ޕްރީމެޑް ގަބޫލުކުރުން ހުއްޓާލީ ކުދިންނަށް ގެއްލުންވާތީ: އެމްއެމްޑީސީ

އެމްބީބީއެސް އަދި ޑެންޓިސްޓްކަމުގެ ކޯހަށް ވަނުމަށްޓަކައި ބައެއް ފަރާތްތަކުން ހަދާ އެއްއަހަރު ދުވަހުގެ ޕްރީ މެޑިސިން ޕްރޮގްރާމް ގަބޫލުކުރުން ހުއްޓާލުމަށް މޯލްޑިވްސް މެޑިކަލް އެންޑް ޑެންޓަލް ކައުންސިލުން ނިންމައިފިއެވެ.

އެމްއެމްޑީސީން މިކަން ރަސްމީކޮށް އިއުލާާންކޮށްފައިވަނީ މިއަދު ގެޒެޓްކުރި ބަޔާނެއްގައެވެ.

އެބަޔާނުގައިވާގޮތުގައި ޕްރީމެޑް ގަބޫލުކުރުން ހުއްޓާލި މައިގަނޑު ސަބަބަކީ އެކޯސްތަކުން، ދިވެހި ދަރިވަރުންނަށް ނަފުސާނީ ގޮތުންނާއި އަދި މާލީގޮތުން ގެއްލުން ލިބޭކަމުގެ ޝަކުވާތައް ލިބިފައިވުމާއި އެކު، ޖީ.ސީ.އީ އޭލެވެލްގެ ބަދަލުގައި، 1 އަހަރު ދުވަހުގެ ޕްރީ މެޑިސިންގ ޕްރޮގްރާމެއް ނިންމި ކަމުގައި ވިޔަސް، ދުނިޔޭގެ މަޝްހޫރު ގިނަ ޔުނިވާރސިޓީ ތަކުން، MBBS އަދި BDS އަށް ވަނުމަށް ކަނޑައަޅާފައިވާ ޝަރުތުތައް ފުރިހަމަ ނުވާތީ ކަމަށެވެ.

ޕްރީމެޑިސިން ކޯހަކީ ޖީ.ސީ.އީ އޭލެވެލްގެ ބަދަލުގައި ހަދަމުން އަންނަ 1 (އެކެއް) އަހަރު ދުވަހުގެ ކޯހެކެވެ.

ފާއިތުވި ދުވަސްތަކަށް ބަލާއިރު، މިފަދަ ކޯސްތައް، ބައެއް ޤައުމުތަކުގައި ފަރުމާކުރެވިފައިވާ ގޮތުން ދަރިވަރުންގެ ތައުލީމީ ފެންވަރު ދަށްވަމުން ދާކަން ފާހަގަކުރެވިފައިވާކަމަށް މެޑިކަލް ކައުންސިލުން ވަނީ ބުނެފައެވެ.

1 އަހަރު ދުވަހުގެ ޕްރޮގްރާމްތަކުގެ ނަމުގައި 6 މަސްދުވަހުގެ ޕްރޮގްރާމްތައް ވެސް ހިންގާކަން ފާހަގަކުރެވިފައިވާކަމަށް އެމްއެމްޑީސީން ވަނީ ބަޔާނުގައި ބުނެފައެވެ. އަދި ހަމަ އެހެންމެ އެއް އަހަރު ދުވަހުގެ ޕްރީ މެޑިސިންގ ކޯހަކީ ދުނިޔޭގެ ގިނަ މެޑިކަލް ކައުންސިލްތަކުން ތަރުހީބު ދޭ ޕްރޮގްރާމްއެއް ނޫންކަމަށްވެސް ބަޔާނުގައި ވަނީ ބުނެފައެެވެ.

އެ ގަވައިދަށް އަމަލުކުރަން ފެށި ނަމަވެސް، ކައުންސިލުން ބުނީ މިއަހަރުގެ ޖެނުއަރީ 14 އިގެ ކުރިން އެ ކޯސްތައް ހެދުމަށް ފައިސާ ދެއްކި ފަރާތްތަކާއި އެ މުއްދަތުގެ ކުރިން ކިޔެވުން ފެށި ދަރިވަރުން މި އުސޫލުން އިސްތިސްނާވާނެ ކަމަށެވެ.