ރާއްޖެއަށް ޒިޔާރަތްކުރާ ފަތުރުވެރިންނަށް ޕްރީ އެޕްރޫވްޑް ވިސާ ދޫކުރުމަށް ގޮވާލާ ގަރާރެއް

ދިވެހިރާއްޖެއަށް ޒިޔާރަތްކުރާ ފަތުރުވެރިންނަށް ޕްރީ އެޕްރޫވްޑް ވިސާ އޮންއަރައިވަލް / އިލެކްޓްރޯނިކް ޓްރެވެލް އޮތޮރައިޒޭޝަންގެ ޚިދުމަތް ތަޢާރަފް ކުރުމަށް ގޮވާލާ ގަރާރެއް މަޖިލީހަށް ހުށަހަޅައިފިއެވެ.

މިހާރު ކުރިއަށްދާ 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި މި ގަރާރު މަޖިލީހަށް ހުށްހެޅުއްވީ މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމެވެ.

މި ގަރާރު ހުށަހަޅުއްވާފައިވަނީ ރާއްޖެ ޒިޔާރަތްކުރާ ފަތުރުވެރިންނަށް ފަސޭހަކަމާއި ރާއްޖެ އެތެރެވުމުގެ އިންތިޒާމް ހަމަޖައްސައިދިނުމަށް ކަމަށް ހައިތަމް ވިދާޅުވިއެވެ.

ގަރާރު ހުށަހަޅުއްވަމުން ހައިތަމް ވިދާޅުވީ ވޭތުވެދިޔަ ފަސް އަހަރުގައި ރާއްޖެއަށް 9.5 މިލިއަނަށްވުރެ ގިނަ މީހުން ރާއްޖެ ޒިޔާރަތް ކޮށްފައިވާ ކަމަށާ، އަދި މި އަހަރުތެރޭގައިވެސް 2 މިލިއަން ފަތުރުވެރިން ޒިޔާރަތް ކުރާނެ ކަމަށް ސަރުކާރުން ލަފާ ކޮށްފައިވާ ކަމަށެވެ. އެހެން ކަމުން ރާއްޖެ ޒިޔާރަތްކިރާ ފަރާތްތަކަށް ފަސޭހަކަމާއެކު ވިސާ ލިބޭނެ މަގުފަހިކޮށްދިނުމަކީ ކޮންމެހެން ބޭނުންތެރި ކަމެއް ކަމަށް އޭނާ ވިދާޅުވިއެވެ.

މިވަގުތު ރާއްޖެއަށް ޒިޔާރަތްކުރާ ފަތުރުވެރިންނަށް ވިސާ ލިބެން އޮތް ހަމައެކަނި ގޮތަކީ އޮން އަރައިވަލް ވިސާ ކަން ފާހަގަ ކުރައްވައި ހައިތަމް ވަނީ އެ ގޮތަށް ވިސާ ހޯދުމުގައި މިހާރުވެސް ދަތިތަކާއި ކުރިމަތިލާންޖެހޭ ކަމަށް ވިދާޅުވެފައެވެ.

ތަފާސްހިސާބުތަކުން ދައްކާ ގޮތުގައި، ވޭތުވެދިޔަ ފަސް އަހަރު 9940 މީހުން ވަނީ އެކި ސަބަބުތަކާއިހުރެ އިމިގްރޭޝަނުން ރާއްޖެ އެތެރެވުމަށްދޭ ހުއްދަ، ވިސާ ނުލިބިގެން އަނބުރާ ފޮނުވާލެވިފައި.

އެފަދައިން ކަން ދިމާވުމުން އެ ފަރާތްތަކަށް ބޮޑެތި ގެއްލުންތައްވާ ކަމަށާ، އެހެންކަމުން އެ މައްސަލަ ހައްލުކުރުމަށް ޕްރީ އެޕްރޫވްޑް ވިސާ އޮންއަރައިވަލް / އިލެކްޓްރޯނިކް ޓްރެވެލް އޮތޮރައިޒޭޝަންގެ ޚިދުމަތް ތަޢާރަފް ކުރުމަކީ މުހިންމު ކަމެއް ކަމަށް ހައިތަމް ވިދާޅުވިއެވެ.