑިމޮކްރެޓްސް އެއްވިޔަސް ހަމަނުވާނެ ކަމަށާއި އޭގެ ތެރޭގައި ރައީސުލްޖުމްހޫރިއްޔާ އަކު އަޒުލް ކުރާ ޕެޓިޝަން ގައި ސޮއި ނުކުރާނެ އެތައް މެމްބަރުން ތަކެއް އެ ދެ ޕާޓިގައި ތިބޭނެ ކަމަށެވެ.