ޑޮލަރު ލިމިޓް އިތުރުކުރީ އޮޅުވާލައިގެން ރައްޔިތުން އަތުން އިތުރަށް ފައިސާ ނަގަން: ޝާހިދު

ބޭންކް އޮފް މޯލްޑިވްސްގެ ދިވެހި ރުފިޔާ ކާޑަށް ޑޮލަރު ނެގޭ ލިމިޓް 500 އަށް އިތުރުކުރީ އޮޅުވާލައިގެން ރައްޔިތުން އަތުން އިތުރަށް ފައިސާނަގަން ކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

ޤައުމީ ބޭންކުން މިއަދު ވަނީ ދިވެހި ރުފިޔާގެ އެކައުންޓްތަކަށް ދޫކޮށްފައި ހުންނަ ޑެބިޓް ކާޑުތަކުން ޑޮލަރުން މުއާމަލާތް ކުރެވޭ އަދަދު 500 ޑޮލަރަށް އިތުރުކޮށްފައެވެ. މިކަމާ ގުޅިގެން ސޯޝަލް މީޑިއާގައި ޝާހިދު ވިދާޅުވީ، ބީއެމްއެލްގެ ބޭރު ފައިސާގެ ކާޑު ލިމިޓް 500 ޑޮލަރަށް އިތުރުކުރުމަކީ ރައްޔިތުންނަށް ލިބުނު ލުޔެއް ނޫންކަމަށާއި، އެއީ ރައްޔިތުންގެ އަތުން އިތުރަށް ފައިސާ ނެގުމަށް ރޭވިފައިވާ މަކަރުވެރި ރޭވުމެއް ކަމަށެވެ.

ދިވެހިން އާއްމުކޮށް ބޭނުންކުރާ އޮންލައިން ވިޔަފާރި ސައިޓްތަކުން ކުރާ މުއާމަލާތްތަކަށް ފީއެއް ނެގުމަށް ނިންމުމަ ގުޅިގެން ޝާހިދު ވަނީ އެކަމަށްވެސް ފާޑުވިދާޅުވެފައެވެ. ޝާހިދު ވިދާޅުވީ އީ-ކޮމާސްއަށް ރުފިޔާ ޑެބިޓް ކާޑުން ކުރާ މުޢާމަލާތްތަކަށް އައު %30 ފީއެއް ނެގުމުގެ ސަބަބުން މުދާ އޮންލައިންކޮށް ގަންނައިރު ޑޮލަރު ރޭޓު ހަޤީގަތުގައި ބްލެކް މާކެޓަށްވުރެ ބޮޑުވާކަމަށެވެ. މިއީ ހަމައެކަނި ބޭރު ފައިސާގެ މައްސަލައެއް ނޫންކަން ފާހަގަކުރައްވަމުން ޝާހިދު ވިދާޅުވީ މިއީ ސަރުކާރުން ބޭރުގެ ފައިނޭންސިންގ ހޯދުމާއި ރިޒާވް ޒިންމާދާރުކަމާއެކު މެނޭޖްކުރުމުގައި ފެއިލްވުމުގެ ސަބަބުން އުފެދުނު ފައިސާގެ ދަތިކަމުން ބީއެމްއެލްއިން ފައިދާ ނެގުންކަމަށެވެ.

" މިއީ އިސްލާހުގެ ބަދަލުގައި، އާންމު ދިވެހި ޢާއިލާތަކުގެ މައްޗަށް އިޤްތިޞާދީ ބުރަ ބަދަލުވެ، ހަމަހަމަކަން ގެއްލި، ދުނިޔޭގެ މުދަލަށް ވާސިލުވުމުގެ ފުރުސަތު ހަނިވެ، އަދި ދިރިއުޅުމުގެ ޚަރަދުގެ ހާލަތު އިތުރަށް ގޯސްވުވަށް ހުޅުވުނު ދޮރެއް." ޝާހިދުގެ ޕޯސްޓްގައި ވިދާޅުވިއެވެ.

ކުރީގެ ހާރިޖީ ވަޒީރުކަންވެސް ކުރެއްވި ޝާހިދު ވިދާޅުވީ ބޭންކުން ނިންމި މި ސިޔާސަތުން ބޭރުފައިސާ މައްސަލަ ހައްލެއް ނުވާކަމަށާއި އާންމު ރައްޔިތުމީހާއަށްވީ ގެއްލުންކަމަށެވެ.

ބީއެމްއެލުން ރުފިޔާ އެކައުންޓްތަކަށް ދޫކޮށްފައިވާ ޑެބިޓް ކާޑުގެ ޑޮލަރު ލިމިޓް އިތުރުކޮށްފައިވާއިރު، އެ ބޭންކުން ބުނީ އީކޮމާސް 6 ސައިޓެއް ފިޔަވައި އެހެން ހުރިހާ ސައިޓްތަކަކުން އެއްވެސް ޗާޖެއްނެތި ވިޔަފާރިކުރެވޭނޭަކަމަށެވެ. ރުފިޔާ އެކަންޓުތަކުގެ ޑެބިޓް ކާޑުތަކުން އޮންލައިނުކޮށް ޓިކެޓް ގަތުމާއި ސަބްސްކްރިޕްޝަން ފީތައްފަދަ އާއްމު މުއާމަލާތްތައް އެއްވެސް ޗާޖެއްނެތި ކުރެވޭނެއެވެ.

އަދި ޑޮލަރު އެކައުންޓްތަކަށް ދޫކޮށްފައިވާ ޑެބިޓް ކާޑުތަކާއި އެނޫންވެސް ކްރެޑިޓްކާޑުތަކުން ކުރިއެކޭ އެއްގޮތަށް އެއްވެސް ޗާޖެއް ކުރުމެއްނެތި އޮންލައިން ޕޭމަންޓްތައް ހެދޭނޭކަމަށް ބީއެމްއެލުން ބުނެއެވެ.