ކުރިއަށްއޮތް ތަނުގައި ޑީއާރްޕީ ފެންނާނީ ވަރަށް އެކްޓިވްކޮށް: ޖާބިރު

ކުރިއަށްއޮތް ތަނުގައި ޑީއާރްޕީގެ ހަރަކާތްތައް ފެންނާނީ ވަރަށް ހަރުދަނާކޮށް ކަމަށް އެޕާޓީއާއި މިރޭ ގުުޅުނު ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.

ޑީއާރްޕީގެ ލީޑަރު މިހެން ވިދާޅުވީ ރާއްޖޭގެ ނޫހެއްކަމުގައިވާ "އައްޑޫލައިވް"އަށް ދެއްވި ބަސްދީގަތުމެއްގައެވެ.

ޖާބިރު ވިދާޅުވީ ޑީއާރްޕީގެ ހިންގުން ހަރުދަނާާކުރުމަށް ގިނަ މަސައްކަތްތަކެއް ކުރަމުން އަންނަ ކަމަށާއި މީގެ ފަހުން އެޕާޓީ ފެންނާނީ ވަރަށް އެކްޓިވްކޮށް ކަމަށެވެ. އެގޮތުން އެޕާޓީގެ ރެޖިސްޓްރަރއެއްގެ މަގާމަށް މާފަންނު ދެކުނު ދާއިރާގެ ކުރީގެ މެންބަރު އަބްދުﷲ ރިފާއު (ބޮޗޭ) ހަމަޖައްސަވާފައިވާކަން ޖާބިރު ފާހަގަކުރެއްވިއެވެ.

ބޮޗޭ އަކީ މިރޭ ޖާބިރާއި އެއްކޮށް ޑީއާރްޕީއަށް ސޮއިކުރެއްވި ފަރާތެކެވެ.

އެބޭފުޅާ އިތުރަށް ވިދާޅުވީ ޑީއާރްޕީއަކީ ރާއްޖޭގެ އެންމެ މެންބަރުން ގިނަ ޕާޓީއަކަށް ހެދުމަށް އަމާޒުކުރައްވާ ކަމަށާއި، އެޕާޓީން 2023ވަނަ އަހަރު ރާއްޖޭގެ ވެރިކަމަށް އަންނަންވެސް ބޭނުންފުޅުވާ ކަމަށް ޖާބިރު ވިދާޅުވިއެވެ.

ޖާބިރު ވަނީ ޑީއާރްޕީން ހަރަކާތްތެރި ވާނީ އިދިކޮޅު ސިޔާސީ ޕާޓީއެއްގެ ގޮތުގައި ކަމަށް ވިދާޅުވެފައެވެ.