މަލީޝާ ހައްޖު ގުރޫޕުގެ ވެރިޔާ އަށް އަހަރަށް ޖަލަށް
ހައްޖަށް ގެންގޮސްދޭނެ ކަމަސް ބުނެ އޮޅުވާލައިގެން ގިނަ ބައެއްގެ އަތުން ފައިސާ ނެގި މައްސަލައިގައި މަލީޝާ ހައްޖު އެންޑް އުމްރާ ގުރޫޕުގެ ވެރިޔާ އިސްމާއީލް އަބްދުއްލަތީފު ގެ މައްޗަށް ކުށް ސާބިތުވެ، އަށް އަހަރަށް ޖަލަށް ލުމަށް ކުރިމިނަލް ކޯޓުން ހުކުމްކޮށްފިއެވެ.
ދައުލަތުން އިސްމާއީލް އަބްދުއްލަތީފްގެ މައްޗަށް ކުރި ދައުވާގައި ބުނެފައި ވަނީ 1433 ވަނަ އަހަރު ހައްޖަށް ގެންގޮސްދޭނެ ކަމަށް ބުނެ ގިނަ ބައެއްގެ އަތުން 8.6 މިލިއަން ރުފިޔާ ނެގުމަށް ފަހު އިސްމާއީލް އަބްދުއްލަތީފް އެ ފައިސާ އަށް ހިޔާނާތްތެރިވެފައިވާ ކަމަށެވެ. އެ ދައުވާ ކޮށްފައިވަނީ 92 މީހަކު ތަހުގީގަށް ދީފައިވާ ބަޔާންތަކެއްގެ މައްޗަށް ބިނާކޮށް ކަމަށްވެސް އެ ދައުވާގައި ބުނެފައި ވެއެވެ.
ކުރިމިނަލް ކޯޓުގައި ކުރިއަށްދިޔަ ޝަރީއަތުގައި ދައުވާއަށް އިންކާރު ކުރިނަމަވެސް، ފައިސާ ދެއްކި އެންމެންވެސް ބުނެފައިވަނީ އެޖަމާއަތަށް ފައިސާ ދެއްކުމުން ފައިސާ ލިބުނުކަމުގެ ލިޔުންވެސް އެފަރާތްތަކާ ހަވާލުކޮށްފައިވާ ކަމަށެވެ. އިސްމާއީލު ބުނެފައިވަނީ ހައްޖަށް ގެންދަން ފައިސާ ނެގި ކަމަށާއި ނަމަވެސް އެކަން ކުރީ ނުބައި އެއްވެސް ނިޔަތެއް އޮވެގެން ނޫން ކަމަށެވެ.
ކްރިމިނަލް ކޯޓުން މިއަދު ކުރި ހުކުމުގައި ބުނެފައިވަނީ، ހައްޖަށް ގެންދަން ފައިސާ ނެގިކަން ދެފަރާތުގެ ބަހުންވެސް އެނގެން އޮތް ކަމަށެވެ. އަދި ފައިސާ ނެގުމަސްފަހު ހައްޖަށް ގެންގޮސްދީފައި ނުވާކަން ވެސް ދެފަރާތުގެ ބަހުން އެނގޭ ކަމަށެވެ. އެހެންކަމުން އިސްމާއީލުގެ އެ އަމަލަކީ ހިޔާނާތްތެރިވުމުގެ އަމަލެއް ކަމަށް ހުކުމުގައި ވެއެވެ. އެ ކުށް އިސްމާއީލުގެ މައްޗަށް ސާބިތުވެފައިވާތީ ކުށުގެ އުގޫބާތެއްގެ ގޮތުން އަށް އަހަރަށް ޖަލަށްލުމަށް ކުރިމިނަލް ކޯޓުގެ ހުކުމުގައި ވެއެވެ.
މަލީޝާ ގްރޫޕުން ހައްޖަށް ގެންގޮސްދޭނެ ކަމަށް ބުނެ ފައިސާ ނެގި ނަމަވެސް އެއްވެސް މީހަކު ހައްޖަށް ގެންގޮސްދީފައެއް ނުވެއެވެ. ނަމަވެސް ސަރުކާރުން ވަނީ އެމީހުން ހައްޖަށް ގެންގޮސްދީފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
