ޤައުމީ ފެންކުންފުނިން 400 މިލިއަން ރުފިޔާގެ ބޮންޑެއް ވިއްކަން ހުޅުވާލައިފި

މާލެ ވޯޓާ އެންޑް ސްވެރެޖް ކޮމްޕެނީ (އެމްޑަބްލިޔުއެސްސީ) ޤައުމީ ފެން ކުންފުނިން 400 މިލިއަން ރުފިޔާގެ ބޮންޑެއް ވިއްކުމަށް ހުޅުވާލައިފިއެވެ.

އެމްޑަބްލިއުއެސްސީގެ މި ބޮންޑް ކެޕިޓަލް މާކެޓުގައި ވިއްކަނީ ރާއްޖޭގެ ކުންފުންޏެއް ކަމަށްވާ ފަސްޓް ނޭޝަނަލް ފައިނޭންސް ކޯޕަރޭޝަނުންނެވެ. އެކުންފުނީގައި އެންމެ އިސްކޮށް ހުންނަވާ އެއް ބޭފުޅަކީ ކުރީގެ އޮޑިޓަރ ޖެނެރަލް ހަސަން ޒިޔަތުއެވެ. ފަސްޓް ނޭޝަނަލް ކުންފުނިން ބުނީ، ޤައުމީ ފެންކުންފުނީގެ 400 މިލިއަން ރުފިޔާގެ މި ބޮންޑް ވިއްކުމަށް ނިންމާފައިވަނީ ދެ މަރުހަލާއަކަށް ބަހާލައިގެން ކަމަށެވެ.

އޭގެ ތެރެއިން އެންމެ ފުރަތަމަ ހުޅުވާލާފައިވަނީ 200 މިލިއަން ރުފިޔާގެ ބޮންޑްގައި އިންވެސްޓްކުރުމަށެވެ. ބޮންޑް ވިއްކުމުގެ ފުރުސަތު ވިނަވި ޕޯޓަލްގައި ހުޅުވާލާފައިވާއިރު، މި ބޮންޑުގައި އިންވެސްޓްކުރާ ފަރާތްތަކަށް ފަސް އަހަރުދުވަހުގެ ތެރޭގައި އަހަރަކު 7.5 އިންޓްރެސްޓްރޭޓުގެ ނަފާއެއް ލިބޭނޭކަމަށް ފަސްޓް ނޭޝަނަލް ކުންފުނިން ބުނެއެވެ.

ޤައުމީ ފެންކުންފުނިން މި ބިންޑް އިޝޫކުރުމުގެ މަގްސަދަކީ އެކުންފުނި ތަރައްޤީކުރުމަށް ބޭނުންވާ ފައިސާ ހޯދުމެވެ. އެ ފައިސާ ބޭނުންކުރުމަށް ހަމަޖެހިފައިވަނީ ރަށްރަށުގައި ކުރިއަށްގެންދާ ފެނާއި ނަރުދަމާ ނިޒާމުގެ މަސައްކަތްތަކުގެ އިތުރުން ކުންފުނީގެ ވިޔަފާރި ކުރިއަށްގެންދިއުމަށް ބޭނުންވާ އެކިއެކި ކަންކަމަށެވެ.

އެމްޑަބްލިއުއެސްސީއަކީ ދިވެހި ސަރުކާރުގެ 80 އިންސައްތަ ހިއްސާ އަދި ޖަޕާނުގެ ހިޓާޗީ ކުންފުނީގެ 20 އިންސައްތަ ހިއްސާވާ ކުންފުންޏެކެވެ. އެމްޑަބްލިއުއެސްސީ ވުޖޫދަށް އައިސްފައިވަބީ 1995 ވަނަ އަހަރެވެ.