ރައީސް ސޯލިހު ސަރުކާރަށް؛ ކަމެއް ކޮށްދެންޏާ ފަހި ދިރިއުޅުން ފްލެޓްތަކުގެ ކުލިކުޑަކޮށްދީ

ކަމެއް ކޮށްދެންޏާމު ފަހިދިރިއުޅުން ފްލެޓްތަކުގެ ކުލި ކުޑަކޮށްދިނުމަށް ކުރީގެ ރައީސް އިބްރާހިމް މުހައްމަދު ސޯލިހް ސަރުކާރަށް ގޮވާލައްވައިފިއެވެ.

އެމްޑީޕީން މިރޭ ބޭއްވި ހޭވައްލާ ތައްޔާރު ޖަލްސާގައި ރައީސް ސޯލިހް ވިދާޅުވީ، މި ސަރުކާރު ވެރިކަމަށް އައިސް ކުރެވުނު ކަމަކީ ފަހިދިރިއުޅުން ކޯޕަރޭޝަނުގެ ފްލެޓްތަކުގެ އަގު ބޮޑުކުރުން ކަމަށާއި، ސަރުކާރުން ރައްޔިތުން ގާތު ބޯހިޔާވަހިކަމުގެ ދައްކާއިރު، އެވާހަކަތަކުގައި އިހްލާސްތެރިކަމެއް ނެތްކަމަށެވެ. ހިޔާފްލެޓްތަކުގެ ދައްކަންޖެހޭ އަދަދުން ބައެއް އުނިކުރަން ނިންމިއިރު، މާލީގޮތުން ގާބިލްކަން ހުރިނަމަ ފަހިދިރިއުޅުން ފްލެޓްތަކުގެ ކުލި ކުޑަކޮށްދިނުމަށް ރައީސް ސޯލިހް ވަނީ ސަރުކާރަށް ގޮވާލާފައެވެ.

ސޯލިހް ވިދާޅުވީ މި ސަރުކާރުން ކަންކަން ކުރަމުން އަންނަނީ ސިޔާސީ ވަކި މަގްސަދްތަކެއް ހާސިލް ކުރުމަށް ކަމަށާއި، އެގޮތުން ދައުރުން ދެ އަހަރާއި ބައި ނިމިގެންދިޔައިރު، ރައްޔިތުންނަށް އަޅައިދޭންބުނި 60 ހާސް ފްލެޓްގެ މަސައްކަތް ކުރިއަށްގޮސްފައިނުވާކަމަށެވެ. އެގޮތުން އެމްޑީޕީ ސަރުކާރުން އަޅާފައިހުރި ފްލެޓްތަކުގެ ކުލި ބޮޑުކުރުން ފިޔަވައި އިތުރުކަމެއް ބޯހިޔާވަހިކަން ފޯރުކޮށްދިނުމަށް ނުކުރެވޭކަމަށް ރައީސް ސޯލިހް ވިދާޅުވިއެވެ.

އަޅުގަނޑުމެން އެ ހަތަރުހާސް ފްލެޓް އެޅިއިރުގައި އޭގެ އަގަކަށް ޖެހޭނީ ހަތްދިހަ ފަސްހާސް ޑޮލަރޭ ފްލެޓަކަށް ނުޖެހޭނެ. ހިޔާ ފްލެޓުގެ އެބޭފުޅުންގެ ދައުރުގައި އެޅުވި ފްލެޓްތަކަށް އެ ފްލެޓަކަށް ޖެހޭނެ ނުވަދިހަ ފަސްހާސް ޑޮލަރު. އަޅުގަނޑުމެން ކަނޑައެޅީ ދެ ރޫމުގެ ދެ ކޮޓަރީގެ ފްލެޓެއްގެ ކުއްޔަކީ މަހަކު ހަހާސް ރުފިޔާ ކަމަށް ތިން ކޮޓަރި އަށްހާސް ރުފިޔާ ކަމަށް. އެއީ އަޅުގަނޑުމެން މިދެންނެވިހެން އެ އަޅަން ދިޔަ ހަރަދުތަކަށް ބަލާ ކުރެވޭނެ ކަމެއް ކަމަށް ވާތީ

ރައީސް އިބްރާހިމް މުހައްމަދު ސޯލިހް

ރައީސް ސޯލިހް ވިދާޅުވީ މި ސަރުކާރުން ފައިދާވާ ކުންފުނިތައްވެސް ދަރަނިވެރިކޮށްފި ކަމަށެވެ. އެގޮތުން ސިޔާސީ މަންފާ ހާސިލްކުރުމަށް ކުރަމުންދާ މަސައްކަތުގެ ނަތީޖާއެއްގެ ގޮތުން ދައުލަތަށް އެންމެ ގިނައިން އާމްދަނީ ވައްދައިދޭ ކުންފުނިތައް ކަމަށްވާ އެމްއޭސީއެލް، ބޭންކް އޮފް މޯލްޑިވްސް އަދި އެމްޓީސީސީ ފަދަ ކުންފުނިތައް ދަރަނިވެރިކޮށްފިކަމަށެވެ.

ރައީސް ސޯލިހް ވިދާޅުވީ ރިފަރެންޑަމް ވޯޓަކީ ނުރައްކާތެރި ވޯޓެއް ކަމަށާއި، އެއީ ރައްޔިތުންގެ އަތުގައި އޮންނަ ބާރުތައް ދަމައިގަންނަ ވޯޓެއްކަމަށެވެ. އެގޮތުން ކުއްލިއަކަށް މިފަދަ ކަމެއް ރައްޔިތުންގެ ކުރިމައްޗަށް ގެނެސް ވޯޓަށް އެހުމުގައި ސަރުކާރުގެ ރަނގަޅު ނިޔަތެއް ނެތްކަމަށް ރައީސް ސޯލިހް ވިދާޅުވިއެވެ.