ޕޯޓަލަށް މައުލޫމާތު އަޕްލޯޑްކުރާއިރު، މައުލޫމާތު ފުރިހަމަނުވުމުގެ މައްސަލަ ބޮޑު: އެފްޑީސީ

ގެދޮރުވެރިޔާ ސްކީމްގެ ދަށުން ދޫކުރުމަށް ނިންމާފައިވާ 4،000 އެޕާޓްމަންޓް އެއްބަސްވުމުގައި ސޮއިކުރަން އަންނައިރު، ޕޯޓަލަށް އަޕްލޯޑްކުރަންޖެހޭ މައުލޫމާތު ފުރިހަމަނުކޮށް ހުށަހަޅާ މައްސަލަ ވަރަށްބޮޑުކަމަށް ފަހިދިރިއުޅުން ކޯޕަރޭޝަން (އެފްޑީސީން) ބުނެފިއެވެ.

ވޮއިސްއާ މައުލޫމާތު ހިއްސާކުރަމުން އެފްޑީސީގެ ޕްރޮޕަޓީ މެނޭޖްމަންޓްގެ ސީނިއާ އޮފިސަރު އާއިޝަތު އިލްމާ ވިދާޅުވީ ޕޯޓަލް މެދުވެރިކޮށް ލިޔެކިޔުންތައް ފޮނުވާފައި ހުންނައިރު އެންމެބޮޑަށް ދިމާވާ އެއް މައްސަލައަކީ ފޮނުވާފައި ހުންނަ އައިޑީކާޑުފަދަ ލިޔުންތައް ސާފްވުމުގެ މައްސަލަ ކަަށެވެ. އޭނާ ވިދާޅުވީ ފޮނުވާ ލިޔުންތައް ސާފުކޮށް ފެންނަން ނުހުންނަނަމަ އެ އެއްޗެހި އެގްރީމަންޓްގައި ހިމަނަން އުނދަގޫވާނޭކަމަށާއި، އެހެންކަމުން ލިޔެކިޔުންތައް ވީހާވެސް ސާފުކޮށް ސްކޭންކުރުމަށްފަހު އަޕްލޯޑްކުރުން މުހިއްމު ކަމަށެވެ.

އެފްޑީސީން އެޕާޓްމަންޓްތައް ލިބޭ ފަރާތްތަކާއެކު ސޮއިކުރުމުގެ މަސައްކަތް ހޯމަދުވަހު ފަށާފައިވާއިރު، ސޮއިކުރުމުގެ ކަންކަން ކުރިއަށްދަނީ ހުޅުމާލޭ ސިންތަޓިކް ޓްރެކްގައެވެ. އެއްބަސްވުންތަކުގައި ސޮއިކުރުމުގެ ކަންކަން މިހާހިސާބަށް އާއިރު ޕޯޓަލަށް ފޮނުވި 1300 އަށްވުރެ ގިނަ ފޯމްގެ ލިޔެކިޔުންތައް ފުރިހަމަ ވުމުގައި މައްސަލަ ހުރިއިރު، އެކަމުގެ ސަބަބުން ދުވާލެއްގެ މައްޗަށް ސޮއިކޮށް ނިންމާލެވެނީ ނިސްބަތުން މަދު ފޯމުތަކެއްކަން އެފްޑީސީން ވަނީ ފާހަގަކޮށްފައެވެ.

އެޕާޓްމަންޓް އެއްބަސްވުންތަކުގައި ސޮއިކުރުމުގެ ކަންކަން ކުރިއަށްގެންދަނީ، ހައުސިން މިނިސްޓްރީން ފޯމުތައް ވެރިފައިކުރުމަށްފަހު ދޭ ތަރުތީބުންނެވެ. ހައުސިން މިނިސްޓްރީން އެމީހެއްގެ ނަން އެފްޑީސީއަށް ފޮނުވުމުން ގެދޮރުވެރިޔާ ޕޯޓަލުން އެ މައުލޫމާތު އަޕްޑޭޓްވިކަމަށް އެމީހެއްގެ ފޯނަށް މެސެޖެއް ފޮނުވާއިރު، އެއްބަސްވުމުގައި ސޮއިކުރަންޖެހޭ ފަރާތްތަކަށް އެކަން އަންގަނީ، އެފްޑީސީގެ "ފަހި ޕޯޓަލަށް ލޮގިންވުމަށް އަންގާ ޓެކްސްޓް މެސެޖަކުންނެވެ.

އެފްޑީސީ ޕޯޓަލަށް އަޕްލޯޑްކުރަންޖެހޭ ލިޔުންތަކުގެ ތެރޭގައި ފްލެޓް ލިބޭމީހުންގެ އައިޑީކާޑާއި، ހެކިވެރިޔާ އައިޑީކާޑްގެ އިތުރުން ބަދަލުގައި ސޮއިކުރަން މީހަކު ފޮނުވާނަމަ އެމީހެއްގެ މައުލޫމާތު ހިމެނެއެވެ.

އެއްބަސްވުމުގައި ސޮއިކުރުމަށް ގެންދަންޖެހޭ ލިޔެކިއުންތައް:

1- ކުއްޔަށްހިފާ ފަރާތުގެ އައިޑީކާޑުގެ ދެފުށް ފެންނަ ސާފު 2 ކޮޕީ

2- ކޯ-އެޕްލިކަންޓުގެ އައިޑީކާޑުގެ ދެފުށް ފެންނަ ސާފު 2 ކޮޕީ

3- ހެކިވެރިޔާގެ އައިޑީކާޑުގެ އަސްލު އަދި 2 ކޮޕީ

4- ޒިންމާއަދާކުރާ ފަރާތުން ސޮއިކޮށްފައިވާ ފޯމުގެ އަސްލު

5- އެހެނިހެން ގުޅުންހުރި ލިޔެކިޔުންތައް

ގެދޮރުވެރިޔާ ސްކީމުން ދޫކުރާ އެޕާޓްމަންޓްތަކުގެ އެއްބަސްވުމުގައި ސޮއިކުރަން ފަށާފައިވާއިރު، މިހާރު ހަމަޖެހިފައިވާގޮތުން އަނބިމީހާ ނުވަތަ ފިރިމީހާއަށް ބިންވެރިޔާ ސްކީމްގެ ދަށުން ގޯތި ލިބިފައި އޮތް ނަމަވެސް، އެޕާޓްމަންޓް ލިބެއެވެ.

އެފްޑީސީއިން ތަރައްޤީކުރަމުންދާ 4000 ސޯޝަލް ހައުސިންގ ޔުނިޓް މަޝްރޫޢުގައި 16 ޓަވަރު ހިމެނޭއިރު، 96 އިންސައްތަ މަސައްކަތް ނިމިފައިވާކަމަށް އެކުންފުނިން ބުނެއެވެ. އެފްޑިސީން ބުނީ އެޕާޓްމަންޓްތައް ހަވާލުކުރުމަށް ހަމަޖެހިފައިވަނީ ފިނިޝިންގ މަސައްކަތްތައް ނިންމާފައިކަމަށެވެ. އަދި އަމާޒަކީ ސެޕްޓެމްބަރުމަހުގެ ނިޔަލަށް ހުރިހާ އެޕާޓްމަންޓްތައް ހަވާލުކޮށް ނިންމާލުންކަމަށްވެސް އެޗްޑީއެފްސީން ބުނެއެވެ.