ޖިނާޢީ ކުށުގެ ޒިންމާ އުފުލަން ޖެހޭ ޢުމުރު 12 އަހަރަށް ދަށްކުރުމަށް ނިންމަވައިފި

ޖިނާޢީ ކުށުގެ ޒިންމާ އުފުލަން ޖެހޭ ޢުމުރު 15 އަހަރުން، 12 އަހަރަށް ދަށްކުރުމަށް ސަރުކާރުން ނިންމަވައިފިއެވެ.

މިކަން ހާމަކުރައްވާފައިވަނީ ކުޑަކުދިން ގަނާއިން ރައްކާތެރިކުރުމަށް މަސައްކަތްކުރަން އެކުލަވާލައިފައިވާ ޓާސްކްފޯހުން އިސްކަންދަރު ކޮށީގައި ބޭއްވެވި ނޫސްވެރިންގެ ބައްދަލުވުމުގައި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާނެވެ.

ވަޒީރު ވިދާޅުވީ ކުށުގެ ވެށީގައި، އެޓް ރިސްކުގައި 200 އެއްހާ ކުދިން ތިބިކަމަށެވެ. އަދި އޭގެ ތެރޭގައި ގިނައީ 12 އަހަރާއި 13 އަހަރާ ދެމެދުގެ ކުދިން ކަމަށްވާއިރު، އެކުދިން ކުރާ ކުށަށް ޖިނާއީ އަދަބެއް ނުދެވޭ ކަމީ ކުށުގެ ވެއްޓަށް ހުށަހެޅޭ ކުދިންނާ މެދު ފިޔަވަޅު އެޅުމަށް އޮތް އެންމެ ބޮޑު ގޮންޖެހުން ކަމަށެވެ. ދުނިޔޭގެ އެކި ޤައުމުތަކުގައި ޖިނާއީ ކުށުގެ ޒިންމާ އުފުލަން ޖެހޭ ޢުމުރު ތަފާތުވާއިރު، ކުރެވުނު ދިރާސާތަކަށް ބަލާ، ދިވެހި ރާއްޖެއަށް އެންމެ އެކަށޭނަ ޢުމުރަކީ 12 އަހަރު ކަމަށް ޤަބޫލުފުޅު ކުރައްވާ ކަމަށްވެސް ވަޒީރު ވިދާޅުވިއެވެ.

2019 ވަނަ އަހަރު ފާސްކޮށް، 2020 ވަނަ އަހަރު ޢަމަލުކުރަން ފަށާފައިވާ ކުޑަކުދިންގެ އަދުލުގެ ޤާނޫނުގެ ދަށުން ޖިނާޢީ ކުށުގެ ޒިންމާ ނަގަން ޖެހޭ އުމުރަކީ 15 އަހަރެވެ.

"އަޅުގަނޑުމެންނަށް ފުލުހުންގެ ރެކޯޑުތަކުން އަދި ޖުވެނައިލް ޖަސްޓިސް ޑިޕާޓްމަންޓުގެ ރެކޯޑުތަކުން ދައްކާގޮތުގައި ރާއްޖޭގައި މިވަގުތު 12 އަހަރާއި 13 އަހަރާ ދެމެދުގެ އެތައް ކުދިންނެއް މިފަދަ މާހައުލުގައި އެޓްރިސްކުގައި އެބަތިބި. މިހާރު މިއޮތް ޤާނޫނުގައި މިބުނާ 15 އަހަރުގައި ޒިންމާ އަދާކުރަންޖެހޭ އުމުރަކަށް މިއިން ކުއްޖަކު ނުފެތޭ."

ދާޚިލީ ސަލާމަތާ ބެހޭ ވަޒީރު އަލީ އިޙްސާން ވިދާޅުވިއެވެ.

ވަޒީރު އިތުރަށް ވިދާޅުވީ، ޤާނޫނަށް ގެންނަން ޖެހޭ މުހިންމު ބަދަލުތައް އެޓަރނީ ޖެނެރަލްގެ އޮފީހަށް ފޮނުވުމަށް ވަނީ ތައްޔާރު ކުރެވިފައި ކަމަށެވެ.

އީދު ބަންދު ނިންމާފައި، ހަފްތާއެއް ތެރޭ ގާނޫނަށް ގެންނަން ޖެހޭ މުހިންމު އިސްލާހުތައް ޑްރާފްޓު ކުރުމަށް ފަހު މަޖިލީހަށް ހުށައަޅާނެ ކަމަށް ނޫސްވެރިންގެ ބައްދަލުވުމުގައި ބަންޑާރަ ނައިބު އަލްއުސްތާޛު އަހުމަދު އުޝާމް ވިދާޅުވިއެވެ.

ބައްދަލުވުމުގައި ވަޒީރު ޑރ. ޝިފާއު ވިދާޅުވެފައި ވަނީ، އެކަށީގެންވާ ވަރަށް މަސައްކަތް ކުރެވިއްޖެ ނަމަ، ދިވެހިރާއްޖޭގައި ހަނގާކުރުމުގެ މައްސަލަ ހައްލުކުރެވޭނެ ކަމަށެވެ.