ހިލޭ ހައްޖު ފުރުސަތު ލިބޭނީ ފަގީރުންނަށް، އޮޅުވާލިކަން ސާބިތުވެއްޖެނަމަ ޖާގަ އަތުލާނެ: މިނިސްޓަރު

ސަރުކާރުގެ ޚަރަދުގައި ހައްޖަށް ދާން ފަޤީރުންގެ ދަފްތަރުން ހޮވޭ މީހުން ޙައްޖަށް ފޮނުވާނީ އިތުރަށް އެމީހުންގެ ޙާލަތު ބަލާފައި ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ސަރުކާރުގެ ހަރަދުގައި މިއަހަރު ހިލޭ ހައްޖަށް ފޮނުވުމަށް ހަމަޖެހިފައިވާ 50 މީހުން ކަނޑައެޅުމަށް ގުރުއަތުލުން ވަނީ ބާއްވާފަ އެވެ. އެއްވެސް ސަބަބަކާހުރެ ހައްޖު ދަތުރުގައި ބައިވެރިނުވެވޭ ހާލަތެއް ގުރުއަތުން ހޮވުނު މީހަކަށް މެދުވެރިވެއްޖެނަމަ، އެމީހުންގެ ބަދަލުގައި ފޮނުވާނެ 10 މީހުން ވެސް ވަނީ ގުރުއަތުން ހޮވާފަ އެވެ.

އެ މީހުންގެ ލިސްޓް ވެސް ވަނީ ނެރެފަ އެވެ. އެ ލިސްޓްގައި ފަގީރުންގެ ގޮތުގައި ނުބެލެވޭނެ މީހުން ތިބި ކަމަށް ބުނެ ބައެއް މީހުން ދަނީ ކަންބޮޑުވުން ފާޅުކުރަމުންނެވެ.

ހާއްސަކޮށް ތ އަތޮޅުގެ ރަށަކަށް ނިސްބަތްވާ ދެމަފިރިއަކަށް ހައްޖު ފުުރުސަތު ދީފައިވާ ކަމަށް ބުނެ އެ ރަށުގެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެއީ ތަނަވަސްކަން ހުރި އަދި އެ މީހުންގެ ދަރީން ރަނގަޅު ވަޒީފާގައި ތިބި މީހުން ކަމަށް ވެ އެވެ.

މިނިސްޓަރު ޝަހީމް މިއަދު ވިދާޅުވީ ހައްޖަަށް ފޮނުވާނެ މީހުން ކަނޑައެޅި ނަމަވެސް އެ މީހުން ފޮނުވާނީ ފަޤީރުންގެ ޝަރުޠަށް ފެތޭކަން ކަށަވަރުކޮށްފައި ކަމަށެވެ.

“މިގޮތުން އެއާ ޚިލާފަށް އޮޅުވާލައިގެން މައުލޫމާތު ދީގެން ދަފްތަރުގައި ޖެހިފައިވާ ކަން ސާބިތު ވެއްޖެ ނަމަ ހައްޖުގެ ފުރުޞަތު ގެއްލޭނެ،” ޝަހީމް ވިދާޅުވި އެވެ.

އިސްލާމިކް މިނިސްޓްރީން ބުނީ ހައްޖަށް ގެންދަން މީހުން ހޮވީ ފަޤީރުންގެ ދަފްތަރުގައި ހިމެނޭ މީހުންގެ ތެރެއިން ހިލޭ ހައްޖަށް މީހުން ފޮނުވުމާއި ގުޅޭ އުސޫލުގެ ދަށުން ޝަރުތުހަމަވާ 302 މީހުންގެ މެދުގައި ކަމަށެވެ.

ދައުލަތުގެ ހަރަދުގައި ހައްޖަށް ދާނެ މީހުން ކަނޑައެޅުމަށް ގުރުއަތު ނަގާފައިވަނީ ޒަކާތު ހައުސްގެ ފަގީރުންގެ ދަފްތަރަށް ބަލައިގެންނެވެ. މި ދަފްތަރަކީ 2024 ވަނަ އަހަރުގެ ޑިސެމްބަރު މަހުގެ ތެރޭގައި ޒަކާތު ހައުސްއިން ރިވިއުކޮށްފައިވާ ދަފްތަރެއް ކަމަށް މިނިސްޓްރީން ބުނެ އެވެ.

ޒަކާތް ހޯދުމަށާއި ފަގީރުންނަށް އޮންނަ ފުރުސަތުތައް ހޯދަން ބައެއް މީހުން އޮޅުވާލައިގެން ފަގީރުންގެ ލިސްޓްގައި ޖެހެ އެވެ. މިދިޔަ އަހަރު ވެސް އެފަދަ މައްސަލަތަކެއް ފާހަގަ ކުރެވުނެވެ.