ޢާރިފްގެ މަރާއެކު އަކްރަމްގެ މެެސެޖެއް: ޖެހިގެން އޮތީ ތިބާކަމަށްވެސް ވެދާނެ، الله ބިރުވެތިވެ ފާފަތަކާ ދުރުވެ ތައުބާވޭ!

ގައުމީ ފުޓްބޯޅަ ޓީމުގެ ކުރީގެ ކުޅުންތެރިޔާ މުހައްމަދު އާރިފް (ބަކާ) ނިޔާވުމާ ގުޅިގެން ގައުމީ ޓީމުގެ ކުރީގެ ކެޕްޓަން އަކްރަމް އަބްދުލްޣަނީ ދިވެހީންނަށް ވަރުގަދަ މެސެޖެއް ދީފި އެވެ.

ހައްޖުގެ އަޅުކަމަށް ފަހު މީގެ ދެތީން ދުވަސް ކުރީން ރާއްޖެ އައި ފަހުން ވަރަށް ބޮޑަށް ހުން ގަދަވެ، ގައިގެ ވަރު ނެތި ހާލު ދެރަވެ ބަކާއަށް އޭޑީކޭ ގައި އެޑްމިޓްކޮށް ފަރުވާ ދޭން ފަށާފައި ވަނިކޮށް، ހޯމަ ދުވަހުގެ ރޭގެ ވަގުތެއް ގައި ހާލު ވަރަށް ދެރަވެ އައިސީޔޫ ގައި ވަނީ ފަރުވާ ދީފައެވެ. އެފަހުން ވެންޓިލޭޓަރަށްވެސް ލާފައި ވާއިރު އިއްޔެ އިރުއޮއްސެން ކައިރިވެފައި ވަނިކޮށް ބަކާ، ވަނީ ނިޔާވި އެވެ.

އެއާއެކު ބަކާއާ އެކުގައި ގިނަ މެޗުތަކެެއް ގައުމީ ޓީމުގައި ކުޅެދިން އަކުރަމް  ވަނީ އިބްރަތުން ފުރިގެންވާ މެސެޖެއް ފޭސްބުކް މެދުވެރިކޮށް ހިއްސާކުރައްވާފައެވެ.

އަޚުންނޭ ބިރުވެތިވޭ! ވަކިވެގެން އެދިޔައީ އަޅުގަނޑުމެންގެ ގާތް އަޚެކެވެ. ގަދަފަދަ ޙާލުގައި ދުނިޔޭގައި ދިރިއުޅެމުންދިޔަ ހެޔޮލަފާ އަޅެކެވެ. ޖެހިގެން އޮތީ އަޅުގަނޑު ނޫނީ ތިބާގެ ނަންބަރު ކަމައްވެސް ވެދާނެއެވެ. އެއްކައުވަންތަ اللهއަށް ތަޢުބާ ވާށެވެ. ހެޔޮ ޢަމަލު ކުރުން ގިނަކުރާށެވެ. ފާފަ ތަކުން ދުރުވެ ރައްކާތެރި ވާށެވެ. ސުވަރުގެ މިންވަރުކުރެއްވުން އެދި الله އަށް ދުޢާ ކުރާށެވެ.

އަކްރަމް އަބްދުލް ޣަނީ

މިއާއެކު އަކްރަމް ވަނީ މުޙައްމަދު އާރިފް އަށް ސުވަރުގޭގެ މަތިވެރި ނިޢުމަތް މިންވަރު ކުރެއްވުން އެދި ދުޢާކޮށްފައެވެ. ބަކާ ނިޔާވުނާއި ގުޅިގެން މުޅި ރާއްޖެ އަންނަނީ އެކަމާއި ހިތާމަ ފާޅުކުރަމުންނެވެ.

ބަކާގެ ޖަނާޒާ އޮތީ މިއަދުގެ ފަތިސް ނަމާދަށްފަހު އެވެ.